ទស្សនកិច្ចមួយជុំតំបន់ឈូងសមុទ្រពែក្សរបស់លោកប្រធានាធិបតីហ្វីលីពីនឌុយទែរតេ
លោកប្រធានាធិបតីហ្វីលីពីនឌុយទែរតេកំពុងបន្តដំណើរទស្សនកិច្ចមួយជុំតំបន់ឈូងសមុទ្រពែក្សរយៈពេល ១សប្តាហ៍នៅក្នុង៣ ប្រទេស គឺអារ៉ាប៊ីសាអូឌីត បារ៉ែន និងប្រទេសកាតា។ បន្ទាប់ពីអារ៉ាប៊ីសាអូឌីត លោកឌុយទែរតេបានបំពេញទស្សនកិច្ចក្នុងទឹកដីបារ៉ែននាថ្ងៃព្រហស្បតិ៍ ទី១៣ មេសា និងបញ្ចប់ទស្សនកិច្ចនៅក្នុងប្រទេសកាតានាថ្ងៃសុក្រ ទី១៤ មេសា។ វត្តមានរបស់លោកឌុយទែរតេនៅក្នុងប្រទេសអារ៉ាប់ទាំង ៣ បានទទួលស្វាគមន៍យ៉ាងរ៉ាក់ទាក់ពីពលករហ្វីលីពីនប្រមាណជា ១លាននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ជម្រើសទៅកាន់ប្រទេសអារ៉ាប់ទាំង ៣ គឺអារ៉ាប៊ីសាអូឌីត បារ៉ែន និងកាតារបស់ប្រមុខរដ្ឋហ្វីលីពីនឌុយទែរតេពេលនេះមិនមែនជារឿងចៃដន្យទេ មិនចែដន្យព្រោះទី១ មានពលករហ្វីលីពីនដល់ទៅលាននាក់កំពុងធ្វើការរកលុយនៅទីនោះ និងទី២ ពលករហ្វីលីពីនភាគច្រើននៅទីនោះបានបោះឆ្នោតគាំទ្រលោកឌុយទែរតេនាការបោះឆ្នោតប្រធានាធិបតីក្នុងឆ្នាំ ២០១៦។ ពលករហ្វីលីពីននៅបរទេសបានគាំទ្រនយោបាយរបស់លោកឌុយទែរតេ ពិសេសនយោបាយប្រយុទ្ធប្រឆាំងនឹងគ្រឿងញាន និងយល់ឃើញថា លោកឌុយទែរតេពិតជាមានឆន្ទៈនយោបាយដើម្បីប្រទេសជាតិពិតប្រាកដមែន។
គួរជម្រាបជូនថា មានហេតុផលចំនួន ៣ ដែលបានជំរុញឲ្យពលរដ្ឋហ្វីលីពីនសម្រុកចេញទៅធ្វើការនៅបរទេស ពិសេសក្នុងប្រទេសអារ៉ាប់ ដូចយ៉ាងអារ៉ាប៊ីសាអូឌីត បារ៉ែន កាតា អេមីរ៉ាអារ៉ាប់រួម ឬមួយក៏កូវ៉ែត ទី១ សម្បូរការងារធ្វើ ទី២ ប្រាក់ខែខ្ពស់ និងទី៣ មានសន្តិសុខល្អ។ ជាក់ស្តែងនៅអារ៉ាប៊ីសាអូឌីត មានពលករហ្វីលីពីនជាង ៧៥ម៉ឺននាក់ មានជាង ៣០ម៉ឺននាក់នៅក្នុងប្រទេសបារ៉ែន និងកាតា និងមានប្រមាណជា ៨៥ម៉ឺននាក់នៅក្នុងប្រទេសអេមីរ៉ាអារ៉ាប់រួម និងកូវ៉ែត។
នៅអារ៉ាប៊ីសាអូឌីតក៏ដូចជានៅបារ៉ែន និងក៏ដូចជានៅកាតា លោកឌុយតែរតេជួបសំណេះសំណាលជាមួយសហគមន៍ហ្វីលីពីនដើម្បីសួរសុខទុក្ខ និងចង់ដឹងពីជីវភាព ការរស់នៅ និងបញ្ហាគ្រប់យ៉ាងដែលពួកគេបានជួបប្រទះ។ តែបញ្ហាប្រឈមដែលលោកឌុយទែរតេបានជួប គឺជីវិតកាន់តែលំបាករបស់ពលរដ្ឋហ្វីលីពីនប្រមាណជា ៥ ០០០នាក់រស់ក្នុងប្រទេសអារ៉ាប៊ីសាអូឌីត។ តាំងពីតម្លែប្រេងឆៅធ្លាក់ថ្លៃមក ពួកគេនៅមិនទាន់បានបើកប្រាក់ខែ និងកំពុងប្រឈមការជម្លៀសចេញពីទឹកដីអារ៉ាប៊ីសាអូឌីត។
ជាទូទៅ ពលករហ្វីលីពីនដែលធ្វើការនៅក្នុងប្រទេសអារ៉ាប់ខ្លះទទួលបានប្រាក់ខែខ្ពស់ពី ៣ ទៅ ៤ដងច្រើនជាងនៅក្នុងប្រទេសកំណើត ដូចយ៉ាងអ្នកកាត់សក់នៅក្នុងប្រទេសកាតាទទួលបានប្រាក់ខែជាង ១ ០០០ដុល្លារទល់នឹងជាង ១៨០ដុល្លារនៅហ្វីលីពីន។ តែទន្ទឹមគ្នានេះ មានពលករហ្វីលីពីនខ្លះដែលបម្រើការក្នុងផ្ទះត្រូវបានគេប្រើជាងខ្ញុំកញ្ជះដាច់ថ្លៃទៅទៀត។ អ៊ីចឹងហើយបានជាមានពលករហ្វីលីពីនភាគច្រើនមិនញញើតនឹងនិយាយថា បើឲ្យពួកគេជ្រើសរើសកន្លែងរស់នៅ គឺមានតែស្រុកកំណើតខ្លួនទេដែលរស់នៅស្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ