អាមេរិកព្រមានចាត់ការលើកូរ៉េខាងជើង ជាឯកតោភាគី ដោយមិនបាច់ពឹងចិន
ចុះផ្សាយនៅថ្ងៃ៖
ស្តាប់ - ០៦:០៥
ប្រធានាធិបតីអាមេរិក លោក ដូណាល់ ត្រាំ ធ្លាប់បានព្រលយពាក្យជាញយដងមកហើយ ថានឹងមិនបណ្តោយឱ្យកូរ៉េខាងជើង បន្តគំរាមកំហែងនុយក្លេអ៊ែរ និងមីស៊ីលបាលីស្ទិកទៀតទេ។ យប់មិញ នៅក្នុងពេលផ្តល់បទសម្ភាសន៍ឱ្យសារព័ត៌មានFinancial Times លោកត្រាំបានអះអាងថា សហរដ្ឋអាមេរិកត្រៀមជាស្រេចនឹងចាត់ការលើកូរ៉េខាងជើង ជាឯកតោភាគីតែម្តង ទោះបីជាចិនមិនចូលរួមជាមួយក៏ដោយ។ តើនេះជាវិធីសាស្ត្រដាក់សម្ពាធលើចិនឬយ៉ាងណា ព្រោះថានៅព្រហស្បតិ៍-សុក្រសប្តាហ៍នេះ លោកត្រាំត្រូវទទួលជួបលោក ស៊ី ជីនពីង ប្រធានាធិបតីចិនផង។
លោកដូណាល់ ត្រាំ ប្រធានាធិបតីអាមេរិក បានប្រកាសថានឹងចាត់វិធានការ លើកម្មវិធីនុយក្លេអ៊ែរកូរ៉េខាងជើង ជាឯកតោភាគី ដោយគ្មានចិន។តាមវិធីណានោះ លោកដូណាល់ ត្រាំ មិនបានលម្អិតឱ្យដឹងទេ ! លោកប្រធានាធិបតីអាមេរិក ដែលតែងសន្យាមិនអត់អោនឱ្យកូរ៉េខាងជើងនោះ បានត្រឹមគូសបញ្ជាក់ប្រាប់អ្នកសារព័ត៌មាន កាលពីថ្ងៃអាទិត្យម្សិលមិញថា បើចិនមិនព្រមចាត់ការលើកូរ៉េខាងជើង អាមេរិកជាអ្នកធ្វើ ! គឺធ្វើតែម្នាក់ឯង ! សហរដ្ឋអាមេរិកបានត្រៀម ស្រេចបាច់ទាំងស្រុងហើយ នឹងចាត់វិធានការប្រឆាំងកូរ៉េខាងជើង ជាឯកតោភាគី ដោយមិនខ្វល់ថាមាន ឬគ្មានជំនួយពីចិនទេ។
លោកត្រាំដាក់សម្ពាធលើចិន
សម្រាប់លោកត្រាំ ចិនមានឥទ្ធិពលខ្លាំងណាស់លើរបបព្យុងយ៉ាង! ហើយចិនជាអ្នកសម្រេចចិត្តដោយខ្លួនឯង ថាតើគួរជួយអាមេរិកឬអត់ ក្នុងការចាត់វិធានការលើរបបព្យុងយ៉ាង។ បើចិនមិនជួយ នោះនឹងគ្មាននរណាម្នាក់អាចទទួលផលល្អឡើយ ប៉ុន្តែប្រសិនបើចិនព្រមចូលជួយចាត់ការកូរ៉េខាងជើង នោះជាជម្រើសល្អសម្រាប់ចិន ! ប៉េកាំងនឹងបានទទួលមគ្គទទួលផល។
តើល្អយ៉ាងម៉េច ? ចំពោះលោកត្រាំ ដែលជាមហាសេដ្ឋី មានបានដោយសារជំនួញ បើចិនព្រមជួយអាមេរិក នោះចិននឹងបានរង្វាន់ ! រង្វាន់ដែលគ្មានអ្វីក្រៅអំពីពាណិជ្ជកម្ម ! អ្វីៗវិលជុំវិញតែពាណិជ្ជកម្មមួយមុខប៉ុណ្ណោះ !
លោក ត្រាំ មិនបានលម្អិតអ្វីទាំងអស់ ! លោកកំពុងតែបង្ហាញអំពីឆន្ទៈដាច់ខាត និងភាពម៉ឺងម៉ាត់របស់លោក ចំពោះសំណុំរឿងនុយក្លេអ៊ែរកូរ៉េខាងជើង ដាក់ចិន ដាក់ប្រធានាធិបតីចិន ដែលនឹងត្រូវអញ្ជើញមកបំពេញទស្សនកិច្ចនៅសហរដ្ឋអាមេរិក នាថ្ងៃព្រហស្បតិ៍និងសុក្រសប្តាហ៍នេះ។
ជំនួបដ៏លំបាករវាងលោកស៊ីជិនពីង និងលោក ដូណាល់ ត្រាំ
ជំនួបមួយទល់នឹងមួយ រវាងប្រធានាធិបតីចិន លោក ស៊ី ជិនពីង និងលោក ដូណាល់ ត្រាំ ជាលើកដំបូង ជាជំនួបដ៏មហាសែនសំខាន់ ព្រោះជាឱកាសដែលប្រមុខដឹកនាំទាំងពីរ ត្រូវចងក្រងស្ពានមេត្រី និងរឹតចំណងទំនាក់ទំនងទ្វេភាគី។ ប៉ុន្តែជំនួបនេះបែរជាត្រូវប្រព្រឹត្តទៅក្នុងបរិយាកាសតានតឹងខ្លាំង ទៅវិញ។
ហើយគឺលោកដូណាល់ ត្រាំ ផ្ទាល់ ជាធ្វើព្យុះធ្វើភ្លៀងការទូត និងបានទទួលស្គាល់ត្រង់ៗថា ជំនួបជាមួយលោកស៊ី ជីនពីង នៅចុងសប្តាហ៍នេះ ជាជំនួបដ៏លំបាក ព្រោះមហាអំណាចសេដ្ឋកិច្ចទាំងពីរត្រូវដោះស្រាយបញ្ហាចម្រូងចម្រាសពាណិជ្ជកម្មផង និងពិសេសត្រូវដោះស្រាយសំណុំរឿងដ៏សំខាន់ខ្លាំងមួយទៀត ស្តីពីចំណាត់ការទប់ស្កាត់កម្មវិធីនុយក្លេអ៊ែរកូរ៉េខាងជើង។
ឯកអគ្គរដ្ឋទូតអាមេរិក ប្រចាំអង្គការសហប្រជាជាតិ បានប្រកាសរួចហើយដែរកាលពីម្សិលមិញ ថា សហរដ្ឋអាមេរិកពិតជាចង់ដាក់សម្ពាធលើចិន ដើម្បីឱ្យប្រទេសមហាអំណាចដ៏មានឥទ្ធិពលមួយនេះ បញ្ចេញសកម្មភាពប្រឆាំងនឹងកម្មវិធីនុយក្លេអ៊ែររបស់កូរ៉េខាងជើង។ កម្មវិធីនុយក្លេអ៊ែរព្យុងយ៉ាង ដែលបើតាមរបាយការណ៍សន្តិសុខជាតិ ថាមានលក្ខណៈគំរាមកំហែងខ្លាំង ! កូរ៉េខាងជើងពិតជានឹងអាចមានលទ្ធភាពបាញ់មីស៊ីល ពាំក្បាលនុយក្លេអ៊ែរ ដល់ដែនដីអាមេរិកបាន នៅរវាងឆ្នាំ២០២១ ពោលគឺនៅចុងអាណត្តិរបស់លោកត្រាំតែម្តង។
ប្រទេសតែមួយគត់ដែលអាចបញ្ឈប់កម្មវិធីនុយក្លេអ៊ែរកូរ៉េខាងជើងគឺចិន។ គ្រប់គ្នាសុទ្ធតែដឹង ! ថាចិនត្រូវចេញមុខចាត់ការ។ ត្រឹមប្រកាសផ្អាកការនាំចូលធ្យូងថ្មពីកូរ៉េខាងជើង ពិតជាមិនគ្រប់គ្រាន់ឡើយ។ សហគមន៍អន្តរជាតិចង់ឃើញចិន បញ្ចេញសកម្មភាពច្បាស់លាស់ និងខ្លាំងដាក់ព្យុងយ៉ាង។ ដូច្នេះហើយបានជាអាមេរិកត្រូវតែប្រើគ្រប់វិធីសាស្ត្រ ដាក់សម្ពាធលើចិន។
អាមេរិកពិតជានឹងអាចប្រើកម្លាំងយោធា វាយព្រមានកូរ៉េខាងជើងមែនឬ ?
សេតវិមាន បានសិក្សាចប់សព្វគ្រប់ហើយ អំពីវិធានការដែលត្រូវប្រើដើម្បីឆ្លើយតបឱ្យបានក្តិសមបំផុត ទៅនឹងភាពងងើលអភិវឌ្ឍន៍កម្មវិធីនុយក្លេអ៊ែរ និងបាលីស្ទិករបស់ព្យុងយ៉ាង។ ចំណាត់ការលើផ្នែកសេដ្ឋកិច្ចនិងយោធា ពិតជាមានចែងក្នុងទិសដៅរបស់រដ្ឋាបាលលោកត្រាំមែន ប៉ុន្តែបើតាមទីប្រឹក្សាសន្តិសុខជាតិ រដ្ឋាបាលអាមេរិកថ្មីនេះ ផ្អៀងទៅរកដាក់ទណ្ឌកម្មបន្ថែម និងដាក់គំនាបខ្លាំងលើចិនឱ្យចេះមើលការខុសត្រូវរបបព្យុងយ៉ាងសិន។
តាមការពិត តាំងពី បានឡើងកាន់តំណែងជាប្រធានាធិបតីអាមេរិកមក លោកត្រាំតែងបង្ហើរសារអំពីលទ្ធភាពប្រើកម្លាំងយោធាវាយកូរ៉េខាងជើង ប្រសិនបើព្យុងយ៉ាងមិនព្រមបញ្ឈប់កម្មវិធីនុយក្លេអ៊ែរ។ កាលពីខែមីនា លោក ត្រាំ បានគូសបញ្ជាក់ថា ត្រៀមបញ្ចេញគ្រប់មធ្យោបាយយោធាដែលអាមេរិកមាន ដើម្បីបំផ្លាញមីស៊ីសបាលីស្ទិកកូរ៉េខាងជើងវិញ។
ដំណោះស្រាយយោធានេះ លាត្រដាងលើតុស្រេចតាំងពីយូរមកហើយ ! នេះបើការរំលឹករបស់អតីតរដ្ឋមន្ត្រីក្រសួងការពារជាតិសម័យលោកអូបាម៉ា។
កាលពីឆ្នាំ១៩៩៤ អាមេរិកធ្លាប់បានសិក្សាផែនការចង់វាយប្រហារកូរ៉េខាងជើង ដើម្បីជាកិច្ចការពារម្តងហើយ តែមិនបានប្រើ។ ហើយផែនការនេះ ត្រូវបានរក្សាទុក និងនៅតែជាជម្រើសមួយរបស់អាមេរិកជានិច្ច។ ជម្រើសចុងក្រោយ សម្រាប់ដាក់សម្ពាធលើចិន។ ចិនដែលសំងំធ្វើមិនដឹងមិនឮរហូតមក រហូតបណ្តោយឱ្យព្យុងយ៉ាងមុជបានជ្រៅក្នុងវិស័យនុយក្លេអ៊ែរ ក៏ព្រោះតែចិនខ្លាចរបបនេះដួលរលំ ! បើព្យុងយ៉ាងរលំ នោះកូរ៉េនឹងរួបរួមគ្នា ហើយអាមេរិកជាសម្ព័ន្ធមិត្តសេអ៊ូលនឹងបានមកនៅកៀកជាប់ព្រំដែនចិនតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ