បន្ទាប់ពីអាមេរិកបានវាយប្រហារស៊ីរី និងអាហ្វហ្កានីស្ថាន តើដល់វេនកូរ៉េខាងជើងហើយឬ?
ចុះផ្សាយនៅថ្ងៃ៖
ស្តាប់ - ០៦:៥៨
បន្ទាប់ពីបានវាយប្រហារលើប្រទេសស៊ីរី និងអាហ្វហ្កានីស្ថានមក លោកប្រធានាធិបតីអាមេរិកដូណាល់ ត្រាំមិនបានបំភ្លេចសំណុំរឿងនុយក្លេអ៊ែរកូរ៉េខាងជើងទេ។ លោកត្រាំបានបញ្ជាក់ជាថ្មីដោយព្រមានចំៗនាថ្ងៃព្រហស្បតិ៍ ទី១៣ មេសាថា កូរ៉េខាងជើងជាបញ្ហាដែលអាមេរិកត្រូវដោះស្រាយដោយមាន ឬគ្មានជំនួយពីប្រទេសចិនដែលជាសម្ព័ន្ធមិត្តចាក់ទឹកមិនលេចរបស់របបក្រុងព្យុងយ៉ាង។ តែការព្រមានជាថ្មីរបស់លោកត្រាំក៏បានទទួលការព្រមានតបវិញពីចិន និងកូរ៉េខាងជើងនាថ្ងៃសុក្រ ទី១៤ មេសានេះ។
គេពិតជាមិនអាចនិយាយបានទេថា តើកូរ៉េខាងជើងជាផ្ទាំងស៊ីបវាយប្រហាររបស់លោកដូណាល់ ត្រាំនាពេលខាងមុខ ឬអត់ ព្រោះនរណាក៏ដឹងដែរថា លោកដូណាល់ ត្រាំជាប្រធានាធិបតីអាមេរិកលើកទី១ដែលគេមិនអាចទាយដឹងមុនពីបំណងពិតរបស់លោក។ រហូតមកដល់ពេលនេះ លោកត្រាំបានធ្វើអ្វីដែលគាត់មិនធ្លាប់បាននិយាយ ហើយមិនបានធ្វើអ្វីដែលគាត់ធ្លាប់បាននិយាយ។ នៅក្នុងសម័យឃោសនាបោះឆ្នោត លោកត្រាំបាននិយាយច្រើនណាស់ពីគោលជំហរ និងពីឆន្ទៈដែលលោកនឹងធ្វើនៅពេលជាប់ឆ្នោត តែដល់ពេលទទួលបានអំណាច លោកត្រាំបែរជាបានធ្វើផ្ទុយទៅវិញ ពោលផ្លាស់ប្តូរជំហរសឹងតែ ១៨០អង្សារ។
តើមាននរណាម្នាក់នឹកស្មានទេថា លោកត្រាំបានបញ្ជាឲ្យវាយប្រហារស៊ីរី ក្រោយពីរបបស៊ីរីបានប្រើអាវុធគីមីសម្លាប់ជនស៊ីវិល?។ តើមាននរណាម្នាក់ជឿថា លោកត្រាំហ៊ានដល់ទៅប្រើមេគ្រាប់បែកទម្លាក់លើទឹកដីប្រទេសអាហ្វហ្កានីស្ថានដោយសារតែមានទាហានអាមេរិកម្នាក់បាត់បង់ជីវិតនៅទីនោះ?។ ដូច្នេះរឿងអីដែលថា លោកត្រាំមិនហ៊ានវាយប្រហារលើកូរ៉េខាងជើងនោះ?។ លោកត្រាំបានរម្លឹកដោយព្រមានជាថ្មីនៅក្រោយទម្លាក់គ្រាប់បែកលើទឹកដីអាហ្វហ្កានីស្ថានថា កូរ៉េខាងជើងជាបញ្ហាដែលអាមេរិកត្រូវដោះស្រាយទោះបីមាន ឬគ្មានចិនក្តី។
តែគេត្រូវហ៊ានទទួលស្គាល់ថា ជម្រៅនៃបញ្ហា និងបរិបទភូមិសាស្រ្តនយោបាយនៅកូរ៉េខាងជើង គឺខុសគ្នាស្រឡះនៅស៊ីរី ឬមួយនៅអាហ្វហ្កានីស្ថាន។ លោកត្រាំវាយប្រហារស៊ីរីដោយសាររបបក្រុងដាម៉ាសបានប្រើអាវុធគីមីសម្លាប់ជនស៊ីវិល ហើយវាយប្រហារអាហ្វហ្កានីស្ថានព្រោះជាកន្លែងលាក់ខ្លួនរបស់ពួកភេរវជន និងពួកជីហាតអង្គការរដ្ឋអ៊ីស្លាម។ ចំណែកបញ្ហានុយក្លេអ៊ែរកូរ៉េខាងជើង ជារឿងស្មុគស្មាញ និងសាំញាំដែលគេមិនដោះស្រាយតាមមេគ្រាប់បែក ឬគ្រាប់មីស៊ីលបានទេ។
តើលោកដូណាល់ ត្រាំហ៊ាន ឬមិនហ៊ានវាយប្រហារកូរ៉េខាងជើង?
អ្វីដែលគេដឹងមកទល់ពេលនេះគឺថា អាមេរិកបានបញ្ជូននាវាដឹកយន្តហោះចម្បាំងមួយគ្រឿងទៅកាន់ឧបទ្វីបកូរ៉េដោយអមជាមួយនូវនាវាបាញ់គ្រាប់មីស៊ីលចំនួន ៣គ្រឿង។ នាវាដឹកយន្តហោះចម្បាំងនោះអាចផ្ទុកយន្តហោះ និងឧទ្ធម្ភាគចក្រពី ៧០ ទៅ ៨០គ្រឿង។ បន្ទាប់មក ក៏មានការបញ្ជូននាវាមុជទឹកបន្ថែមទៀត ហើយនៅថ្ងៃសុក្រ ទី១៤ មេសា ទីប្រឹក្សាម្នាក់ទទួលបន្ទុកនយោបាយការបរទេសរបស់សេតវិមានដែលមិនព្រមបញ្ចេញឈ្មោះបានថ្លែងឲ្យដឹងថា អាមេរិកកំពុងសិក្សាផ្លូវយោធាចំពោះកូរ៉េខាងជើង។
តាមរូបទីប្រឹក្សាដដែល អាមេរិកកំពុងរង់ចាំមើលថា តើរបបក្រុងព្យុងយ៉ាងហ៊ានធ្វើការសាកល្បងនុយក្លេអ៊ែរ ឬគ្រាប់មីស៊ីលអន្តរទ្វីបជាថ្មីដែល ឬទេ។ តាមសម្តីរបស់ទីប្រឹក្សាអាមេរិកដូចនេះនាំឲ្យគេយល់បានភ្លាមថា អាមេរិកអាចនឹងវាយប្រហារកូរ៉េខាងជើង ប្រសិនបើមនុស្សខ្លាំងលោកគីម ជុនអ៊ុនហ៊ានធ្វើការសាកល្បងនុយក្លេអ៊ែរ ឬគ្រាប់មីស៊ីលអន្តរទ្វីបមែន។ « ជាមួយនឹងរបបក្រុងព្យុងយ៉ាង សំណួរមិនមែនសួរដោយចង់ដឹងថា តើនឹងកើតមានឬអត់ទេ តែត្រូវសួរថា នៅពេលណា » នេះជាការសម្តីរបស់រូបទីប្រឹក្សាអាមេរិកនៅសេតវិមានទទួលបន្ទុកនយោបាយការបរទេស។
យ៉ាងណាក៏ដោយ និងទោះជាមានការព្រមានជាថ្មីក្តី ក៏លោកដូណាល់ ត្រាំនៅបន្តប្រើធម៌ក្តៅ និងធម៌ត្រជាក់ ព្រមទាំងមានការប្រយ័ត្នប្រយែងខ្លាំងណាស់ចំពោះរឿងនុយក្លេអ៊ែរកូរ៉េខាងជើង។ នេះក៏ដោយសារលោកត្រាំញញើតចិនដែលជាខ្នងបង្អែកដ៏មាំរបស់កូរ៉េខាងជើង។ អ៊ីចឹងហើយបានជាលោកត្រាំបានសរសេរនៅក្នុងបណ្តាញសង្គម Tweeter ថា លោកមានជំនឿទុកចិត្តថា ចិនពិតជាដោះស្រាយរឿងនុយក្លេអ៊ែរកូរ៉េខាងជើងនេះបានល្អណាស់ មុននឹងបន្ថែមជាថ្មីថា បើចិនមិនរវីរវល់ អាមេរិកនឹងចាត់វិធានការជាមួយសម្ព័ន្ធមិត្តរបស់ខ្លួន។
បើសង្រ្គាមនៅឧបទ្វីបកូរ៉េផ្ទុះឡើង តើអ្នកណាខាត និងអ្នកណាចំណេញ?
បើពិនិត្យជាទូទៅ អត់មានអ្នកចំណេញទេ គឺមានតែអ្នកខាត ហើយអ្នកខាតពិតប្រាកដមិនមែនកូរ៉េខាងជើងទេ តែមហាអំណាចអាមេរិក និងមហាយ័ក្សចិន ព្រោះថាចង់ ឬមិនចង់ចង់ បញ្ហានុយក្លេអ៊ែរកូរ៉េខាងជើងបាននិងកំពុងធ្វើឲ្យអាមេរិក និងចិនប្រឈមមុខដាក់គ្នាដោយប្រយោល។ វ៉ាស៊ីតោនបានយល់ច្បាស់ណាស់ថា ខ្លួនពិតជាមិនអាចដោះស្រាយបញ្ហានុយក្លេអ៊ែរខាងជើងដោយគ្មានជំនួយពីចិនបានទេ ហើយក៏មិនអាចប្រើកម្លាំងបាយជាឯកតោភាគីបានដែរ។ រីឯប៉េកាំងក៏យល់ច្បាស់ថា មានតែខ្លួនទេដែលអាចនិយាយជាមួយកូរ៉េខាងជើងបាន ហើយគឺមានតែខ្លួនម្នាក់គត់ដែលកូរ៉េខាងជើងស្តាប់។
តែនៅចំពោះមុខ គេសង្កេតឃើញមានតែការដំឡើងសាច់ដុំដាក់គ្នា រួមទាំងការវាយប្រហារគ្នាដោយសង្រ្គាមពាក្យសម្តីរវាងអាមេរិក និងចិន រួមទាំងរវាងកូរ៉េខាងជើង និងអាមេរិក។ នៅក្នុងសេចក្តីជូនដំណឹងមួយ ក្រសួងការបរទេសកូរ៉េខាងជើងបានយល់ឃើញថា អាមេរិកកំពុងលូកដៃចូលក្នុងឧបទ្វីបកូរ៉េដែលជាចំណុចក្តៅមួយនៃពិភពលោកនាំឲ្យមានការផ្ទុះសង្រ្គាមនុយក្លែអ៊ែរគំរាមកំហែងសន្តិភាព និងសន្តិសុខនៅក្នុងពិភពលោក។ រីឯចិនវិញ លោកប្រមុខការទូតវ៉ាង យីបានព្រមានត្រង់ៗថា សង្រ្គាមនៅឧបទ្វីបកូរ៉េអាចនឹងផ្ទុះឡើងគ្រប់ពេល និងថា នរណាក៏ដោយដែលបញ្ឆេះសង្រ្គាមនេះ នឹងទទួលខុសត្រូវនូវចំពោះមុខប្រវត្តិសាស្រ្ត។
ដោយមិនបាននិយាយចំៗលើការព្រមានរបស់លោកដូណាល់ ត្រាំ លោកវ៉ាង យីបានព្រមានបកវិញដោយបញ្ឈិតបញ្ឈៀងថា បើសង្រ្គាមផ្ទុះនៅឧបទ្វីបកូរ៉េមែន នោះគ្មាននរណាម្នាក់អាចទាយទុកពីលទ្ធផល ហើយក៏គ្មាននរណាម្នាក់ឈ្នះនៅក្នុងសង្រ្គាមនោះដែរ។ យ៉ាងណាក៏ដោយ លោកវ៉ាង យីបានបញ្ជាក់ថា ចិនដែលគ្រប់គ្នាចាត់ទុកជាសម្ព័ន្ធមិត្តរបស់ក្រុងព្យុងយ៉ាងតែងប្រឆាំងជានិច្ចនឹងកម្មវិធីនុយក្លេអ៊ែរដែលមានគោលដៅយោធារបស់កូរ៉េខាងជើង និងថា គ្រប់ភាគីពាក់ព័ន្ធនឹងសំណុំរឿងនេះគួរតែមានភាពអត់ធ្មត់ និងបន្តដោះស្រាយដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ