ឥណ្ឌូណេស៊ី ៖ អភិបាលក្រុងហ្សាការតាផុតអាណត្តិកាន់សាសនាគ្រិស្តចាញ់ឆ្នោតទល់នឹងគូប្រជែងអ្នកអ៊ីស្លាម
លោក បាស៊ូគី យ៉ាហាយ៉ា ពូណាម៉ា ហៅ លោក អាហុក អភិបាលក្រុងហ្សាការតាផុតអាណត្តិ អ្នកកាន់គ្រិស្តសាសនា ដែលជាប់រឿងអាស្រូវនៅតុលាការ ពីបទបានជេរសាសនាអ៊ីស្លាម បានចាញ់ឆ្នោតជាស្ថាពរ នៅក្នុងការបោះឆ្នោតជ្រើសរើសអភិបាលក្រុងជុំទីពីរនៅថ្ងៃពុធនេះ ដោយបានទទួលសំឡេងគាំទ្រ តែ៤២% ទល់នឹង៥៨%សម្រាប់បេក្ខជនជាគូប្រជែង លោក អានី បាស្វេដាន Anies Baswedan កាន់សាសនាអ៊ីស្លាម និងជាអតីតរដ្ឋមន្ត្រីក្រសួងអប់រំ។ នេះបើតាមលទ្ធផលបណ្តោះអាសន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លទ្ធផលផ្លូវការនឹងត្រូវប្រកាសនៅដើមខែឧសភា ! ហេតុដូច្នេះហើយបានជា លោក អានី បាស្វេដាន មិនទាន់បង្ហាញអំណរនឹងជោគជ័យថ្ងៃនេះទេ។ ប៉ុន្តែបេក្ខជន លោក អាហុក អភិបាលក្រុងផុតអាណត្តិដែលធ្លាប់មានប្រជាប្រិយភាពខ្លាំងកន្លងមក បានព្រលយមាត់ទទួលស្គាល់បរាជ័យហើយ។
កាលពីនៅជុំទីមួយ លោក បាស៊ូគី យ៉ាហាយ៉ា ពូណាម៉ា ហៅលោក អាហុក ដើមកំណើតចិន កាន់សាសនាគ្រិស្ត បានឈ្នះឆ្នោតនាំមុខគេ ក្នុងសំឡេង៤៣% ទល់នឹងបេក្ខជន អានី បាស្វេដាន កាន់សាសនាអ៊ីស្លាម ៤០% និងបេក្ខជនអាហ្គូ យូដូយូណូ កាន់សាសនាអ៊ីស្លាមដែរ ១៧%។ ប៉ុន្តែនៅក្នុងការបោះឆ្នោតជុំទីពីរ ដែលជាជុំផ្តាច់ព័ត្រ លោក អាហុក បែរជាត្រូវចាញ់ដាច់ យ៉ាងដំណំទៅវិញ។
ទោះមានស្នាដៃការងារល្អ បានប្រយុទ្ធប្រឆាំងនឹងអំពើពុករលួយ ក្នុងវិស័យសាធារណៈ និងបានធ្វើកំណែទម្រង់ជាច្រើនសម្រាប់ក្រុងហ្សាការតាក្តី ក៏លោក បាស៊ូគី យ៉ាហាយ៉ា ពូណាម៉ា អភិបាលក្រុងផុតអាណត្តិមិនកាន់សាសនាអ៊ីស្លាមដំបូងគេរូបនេះ មិនអាចធន់នឹងចរន្តគាំទ្រសាសនា ក្នុងប្រទេសដែលមានប្រជាជនកាន់សាសនាអ៊ីស្លាម (២២៥លាននាក់) ច្រើនជាងគេនៅលើពិភពលោកបានឡើយ។
ការបោះឆ្នោតដែលបានប្រព្រឹត្តទៅក្នុងបរិបទតានតឹងសាសនាបំផុត ព្រោះបានរំលេចឱ្យឃើញឥទ្ធិពលរបស់អ្នកអភិរក្សនិងចរន្តជ្រុលនិយមអ៊ីស្លាម ដែលចេះឆ្លៀតឱកាសប្រើសាសនាជាប្រយោជន៍នយោបាយ។ បាតុកម្មជាច្រើន បានរៀបចំឡើងជាទ្រង់ទ្រាយធំ ប្រឆាំងនឹងបេក្ខជនអភិបាលក្រុងអ្នកគ្រិស្តសាសនា ដោយចោទប្រកាន់ថាបានប្រមាថអ៊ីស្លាម។
ក្នុងថ្ងៃបោះឆ្នោត នៅក្រុងហ្សាការតាថ្ងៃពុធនេះដែលមានពលរដ្ឋចូលរួមជាង ៧លាននាក់បន្តិច រដ្ឋាភិបាលបានពង្រាយកម្លាំងជាង៦ម៉ឺននាក់ ដើម្បីការពារសន្តិសុខនិងសណ្តាប់ធ្នាប់ ក្រែងមានការជ្រុលជ្រួលអ្វីកើតឡើង។
ការបោះឆ្នោតនេះ ក៏ជាសង្វៀងប្រកួតចរន្តនយោបាយជាតិដែរ ព្រោះ អភិបាលក្រុងហ្សាការតា ជាតួនាទីដ៏មានឥទ្ធិពលនិងជាទម្រនាំឆ្ពោះទៅដល់ការបោះឆ្នោតប្រធានាធិបតីឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ