ម៉ាឡេស៊ី និងកូរ៉េខាងជើងចរចាត្រូវគ្នាដើម្បីដោះដូរសាកសពគីម ជុងណាម
រដ្ឋាភិបាលម៉ាឡេស៊ី បានសម្រេច នៅថ្ងៃព្រហស្បតិ៍ម្សិលមិញ ប្រគល់សាកសព គីម ជុងណាម បងប្រុសម្តាយទីទៃរបស់លោកគីម ជុងអ៊ុន ទៅឲ្យរដ្ឋាភិបាលកូរ៉េខាងជើងវិញ។ ការបញ្ជូនសាកសពគីម ជុងណាមទៅកូរ៉េខាងជើង ធ្វើឡើងព្រមគ្នានឹងការដោះលែងជនជាតិម៉ាឡេស៊ី ៩នាក់ ដែលត្រូវជាប់ឃាំងដោយអាជ្ញាធរកូរ៉េខាងជើង នៅទីក្រុងព្យុងយ៉ាង តាំងពីកើតមានវិបត្តិការទូតរវាងប្រទេសទាំងពីរ។
ចុះផ្សាយនៅថ្ងៃ៖
ម៉ាឡេស៊ី និងកូរ៉េខាងជើងបានបិទបញ្ចប់វិបត្តិការទូត ដែលផ្ទុះកើតឡើង ដោយសារឃាតកម្មទៅលើគីម ជុងណាម បងប្រុសម្តាយទីទៃ របស់មេដឹកនាំកូរ៉េខាងជើងគីម ជុងអ៊ុន។ នៅក្នុងសន្និសីទកាសែត នៅថ្ងៃព្រហស្បតិ៍ម្សិលមិញ លោកនាយករដ្ឋមន្រ្តីម៉ាឡេស៊ី លោកណាហ្ស៊ីប រ៉ាហ្សាក់បានបញ្ជាក់ថា សាកសព គីម ជុងណាម ដែលបានស្លាប់ដោយសារអាវុធគីមី VX នៅព្រលានយន្តហោះគូឡាឡាំពួរ នៅថ្ងៃទី ១៣កុម្ភៈ ត្រូវបញ្ជូនទៅកូរ៉េខាងជើង។
តាមអ្នកយកព័ត៌មានរបស់ទីភ្នាក់ងារព័ត៌មានអង់គ្លេស Reurters នៅទន្ទឹមនឹងការប្រកាសរបស់នាយករដ្ឋមន្រ្តីម៉ាឡេស៊ី គេឃើញរថយន្តដែលទំនងដឹកសាកសពលោកគីម ជុងណាមបានបើកចេញពីកន្លែងទុកសាកសព នៅមន្ទីរពេទ្យគូឡាឡាំពួរសំដៅយន្តហោះ ដែលមានទិសដៅ ទៅប្រទេសចិន។
សាកសពរបស់គីម ជុងណាមត្រូវបានបញ្ជូនទៅកូរ៉េខាងជើង ទៅតាមការស្នើសុំរបស់គ្រួសារសព។ នេះបើតាមប្រមុខរដ្ឋាភិបាលម៉ាឡេស៊ី ដែលបានបន្ថែមថា ក្នុងពេលជាមួយគ្នានេះ ជនជាតិម៉ាឡេស៊ី ៩នាក់ ដែលនៅជាប់គាំង នៅទីក្រុងព្យុងយ៉ាង ដោយសារតែវិបត្តិការទូត ម៉ាឡេស៊ី និងកូរ៉េខាងជើង នឹងអាចត្រលប់ចូលម៉ាឡេស៊ីវិញ នៅព្រឹកថ្ងៃសុក្រនេះ។ សម្រាប់នាយករដ្ឋមន្រ្តីម៉ាឡេស៊ី នៅបន្ទាប់ពីនេះ ជនជាតិកូរ៉េខាងជើង ដែលត្រូវហាមឃាត់មិនឲ្យចាកចេញពីម៉ាឡេស៊ី ត្រូវបានគេបើកសេរីភាពឲ្យត្រលប់ទៅកូរ៉េខាងជើងវិញ ដែរ។
ទីភ្នាក់ងារព័ត៌មានកូរ៉េខាងជើង KCNA បានបញ្ជាក់ដំណឹងបញ្ជូនសាកសពជនជាតិកូរ៉េខាងជើង ទៅទីក្រុងព្យុងយ៉ាង ប៉ុន្តែ មិនបាននិយាយថា ជាសាកសពរបស់លោកគីម ជុងណាមនោះទេ។ រហូតមកដល់ថ្ងៃនេះ រដ្ឋាភិបាលកូរ៉េខាងជើង បានបដិសេធមិនទទួលស្គាល់ ការស៊ើបអង្កេត និងការសន្និដ្ឋាន របស់អាជ្ញាធរម៉ាឡេស៊ី ដែលថា ជនជាតិកូរ៉េខាងជើង ដែលត្រូវគេសម្លាប់នៅព្រលានយន្តហោះ គូឡាឡាំពួរ ជាគីម ជុងណាម។
នៅក្រោយឃាតកម្ម កើតឡើងនៅខែកុម្ភៈ ម៉ាឡេស៊ី ធ្លាប់បានបដិសេធមិនបញ្ជូនភ្លាម សាកសពទៅតាមការទាមទាររបស់កូរ៉េខាងជើង។ ម៉ាឡេស៊ីបានធ្វើកោសល្យវិច្ច័យ និងបានបញ្ជាក់អត្តសញ្ញាណជនរងគ្រោះថា ជាគីម ជុងណាម បងប្រុសម្តាយទីទៃរបស់លោកគីម ជុងអ៊ុន។តាមនាយករដ្ឋមន្រ្តី ម៉ាឡេស៊ី ការស៊ើបអង្កេតលើឃាតកម្មនៅតែបន្តមាននៅម៉ាឡេស៊ី ជាទី ដែលប៉ូលិសនៅបន្តស្វែងរក ចាប់ខ្លួនជនជាតិកូរ៉េខាងជើង ៧នាក់ ដែលគេសង្ស័យថា មានជាប់ពាក់ព័ន្ធនឹងការលបធ្វើឃាតកម្មលើគីម ជុងណាម។
សូមបញ្ជាក់ថា នៅពីរថ្ងៃក្រោយឃាតកម្មសម្លាប់គីម ជុងណាម នៅព្រលានយន្តហោះ ស្ត្រីពីរនាក់ ជាវៀតណាម និងឥណ្ឌូណេស៊ីត្រូវបានប៉ូលិសចាប់ខ្លួន និងត្រូវបានតុលាការម៉ាឡេស៊ី ចោទប្រកាន់ពីបទធ្វើឃាតទៅលើគីម ជុងណាម ក្នុងពេលដែលទីភ្នាក់ងារស៊ើបការណ៍សម្ងាត់កូរ៉េខាងត្បូង ទម្លាក់កំហុសទៅលើចារកិច្ចកូរ៉េខាងជើង ក្រោមការបញ្ជាររបស់មេដឹកនាំកូរ៉េខាងជើង គីម ជុងអ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ