អាមេរិកប្រាប់កូរ៉េខាងជើងថាកុំចង់សាកអោយសោះជាមួយនឹងការប្តេជ្ញាចិត្តរបស់លោក Donald Trump
អនុប្រធានាធិបតីអាមេរិកលោក Mike Pence នៅព្រឹកថ្ងៃចន្ទទី១៧មេសានេះបានព្រមានប្រាប់កូរ៉េខាងជើងថាកុំចង់សាកឲ្យសោះនឹងការប្តេជ្ញាចិត្តរបស់លោកប្រធានាធិបតី Trump ថ្វីត្បិតតែព្យុងយ៉ាងមានកម្មវិធីមីស៊ីលអន្តរទ្វីបនិងនុយក្លេអ៊ែរក៏ដោយក្តី!!។ ជាសេចក្តីថ្លែងមួយនៅពេលដែលលោក Pence បានអញ្ជើញទៅដល់ក្បែរតំបន់ព្រំដែនរវាងកូរ៉េខាងត្បូង និងកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
នៅឱកាសសន្និសីទសាព័តមានមួយនៅទីក្រុងសេអ៊ូលក្នុងប្រទេសកូរ៉េខាងត្បូង អនុប្រធានាធិបតីអាមេរិកលោក Mike Pence បានព្រមានប្រាប់កូរ៉េខាងជើងនៅថ្ងៃចន្ទនេះថា កុំចង់សាកអោយសោះនឹងការប្តេជ្ញាចិត្តរបស់លោកប្រធានាធិបតីដូណាល់ Trump ពីព្រោះនយោបាយអាមេរិកសព្វថ្ងៃវាខ្លាំងជាងមុន។ អនុប្រធានាធិបតីអាមេរិក បានគូសបញ្ជាក់ទៀតថា កាលពី អំឡុង ២សប្តាហ៍កន្លងទៅនេះ ពិភពលោកក៏បានឃើញផ្ទាល់នឹងភ្នែកស្រាប់នូវឥទ្ធិពលនិងការប្តេជ្ញាចិត្តរបស់ប្រធានាធិបតីអាមេរិកថ្មីជាអាទិ៍នៅក្នុងប្រតិបត្តិការណ៍នានាដែលបានធ្វើឡើងនៅស៊ីរីនិងអាហ្វហ្កានីស្ថាន។
សេចក្តីថ្លែងរបស់លោក Pence គឺចង់សំដៅទៅលើការវាយប្រហារដ៏ខ្លាំងក្លារបស់អាមេរិកប្រឆាំងនឹងមូលដ្ឋានអាកាសចរណ៍នានារបស់របបស៊ីរីនិងការទម្លាក់ មេគ្រាប់បែកប្រឆាំងនឹងពួកជីហាតអ៊ីស្លាមនៅអាហ្វហ្កានីស្ថាន។
គួររំលឹកថា លោក Donald Trump ធ្លាប់បានសន្យាកាលពីថ្ងៃព្រហស្បតិ៍មុនថានឹងលោកដោះស្រាយបញ្ហាកូរ៉េខាងជើង ហើយលោកក៏ធ្លាប់បានជូនដំណឺងអំពីការបញ្ជូននាវាផ្ទុកយន្តហោះ Carl Vison ដែលអមដំណើរដោយនាវាបាញ់មីស៊ីល៣គ្រឿង ហើយបន្ទាប់មកទៀត លោកក៏បានរំលឹកដែរពីនាវា Armada មួយគ្រឿងដែលមានទាំងនាវាមុជទឹកផង។
ជាបន្ទាន់ភ្លាមនោះ ថ្នាក់ដឹកនាំជាន់ខ្ពស់លេខពីររបស់កូរ៉េខាងជើងវិញ បានប្រតិកម្មតបតអាមេរិកវិញកាលពីថ្ងៃសៅរ៍មុនដោយបានអះអាងថាកូរ៉េខាងជើងបានត្រៀមខ្លួនជាស្រេចដែរដើម្បីវាយប្រហារតបតនឹងសង្គ្រាមគ្រប់ប្រភេទ។
សូមបញ្ជាក់ថាអនុប្រធានាធិបតីអាមេរិក បានអញ្ជើញទៅដល់កូរ៉េខាងត្បូងកាលពីថ្ងៃអាទិត្យម្សិលមិញនិងអញ្ជើញទៅកាន់តំបន់ព្រំដែនអន្តរកូរ៉េនៅពេលព្រឹកមិញនេះ។ នៅទីនោះ ហើយ ដែល លោក Pence បានថ្លែងបញ្ជាក់ថា អាមេរិកលែងមាននយោបាយអំណត់អត់ធ្មត់ទៀតឡើយនៅចំពោះមុខរបបព្យុងយ៉ាង ហើយអាមេរិកក៏នឹងប្រឆាំងឲ្យអស់រាល់ការវាយប្រហារនានានិងតបតវិញ ប្រកបដោយប្រសិទ្ធិភាពរាល់ការប្រើប្រាស់អាវុធធម្មតាឬក៏អាវុធនុយក្លេអ៊ែរ។ លើសពីនោះលោក Mike Pence ថែមទាំងបានអំពាវនាវសហគមន៍អន្តរជាតិ ឲ្យបង្កើនការគាបសង្កត់ទៅលើកូរ៉េខាងជើងឲ្យកាន់តែខ្លាំងថែមទៀត។
នៅប្រទេសជប៉ុនវិញ នាយករដ្ឋមន្ត្រីជប៉ុន លោក Shinzo Abe បានអំពាវនៅថ្ងៃចន្ទនេះដែរសុំឲ្យកូរ៉េខាងជើងធ្វើការ អត់ធ្មត់និងចៀសវៀងការករឿងបង្កហេតុនានាថ្មីៗទៀត ដោយគោរពទៅតាមសេចក្តីសម្រេចរបស់អង្គការសហប្រជាជាតិក៏ព្រមទាំងបោះបង់ចោលដែរនូវកម្មវិធីមីស៊ីលនុយក្លេអ៊ែរកូរ៉េខាងជើងមួយថ្ងៃបន្ទាប់ពីរបបព្យុងយ៉ាងបានបាញ់សាកល្បងមីស៊ីលមិនបានជោគជ័យនៅថ្ងៃអាទិត្យម្សិលមិញមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ