ប្រជាជនបារាំងនៅសៀងហៃ ត្រូវបានអំពាវនាវឲ្យប្រយ័ត្នប្រយែងខ្លួន
ស្ថានទូតបារាំងប្រចាំនៅក្រុងប៉េកាំង តាំងពីថ្ងៃព្រហស្បតិ៍ ទី ៣០មីនា បានអំពាវនាវឲ្យប្រជាជនបារាំង រស់នៅក្នុងប្រទេសចិន ឲ្យប្រុងប្រយ័ត្នខ្លួន បន្ទាប់ពីមានជនជាតិបារាំងម្នាក់ត្រូវអំពើហិង្សា នៅទីក្រុងសៀងហៃ កាលពីថ្ងៃពុធ។ ប៉ូលិសចិនបានចាប់ខ្លួនជនដៃដល់ ដែលប៉ូលិសវាយតម្លៃថា មានជម្ងឺផ្លូវចិត្ត។
ចុះផ្សាយនៅថ្ងៃ៖
តាមសេចក្តីប្រកាស ដែលគេឃើញមានចុះផ្សាយនៅលើគេហទំព័ររបស់វិបសៃតិ៍ស្ថានទូតបារាំង ប្រចាំប៉េកាំង ជនជាតិបារាំងម្នាក់ ត្រូវបានជនជាតិចិនចាក់ឲ្យរបួស នៅថ្ងៃពុធ នៅក្នុងទីក្រុងសៀងហៃ។ នៅក្នុងសេចក្តីប្រកាស ស្ថានទូតបារាំងមិនបានបង្ហាញអត្តសញ្ញាណ និងស្ថានភាពរបស់អ្នករបួស។ នៅល្ងាចថ្ងៃសុក្រ ប៉ូលិសចិនបានអះអាងថា ជនជាតិបរទេសម្នាក់រងរបួសស្រាល ត្រង់ក ចំណែក ជនសង្ស័យ ក្នុងវ័យ ២៧ឆ្នាំ ដែលមានជម្ងឺផ្លូវចិត្ត បានប្រើកាំបិតកោរពុកមាត់ វាយប្រហារទៅលើជនបរទេស ត្រូវបានប៉ូលិសចាប់ឃុំខ្លួន។
នៅក្នុងសេចក្តីថ្លែងការណ៍ ស្ថានទូតបារាំងបានអំពាវនាវឲ្យជនជាតិបារាំង រស់នៅស្រុកចិន ប្រយ័ត្នប្រយែងខ្លួន និងថា រដ្ឋាភិបាលបារាំងបានជូនដំណឹងជាបន្តបន្ទាប់ទៅអាជ្ញាធរចិន ដើម្បីរំលឹកថា សន្តិសុខ សុវត្ថិភាពរបស់ជនជាតិបារាំងនៅចិន ជាអាទិភាពចំបងរបស់រដ្ឋាភិបាលបារាំង។
គេមិនដឹងថា តើករណីចាក់ជនជាតិបារាំងឲ្យរបួសនៅថ្ងៃពុធ មានជាប់ទាក់ទងនឹងករណីបាញ់សម្លាប់ជនជាតិចិន នៅទីក្រុងប៉ារីសដែរឬយ៉ាងណានោះទេ។ នៅថ្ងៃចន្ទ ដើមសប្តាហ៍នេះ ប៉េកាំងបានទាមទារជាលើកទី១ ឲ្យរដ្ឋាភិបាលបារាំង ធ្វើការស៊ើបអង្កេត និងធានាសន្តិសុខឲ្យសហគមន៍ជនជាតិចិន នៅបារាំង ពោល គឺបន្ទាប់ពីបុរសជាតិចិនម្នាក់ ត្រូវបានប៉ូលិសបារាំង បាញ់សម្លាប់ ក្នុងស្ថានភាពមួយមិនច្បាស់លាស់ នៅទីក្រុងប៉ារីស។ ហេតុការណ៍នេះបានជំរុញឲ្យសហគមន៍ជនជាតិចិនធ្វើបាតុកម្ម ប្រឆាំងប៉ូលិស។ ការប៉ះទង្គិចគ្នា រវាងបាតុករចិន និងប៉ូលិសបារាំង បានបណ្តាលឲ្យបាតុករ៣៥នាក់ ត្រូវចាប់ខ្លួន នៅថ្ងៃចន្ទ។ ករណីបាញ់សម្លាប់ជនជាតិចិន នៅប៉ារីសត្រូវបានចុះផ្សាយយ៉ាងព្រោងព្រាត នៅតាមកាសែត និងក្នុងបណ្តាញសង្គម រហូតដល់អ្នកប្រើប្រាស់អ៊ីនធ័រនែតខ្លះបានអំពាវនាវឲ្យគេធ្វើពហិកា មិនទិញទំនិញបារាំងថែមទៀត។
បាតុកម្មរបស់សហគមន៍ជនជាតិចិន កើតមានដោយកម្របំផុតនៅបារាំង។ ចំណែកការវាយប្រហារទៅលើជនជាតិស្បែកស នៅប្រទេសចិន ក៏ជារឿងកម្រណាស់ដែរ។ នៅទីក្រុងសៀងហៃ មានជនជាតិបារាំង ប្រមាណ១២ ០០០នាក់ បានចុះឈ្មោះនៅកុងស៊ុល ប៉ុន្តែ អាជ្ញាធរបារាំងវាយតម្លៃថា មានប្រជាជនបារាំង ច្រើនជាងនេះដល់ទៅជិត ២ម៉ឺននាក់ ដែលធ្វើការ និងរស់នៅទីក្រុងសៀងហៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ