លោកដូណាល់ ត្រាំត្រៀមជួបលោកគីមជុងអ៊ុន បើមានលក្ខខណ្ឌគ្រប់គ្រាន់
សហគមន៍អន្តរជាតិ កំពុងបន្តព្រួយបារម្ភចំពោះការគំរាមកំហែងនុយក្លេអែរកូរ៉េខាងជើង ! កូរ៉េខាងជើង បន្តដំឡើងឥតឈប់មកទល់ថ្ងៃនេះអង្គារនេះ ថាឧបទ្វីបបានមកដល់មាត់ជ្រោះនៃសង្គ្រាមនុយក្លែរ។ លោក ដូណាល់ ត្រាំ ដែលធ្លាប់ស្រែកគំរាមប្រើកម្លាំងយោធា និងទន្ទេញពាក្យដដែលៗថាអាចប្រើគ្រប់វិធីប្រឆាំងនឹងរបបព្យុងយ៉ាង បើហ៊ានសាកល្បងនុយក្លេអ៊ែរជាលើកទី៦ ប៉ុន្តែនៅនៅល្ងាចមិញ លោកប្រធានាធិបតីអាមេរិកបែរជាអះអាងថាត្រៀមខ្លួនជាស្រេចនឹងជួបជាមួយប្រមុខដឹកនាំកូរ៉េខាងជើង គីម ជុនអ៊ុន ប្រសិនបើមានលក្ខខណ្ឌគ្រប់គ្រាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោក ដូណាល់ ត្រាំ មិនដែលលាក់បាំងអារម្មណ៍កោតសរសើរមេដឹកនាំរបបបែបផ្តាច់ការទេ ! លោកប្រធានាធិបតីអាមេរិកធ្លាប់បានសរសើរសមភាគីតួកគី លោក អែកដូហ្កាន ពេលឈ្នះឆ្នោតប្រជាមតិកាលពីខែមុន។ លោកបានអញ្ជើញប្រធានាធិបតីហ្វីលីពីន ឌុយទែរតេ ឱ្យទៅទស្សនាសេតវិមាន ហើយនៅថ្ងៃចន្ទទី១ឧសភាម្សិលមិញ លោកត្រាំ បានប្រកាសថាលោកមានកត្តិយសនឹងជួបប្រមុខដឹកនាំកូរ៉េខាងជើង គីម ជុងអ៊ុន។ សម្រាប់លោកត្រាំ គីម ជុងអ៊ុន ជាមនុស្សខិលឆ្លាតខ្លាំងណាស់ ! លោកត្រាំបានត្រៀមខ្លួនជាស្រេចហើយ តែជំនួបនេះអាចប្រព្រឹត្តទៅបានដរាបណា មានលក្ខខណ្ឌសមស្របនិងគ្រប់គ្រាន់។
តើអ្វីជាលក្ខខណ្ឌសមស្របដែលជំរុញឱ្យលោក ដូណាល់ ត្រាំ សុខចិត្តជួបលោក គីម ជុងអ៊ុន ប្រមុខដឹកនាំក្មេងខ្ចីកូរ៉េខាងជើង ដែលមិនធ្លាប់ជួបប្រមុខដឹកនាំបរទេសណាម្នាក់សោះ តាំងពីឡើងកាន់តំណែងបន្តពីឪពុកនៅឆ្នាំ២០១១មក ? លោក ដូណាល់ ត្រាំ មិនបានបញ្ជាក់លំអិតអំពីលក្ខខណ្ឌទាំងនោះឡើយ។ ហើយលក្ខខណ្ឌពេលនេះមិនទាន់គ្រប់គ្រាន់ឡើយ។ នេះបើតាមការអះអាងរបស់អ្នកនាំពាក្យសេតវិមាន ដែលបានត្រឹមទទួលស្គាល់ ថាសម្មតិកម្ម លោកត្រាំជួបលោកគីមជុងអ៊ុន នៅឆ្ងាយណាស់។
ការបង្ហើបចេតនារបស់ប្រធានាធិបតីអាមេរិកចង់ជួបប្រមុខដឹកនាំកូរ៉េខាងជើងជាលើកទីមួយនេះ ធ្លាក់មកជួនចំពេលដែលសម្ពាធក្នុងឧបទ្វីបកាន់តែតានតឹងខ្លាំង ដោយហេតុតែអាមេរិកជប៉ុននិងកូរ៉េខាងត្បូង កំពុងបើកសមយុទ្ធថ្មីមួយទៀត ក្នុងក្របខណ្ឌការពារទល់នឹងទង្វើផ្គើនរបស់ព្យុងយ៉ាង។ ក្នុងប្រតិបត្តិការនេះ យន្តហោះទម្លាក់គ្រាប់បែកហោះ លឿនជាងសំឡេង B-1B ពីរគ្រឿងបានចាកចេញពីកោះGuam អាមេរិកទៅចូលរួមសមយុទ្ធជាមយយនឹងកងយន្តហោះចម្បាំងជប៉ុននិងកូរ៉េខាងត្បូង ក្នុងសមុទ្ទជប៉ុន មិនឆ្ងាយប៉ុន្មានពីឧបទ្វីបកូរ៉េ។ ហេតុដូច្នេះហើយបានជា កូរ៉េខាងជើងថ្កោលទោសថាអាមេរិកកំពុងត្រៀមវាយប្រហារនុយក្លេអ៊ែរលើខ្លួនជាកិច្ចការពារ និងអាចរុញច្រានឧបទ្វីបឱ្យធ្លាក់ក្នុងជ្រោះសង្គ្រាមនុយក្លេអ៊ែរបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ