ឥណ្ឌូណេស៊ី៖ការប្រយុទ្ធប្រឆាំងទល់នឹងអំពើពុករលួយគឺជាមុខរបរមួយប្រកបដោយគ្រោះថ្នាក់បំផុត
នៅឥណ្ឌូណេស៊ី អ្នកស៊ើបអង្កេតប្រឆាំងអំពើពុករលួយមួយរូប ត្រូវបានជនឈ្លានពានពីររូបដែលជិះម៉ូតូបានវាយប្រហារដោយជះទឹកអាស៊ីដទៅលើមុខមាត់របស់គាត់នៅទីក្រុងJarkarta។ អំពើឈ្លានពានបែបនេះ នៅតែត្រូវបានប្រព្រឹត្តឡើងជាទូទៅនិងប្រហែលជាមានជាប់ទាក់ទងនឹងសំណុំរឿងពុករលួយរបស់ថ្នាក់ដឹកនាំនយោបាយជាន់ខ្ពស់នៅក្នុងប្រទេស។ ក្នុងចំណោមបណ្តាប្រទេសចំនួន១៧៦ ឥណ្ឌូណេស៊ី ជាប្រទេសជាប់លេខ៩០នៅក្នុងចំណោមបណ្តាប្រទេសដែលពុករលួយខ្លាំងជាងគេ-នេះបើយោងតាមអង្គការតម្លាភាពក្រៅរដ្ឋាភិបាលឈ្មោះ Transparency International ។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីការវាយប្រហារដោយជះទឹកអាស៊ីដប្រឆាំងទៅលើអ្នកស៊ើបអង្កេតក្នុងការប្រឆាំងអំពើពុករលួយកាលពីថ្ងៃអង្គារទី១១មេសានៅក្នុងទីក្រុងJarkarta មក ប្រធានាធិបតីឥណ្ឌូណេស៊ី លោក Widodo បានប្រតិកម្មបរិហារថាជា អំពើដ៏សាហាវយង់ឃ្នងនិងបានថ្កោលទោសយ៉ាងខ្លាំងក្លា។ លោក Widodo ជាឥស្សរជននយោបាយមួយរូបដែលមានឆន្ទះមុៈមុតក្នុងការប្រយុទ្ធប្រឆាំងទល់នឹងអំពើពុករលួយ។ អំពើពុករលួយដែលកំពុងតែរីករាលដាលខ្លាំងនៅក្នុងប្រទេសឥណ្ឌូណេស៊ី។
គួររំលឹកថា អ្នកស៊ើបអង្កេតដែលរងការវាយប្រហារដោយទឹកអាស៊ីតនៅក្នុងទីក្រុង Jarkarta ធ្លាប់បានធ្វើការស៊ើបអង្កេតជាអាទិ៍នៅលើសំណុំរឿងមួយដែលពាក់ព័ន្ធនឹងការបាត់លុយចំនួន ១៦០លានអឺរ៉ូ ពីបេឡារដ្ឋ។
ដោយឡែក លោក Busyro Muqoddas ដែលជាអតីតប្រធានគណកម្មការប្រឆាំងអំពើពុករលួយ បានថ្លែងពន្យល់ប្រាប់ថា អំពើឈ្លានពានដ៏កាចសាហាវបែបនេះ ក៏ពុំមែនជាលើកទីមួយទេ ដែលក្រុមអ្នកស៊ើបអង្កេតរបស់គណៈកម្មការប្រឆាំងអំពើពុករលួយនេះ ជាចំណុចផ្ទាំងស៊ីបនៃការវាយប្រហារ។ ពីព្រោះ ក្រុមអ្នកស៊ើបអង្កត តែងតែត្រូវបានទទួលរងការគំរាមកំហែងបំភិតបំភ័យជានិច្ច ឧទ្ទាហរណ៍រថយន្តរបស់សមាជិកគណកម្មការម្នាក់ ត្រូវរងការវាយប្រហារដោយទឹកអាស៊ីតហើយផ្ទះរបស់គាត់ ក៏ត្រូវគេគប់ចោលពងមាន់ស្អុយដាក់ទៀត។ ចំណែកអ្នកស៊ើបអង្កេតម្នាក់ទៀត ត្រូវបានរថយន្តមួយគ្រឿងបើកបុកនៅក្បែរការិយាល័យនៃគណៈកម្មការប្រឆាំងអំពើពុករលួយដែរ ជាហេតុបណ្តាលឲ្យអ្នកស៊ើបអង្កេតនោះបាក់ជើង។
ទាក់ទងនឹងបញ្ហារបស់អ្នកស៊ើបអង្កេតដែលទើបបានទទួលរងការជះទឹកអាស៊ីដនៅទីក្រុងJarkarta កាលពីថ្ងៃអង្គារទី១១មេសា គាត់ធ្លាប់ទទួលរងការប៉ុនប៉ងបំភិតបំភ័យអស់ជាច្រើនលើកច្រើនសារមកហើយនៅខណៈពេលដែលគាត់កំពុងធ្វើការស៊ើបអង្កេតនៅលើសំណុំរឿងពុករលួយផ្សេងៗទៀតដូចជាសំណុំរឿងមូលប្បទានប័ត្រសំរាប់វ៉ាកងឬក៏សំណុំរឿងពុករលួយពាក់ព័ន្ធជាមួយប៉ូលីស។
សរុបទៅ យោងតាមអតីតប្រធានគណៈកម្មការប្រឆាំងអំពើពុករលួយដដែលគេពុំមានការសង្ស័យឡើយដែលថាមនុស្សដ៏សំខាន់ៗ ដូចយ៉ាងអ្នកកិច្ចការជំនួញធំៗ អ្នកនយោបាយឬក៏មន្ត្រីជាន់ខ្ពស់នានានោះ មានជាប់ពាក់ព័ន្ធនៅក្នុងសំណុំរឿងពុករលួយទាំងនោះហើយ ទើបបានជាមានកើតឡើងនូវការវាយប្រហារយ៉ាងថោកទាបខាងលើនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ