កូរ៉េខាងជើងសន្យាតបតនឹងការពង្រាយនាវាចម្បាំងអាមេរិកនៅក្បែរឧបទ្វីប
ជាមួយនឹងការបរិហារ ការបញ្ជូននាវាចម្បាំងអាមេរិកមកក្បែរឧបទ្វីបកូរ៉េ ព្យុងយ៉ាងបានប្រកាសព្រមាននៅថ្ងៃអង្គារនេះថា នឹងធ្វើសង្គ្រាម ព្រោះពេលនេះស្ថានភាពក្នុងតំបន់បានឡើងតានតឹងខ្លាំងគួរឱ្យព្រួយបារម្ភ។ ការពង្រាយកម្លាំងទ័ពអាមេរិក ដែលជាដំណាក់កាលឈានឆ្ពោះទៅដល់ការឈ្លានពាន។ នេះបើតាមសារព័ត៌មានផ្លូវការកូរ៉េខាងជើង។
ចុះផ្សាយនៅថ្ងៃ៖
កូរ៉េខាងជើង មិនបង្អង់យូរនឹងបញ្ចេញប្រតិកម្មតបនឹងសកម្មភាពបញ្ជូននាវាចម្បាំងអាមេរិក ទៅកាន់ឧបទ្វីបកូរ៉េទេ។ ហើយព្យុងយ៉ាងរបស់ គីម ជុងអ៊ុន ហាក់ដូចជាមិនប្តូរឥរិយាបថ និងញញើត នឹងពាក្យគំរាមរបស់អាមេរិកដែរ។ “ព្យុងយ៉ាងនឹងចាត់វិធានការតបវិញ ដោយប្រើអាវុធតែម្តង ប្រឆាំងនឹងអ្នកបង្កហេតុ ដើម្បីការពារខ្លួន” នេះជាការគូសបញ្ជាក់របស់អ្នកនាំពាក្យក្រសួងការបរទេសកូរ៉េខាងជើង ដែលមានចុះផ្សាយក្នុងទំព័រកាសែតផ្លូវការ KCNA ដោយបន្ថែមទៀតថា “សាធារណរដ្ឋប្រជាមានិតប្រជាធិបតេយ្យកូរ៉េ ត្រៀមជាស្រេចនឹងធ្វើ ធ្វើគ្រប់សង្គ្រាមដែលអាមេរិកចង់បាន”។
សម្រាប់ព្យុងយ៉ាង ប្រសិនបើមានសង្គ្រាម គឺអាមេរិកជាអ្នកទទួលខុសត្រូវ និងត្រូវទទួលនូវផលវិបាកជាហន្តរាយខ្លាំង អំពីសកម្មភាពអាស្រូវរបស់ខ្លួន។ តាំងពីថ្ងៃសៅរ៍មក កូរ៉េខាងជើង បានប្រឹងសំញែងខ្លួនថាមិនចុះញ៉ម ចាញ់សំឡុតទេ ព្រោះការវាយប្រហាររបស់អាមេរិកកាន់តែបញ្ជាក់បានអំពីភាពត្រឹមត្រូវនៃការអភិវឌ្ឍន៍កម្មវិធីនុយក្លេអ៊ែរ។
សូមបញ្ជាក់ថា បន្ទាប់ពីបានបាញ់មីស៊ីលមួយប្រាវ លើស៊ីរី រដ្ឋាភិបាលអាមេរិករបស់លោក ត្រាំ បានប្រកាសបញ្ជូននាវាចម្បាំង ទៅដាក់ពង្រាយ នៅក្បែរឧបទ្វីបកូរ៉េ។ សេចក្តីសម្រេចនេះ ត្រូវបានអ្នកវិភាគគ្រប់រូបយល់ថា អាមេរិកដំឡើងសាច់ដុំ ត្រៀមប្រើកម្លាំងយ៉ាងពិតៗ ដាក់កូរ៉េខាងជើង ដូចអ្វីដែលលោកដូណាល់ ត្រាំ ធ្លាប់បាននិយាយថានឹងចាត់ការជាឯកតោភាគី លើបញ្ហានុយក្លេអ៊ែរនិងមីស៊ីលបាលីស្ទិកមែន។
ភាពតានតឹងនេះធ្លាក់នេះមកជួនចំពេលដែលសភាកូរ៉េខាងជើងត្រូវបើកជំនួបប្រជុំប្រចាំឆ្នាំដ៏កម្ររបស់ខ្លួន នៅថ្ងៃអង្គារនេះ។ ការប្រជុំសភា ម្តងឬពីរដងក្នុងមួយឆ្នាំ ដើម្បីកំណត់កញ្ចប់ថវិការជាតិនិងសម្រេចអនុម័តសំណើរបស់បក្សកាន់អំណាច។ ម្យ៉ាងទៀតមួយរយៈនេះព្យុងយ៉ាងបានពន្លឿនខ្លាំងការស្រាវជ្រាវកម្មវិធីនុយក្លេអ៊ែរ។ អ្នកវិភាគជាច្រើនយល់ថាកូរ៉េខាងជើង អាចនឹងធ្វើការសាកល្បងនុយក្លេអ៊ែរជាលើកទីប្រាំមួយ នៅក្នុងអំឡុងពេលប៉ុន្មានថ្ងៃនេះទៀត ដែលត្រូវជាខួប១០៥ឆ្នាំរបស់លោក គីម អ៊ីលស៊ុង បិតារបបកុម្មុយនិស្ត និងជាជីតារបស់ប្រមុខគីមជុងអ៊ុនសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ