ហ្វីលីពីន ៖ រដ្ឋាភិបាលនិងឧទ្ទាមមៅនិយមត្រលប់ចូលតុចរចាវិញ នៅហូឡង់
ការចរចាសន្តិភាពរវាងរដ្ឋាភិបាលក្រុងម៉ានីល និងពួកឧទ្ទាមកុម្មុយនិស្តម៉ៅនិយម នឹងចាប់បើកឡើងវិញ ដោយត្រូវលើកទៅធ្វើនៅចន្ទទី ៣មេសា នៅប្រទេសហូឡង់ មិនមែននៅក្រុងអូស្លូ ប្រទេសន័រវែស ដូចការគ្រោងទុកដំបូងនោះឡើយ។ នេះបើតាមការប្រកាសរបស់ប្រទេសអន្តរការី ន័រវែស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
តំណាងរដ្ឋាភិបាលហ្វីលីពីន និងតំណាងពួកឧទ្ទាមបានផ្តើមធ្វើការជាមួយគ្នាលើគម្រោងពិភាក្សា តែជំនួបចរចាជាផ្លូវការ ដំបូងឡើយគ្រោងប្រព្រឹត្តនៅថ្ងៃអាទិត្យ តែត្រូវលើកទៅធ្វើនៅថ្ងៃចន្ទវិញ នៅប្រទេសហូឡង់ ក្នុងក្រុងដែលមិនឆ្ងាយប៉ុន្មានពីផ្ទះរបស់មេដឹកនាំចរចាម៉ៅនិយម។ នេះបើតាមសេចក្តីថ្លែងការណ៍របស់មជ្ឈមណ្ឌលដោះស្រាយវិបត្តិន័រវេស ដែលជាអន្តរការី។
ជំនួបលើកនេះ អាចរាប់បានថាជាលើកទីបួន ដែលក្រុងម៉ានីល និងក្រុមឧទ្ទាមម៉ៅនិយម សុខចិត្តចូលអង្គុយចរចាគ្នា។ ក្នុងរយៈពេល៣០ឆ្នាំមកនេះ មានជំនួបម្តងម្កាលដែរ តែទើបត្រូវបានផ្តល់សន្ទុះជាថ្មី នៅពេលលោកឌុយទែរតេ បានឡើងកាន់តំណែងជាប្រធានាធិបតីហ្វីលីពីន។
ការសន្តិភាពជាមួយចលនាឧទ្ទាមម៉ៅនិយមជាអាទិភាពចំបងមួយរបស់លោកឌុយទែរតេ។ ប៉ុន្តែ មានលក្ខខណ្ឌចាំបាច់ដែលលោកប្រធានាធិបតីបានរំលឹកជាថ្មីនៅថ្ងៃអាទិត្យនេះ មុននឹងឈានដល់ចរចា គឺពួកឧទ្ទាមត្រូវគោរពបទឈប់បាញ់ បញ្ឈប់សកម្មភាពចាប់ជំរិតយកលុយ ដុតបំផ្លាញ និងត្រូវដោះលែងអ្នកទោសជាប៉ូលិសជាយោធាទាំងអស់។ លោក ឌុយទែរតេ បដិសេធមិនព្រមទទួលស្គាល់ការទាមទារសុំទឹកដីរបស់ពួកកុម្មុយនិស្តទេ។
ពួកឧទ្ទាមកុម្មុយនិស្តហ្វីលីពីន ចង់រំលំរដ្ឋាភិបាលមូលធនក្រុងម៉ានីលដែលដឹកនាំប្រទេសឱ្យមានគម្លាតខ្លាំងរវាងអ្នកមាននិងអ្នកក្រ តាំងពីឆ្នាំ១៩៦៨មក។ ហើយបានប្រភពយោធាហ្វីលីពីន ជម្លោះប្រដាប់អាវុធបង្កឡើងក្រុមឧទ្ទាមនេះ បានបង្កឱ្យបាត់បង់ជីវិតមនុស្សអស់ ៣០០០០នាក់។
កាលពីខែសីហា២០១៦ រដ្ឋាភិបាលក្រុងម៉ានីល និងពួកឧទ្ទាមបានជួបប្រជុំគ្នាជាលើកទីមួយ នៅក្រុងអូស្លូ។ ប៉ុន្តែជំនួបនោះត្រូវបានបិទបញ្ចប់ទៅវិញ នៅខែកុម្ភៈ នៅពេលពួកឧទ្ទាមម៉ៅបានបាញ់សម្លាប់ទាហានជាតិបួននាក់។ ហើយនៅដើមខែមីនា លោកឌុយទែរតេបានបញ្ជាឱ្យប៉ូលិសនិងទាហានបង្កើនការវាយសង្គ្រប់លើពួកឧទ្ទាមនោះជាការសងសឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ