កូរ៉េខាងជើងគំរាមពន្លិចនាវាផ្ទុកយន្តហោះCarl Vinson របស់អាមេរិក
ថ្ងៃអាទិត្យនេះ កូរ៉េខាងជើងបានប្រកាសគំរាមពន្លិចនាវាផ្ទុកយន្តហោះ Carl Vinson របស់អាមេរិក។ ស្ថានការណ៍នៅឧបទ្វីបកូរ៉េកំពុងតានតឹង ខណៈនាវាចម្បាំងជប៉ុន២គ្រឿងកំពុងធ្វើសមយុទ្ធជាមួយទាហានអាមេរិក នៅប៉ាស៊ីហ្វិក មិនឆ្ងាយពីឧបទ្វីបកូរ៉េ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២១
សារព័ត៌មានរដ្ឋាភិបាលកូរ៉េខាងជើងបានចុះផ្សាយថ្ងៃអាទិត្យនេះ នូវពាក្យពេចន៍គំរាមរបស់ក្រុងព្យុងយ៉ាង គំរាមពន្លិចនាវាផ្ទុកយន្តហោះអាមេរិកCarl Vinson។ សារព័ត៌មានចុះផ្សាយថា ទាហានកូរ៉េខាងជើងវាយប្រហារតែមួយលើកប៉ុណ្ណោះ ដើម្បីពន្លិចនាវាCarl Vinson របស់អាមេរិក។ ក្រុងព្យុងយ៉ាងចង់បង្ហាញតាមរយៈការកំទេចនាវាអាមេរិក ពីអានុភាពកងទ័ពកូរ៉េខាងជើង។
២សប្តាហ៍មុននេះ លោកដូណាល់ ត្រាំ បានបញ្ជាអោយនាវា Carl Vinson ធ្វើដំណើរឆ្ពោះទៅឧបទ្វីបកូរ៉េ។ នាវាផ្ទុកយន្តហោះអាមេរិកអាចនឹងមកដល់ឧបទ្វីបកូរ៉េ នៅថ្ងៃអង្គារខានស្អែក គឺចំនឹងថ្ងៃខួបនៃការបង្កើតកងទ័ពកូរ៉េខាងជើងតែម្តង។ ម្សិលមិញនេះដែរ អនុប្រធានាធិបតីអាមេរិកប្រាប់ថា នាវានេះអាចនឹងចូលទៅសមុទ្រជប៉ុន យ៉ាងយូរចុងខែមេសានេះ។ ពេលនេះ នាវា Carl Vinson កំពុងធ្វើសមយុទ្ធជាមួយនាវាចម្បាំងជប៉ុន២គ្រឿង នៅប៉ាស៊ីហ្វិក បើតាមដឺងប្រហែលនៅមិនឆ្ងាយពីឧបទ្វីបកូរ៉េប៉ុន្មានទេ។
ស្ថានការណ៍ពេលនេះកាន់តែតានតឹង។ ចិនបានប្រមូលកម្លាំងយោធាតាមព្រំដែនជាប់កូរ៉េខាងជើង តែរដ្ឋាភិបាលចិនប្រាប់ថា នេះគ្រាន់តែជាការហាត់សមធម្មតាប៉ុណ្ណោះ។ ពលរដ្ឋនៅភាគខាងកើតរុស្ស៊ីវិញក៏បានសង្កេតឃើញមានក្បួនដឺកសម្ភារយោធាធឆ្ពោះទៅព្រំដែនកូរ៉េខាងជើងដែរ។
គេបារម្ភថា ថ្ងៃអង្គារខានស្អែក ជាថ្ងៃខួបនៃការបង្កើតទ័ពកូរ៉េខាងជើង កូរ៉េខាងជើងអាចនឹងបាញ់មីស៊ីល រឺក៏សាកល្បងនុយក្លេអ៊ែរជាលើកទី៦បាន។ តំណាងរាស្ត្របក្សកាន់ អំណាចនៅជប៉ុន បានស្នើអោយនាយករដ្ឋមន្ត្រី ស្ហ៊ីនហ្សូ អាបេត្រៀមអាវុធ ករណីមានការបាញ់មីស៊ីលពីក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ