តើការបាញ់សាកល្បងអាវុធមីស៊ីលឆ្លងទ្វីបរបស់សហរដ្ឋអាមេរិកជាសារព្រមានដល់កូរ៉េខាងជើង
ចុះផ្សាយនៅថ្ងៃ៖
ស្តាប់ - ០៤:១១
កងទ័ពអាកាសអាមេរិកបានបាញ់សាកល្បងអាវុធមីស៊ីលបាលីស្ទីបឆ្លងទ្វីប (ICBM) កាលពីថ្ងៃពុធ៍ ទី៣ ឧសភាកន្លងទៅនេះ។ អាវុធមានឈ្មោះថា Minuteman III នេះត្រូវបានបាញ់ចេញពីមូលដ្ឋានយោធាអាមេរិកមួយកន្លែងនៅរដ្ឋកាលីហ្វ័រញ៉ា មុននឹងធ្លាក់នៅលើកូនកោះមួយក្នុងមហាសមុទ្រប៉ាស៊ីហ្វិក។ តើការបាញ់សាកល្បងនេះជាសារព្រមានដល់ប្រទេសកូរ៉េខាងជើង? សព្វថ្ងៃនេះ តើរបបដឹកនាំកូរ៉េខាងជើងមានអាវុធមីស៊ីលប៉ុន្មានដើម?
មីស៊ីលឆ្លងទ្វីបមានឈ្មោះថា Minuteman III ត្រូវបានបាញ់កាលពីព្រឹកព្រលឹមស្រាងៗ។ មីស៊ីលបាញ់សាកល្បងនេះពុំត្រូវបានបំពាក់ក្បាលគ្រាប់បំផ្ទុះឡើយ។ ដោយបានបាញ់ចេញពីមូលដ្ឋានយោធាទ័ពអាកាស Vandenberg ដែលស្ថិតក្នុងរដ្ឋកាលីហ្វ័រញ៉ា មីស៊ីលឆ្លងទ្វីបនេះបានហោះហើររយៈចម្ងាយ ៦ ៧០០ គីឡូម៉ែត្រ។
មីស៊ីលរយៈចម្ងាយឆ្ងាយនេះបានធ្លាក់ចំគោលដៅដូចការគ្រោងទុក ពោលគឺនៅលើកូនកោះមួយក្នុងមហាសមុទ្រប៉ាស៊ីហ្វិក ដែលជាផែ្នកមួយនៃបណ្តុំកោះនៃប្រទេស Marshall។ ប្រទេសកូនកោះមួយនេះត្រូវបានគេប្រៀបប្រដូចនឹងដែនដីអាមេរិកនៅឯនាយសមុទ្រមួយអញ្ចឹង។ នៅទីនោះ សហរដ្ឋអាមេរិកបានបោះមូលដ្ឋានទ័ពមួយ សំរាប់ធ្វើការពិសោធន៍បាញ់សាកល្បងអាវុធមីស៊ីលបាលីស្ទិក។
លោក Joe Thomas អុ្នកនាំពាក្យរបស់បញ្ជាការដ្ឋានប្រតិបត្តិការទ័ពអាកាសអាមេរិកបានថ្លែងប្រាប់ទីភ្នាក់ងារសារព័ត៌មាន AFP ថា ការបាញ់សាកល្បងនេះជាសកម្មភាពតាមទម្លាប់ធម្មតាដូចសព្វដង។ សំរាប់អាវុធមីស៊ីលបាលីស្ទិកប្រភេទនេះ អាមេរិកតែងបាញ់សាកល្បងចំនួន ៤ ដងក្នុងមួយឆ្នាំ។ ហើយការបាញ់នេះ វាមិនមែនជាសារព្រមានអ្វីឡើយដល់ប្រទេសកូរ៉េខាងជើង។ បើយោងតាមសេចក្តីប្រកាសព័ត៌មានរបស់បញ្ជាការដ្ឋានប្រតិបត្តិការទ័ពអាកាសអាមេរិកបានឲ្យដឹងថា កាបាញ់សាកល្បងនេះ គឺក្នុងគោលបំណងប្រមូលទិន្នន័យបន្ថែមទៀតជុំវិញការតម្រង់ចំគោលដៅ និងផ្ទៀងផ្ទាត់ដំណើរឲ្យបានច្បាស់លាស់នូវប្រព័ន្ធមីស៊ីលឆ្លងទ្វីបនេះ។
ហើយមីស៊ីល Minuteman III នេះត្រូវបានគេសង្ស័យថាអាចមានសមត្ថភាពអាចបំពាក់ក្បាលគ្រាប់ប្រភេទនុយក្លេអ៊ែរផងដែរ។ លើសពីនេះ មីស៊ីលប្រភេទនេះនឹងត្រូវយកទៅប្រើប្រាស់ដើម្បីទប់ស្កាត់ការគំរាមកំហែងនុយក្លេអ៊ែរពីបណ្តាប្រទេសដ៏ទៃ ដែលចង់គំរាមកំហែងដល់សន្តិសុខជាតិអាមេរិកក៏ដូចជាសម្ព័ន្ធមិត្តរបស់ខ្លួន។ ប៉ុន្តែ ការបាញ់សាកល្បងនេះគាប់ជួនពេលដែលភាពតានតឹងកំពុងតែកើនឡើងឥតឈប់ឈរនៅជ្រោយឧបទ្វីបកូរ៉េ។
បច្ចុប្បន្ននេះ តាមរយៈកម្មវិធីអាវុធនុយក្លេអ៊ែរ និងមីស៊ីលបាលីស្ទិក របបដឹកនាំកូរ៉េខាងជើងកំពុងតែផ្គើនសហគមន៍អន្តរជាតិ ជាពិសេសសហរដ្ឋអាមេរិក និងកូរ៉េខាងត្បូង។
បើទោះបីជាកំពុងតែស្ថិតក្រោមគំនាបទណ្ឌកម្មអង្គការសហប្រជាជាតិក៏ដោយ ប៉ុន្តែរបបដឹកនាំកុំម្មុយនីស្តក្រុងព្យុងយ៉ាងនៅចចែសមិនបោះបង់ចោលកម្មវិធីផលិតប្រល័យលោករបស់ខ្លួនឡើយ។ ម្តងហើយម្តងទៀត មេដឹកនាំផ្តាច់ការវ័យក្មេង គឹម ជុងអ៊ុន ថែមទាំងបានបាញ់សាកល្បងអាវុធនុយក្លេអ៊ែរ និងមីស៊ីលបាលីស្ទិកទៀតផង។
បើតាមទិន្នន័យរបស់ចារកម្មកូរ៉េខាងត្បូងបានឲ្យដឹងថា កូរ៉េខាងជើងនៅតែបន្តកម្មវិធីនុយក្លេអ៊ែរយ៉ាងសកម្ម។ ហើយរបបដឹកនាំផ្តាច់ការនេះមានសមត្ថភាពអាចចម្រើនសារជាតិអ៊ុយរ៉ាញោម និង អាចផលិតសារជាតិភ្លុយតូញោមសំរាប់ផលប្រយោធន៍យោធា។ គិតមកដល់ពេលនេះ កូរ៉េខាងជើងបានបាញ់សាកល្បងអាវុធនុយក្លេអ៊ែរក្រោមដីចំនួន ៥ ដង។ គ្រាន់តែក្នុងឆ្នាំ២០១៦ របបដឹកនាំនេះបានបាញ់សាកល្បងចំនួន ២ ដង។
ក្រុមអ្នកជំនាញបានសង្ស័យថា សព្វថ្ងៃនេះ កូរ៉េខាងជើងមានសម្ភារៈគ្រប់គ្រាន់អាចផលិតអាវុធនុយក្លេអ៊ែរចំនួនប្រមាណ ១៥ ដើម។ ទន្ទឹមគ្នានោះផងដែរ កូរ៉េខាងជើងមានអាវុធមីស៊ីលជាច្រើនប្រភេទនៅក្នុងដៃ។ ទីមួយ គឺមានមីស៊ីលរយៈចម្ងាយជិតចំនួន ៧០០ ដើម។ អាវុធនេះអាចហោះបានចម្ងាយ ៣០០ គម។ ទីពីរ គឺមានមីស៊ីលរយៈចម្ងាយមធ្យមចំនួន ២០០ ដើម។ អាវុធប្រភេទនេះអាចហោះបានចម្ងាយ១៣០០ គម។ ទីបី គឺមានមីស៊ីលរយៈចម្ងាយមធ្យមល្មមចំនួនជាង ១០០ ដើម។ មីស៊ីលនេះមានសមត្ថភាពហោះបានចម្ងាយ ៣៥០០ គម។
ហើយគេសង្ស័យផងដែរថា កូរ៉េខាងជើងក៏កំពុងផលិតអាវុធមីស៊ីលឆ្លងទ្វីប ដែលអាចហោះបានរយៈចម្ងាយ ៦៧០០ គម។ សូមបញ្ជាក់ថា មីស៊ីលបាលីស្ទិកចម្ងាយឆ្ងាយនេះអាចហោះទៅដល់ទឹកដីអាមេរិក។ ប៉ុន្តែ គិតមកដល់ពេលនេះ កូរ៉េខាងជើងមិនទាន់បានបាញ់សាកល្បងមីស៊ីលរយៈចម្ងាយនេះនៅឡើយទេ។ បន្ថែមពីនេះ គេក៏សង្ស័យផងដែរថា កូរ៉េខាងជើងក៏អាចមានអាវុធគីមី និងអាវុធជីវសាស្រ្តផងដែរ។
កាលពីថ្ងៃព្រហ្បត្តិ ទី៤ ឧសភាកន្លងទៅនេះ សភាតំណាងរាស្រ្ត (ឬសភាជាន់ទាប)អាមេរិកបានអនុម័តច្បាប់មួយដើម្បីដាក់ទណ្ឌកម្មបន្ថែមទៀតដល់ប្រទេសកូរ៉េខាងជើង។ ទណ្ឌកម្មថ្មីនេះត្រូវបានអនុម័តស្ទើរតែស្រុងដោយតំណាងរាស្រ្តរបស់គណបក្សសាធារណរដ្ឋ និងប្រជាធិបតេយ្យ។ ច្បាប់នេះមានគោលដៅកាត់ផ្តាច់ប្រភពចំណូលថវិការពីបរទេស ដែលអាចជួយទ្រទ្រង់របបដឹកនាំក្រុងព្យុងយ៉ាង។ ច្បាប់នេះនឹងត្រូវយកទៅពិភាក្សាបន្តដើម្បីឲ្យព្រឹទ្ធសភា (ឬសភាជាន់ខ្ពស់) អនុម័តបន្ត។
ក្នុងន័យពង្រឹងការអនុវត្តន៍ទណ្ឌកម្មអង្គការសហប្រជាជាតិ ច្បាប់នេះហាមឃាត់មិនឲ្យកប៉ាល់កូរ៉េខាងជើងធ្វើដំណើរក្នុងដែនសមុទ្រអាមេរិក ឬចូលចតក្នុងកំពុងផែអាមេរិក។ ហើយច្បាប់នេះក៏ហាមផងដែរដល់កប៉ាល់របស់បណ្តាប្រទេស ឬបុគ្គលណាដែលរកស៊ីជំនួញជាមួយនឹងរបបដឹកនាំកូរ៉េខាងជើង។ ចំណែកទំនិញនាំចូលសហរដ្ឋអាមេរិកដែលប្រើប្រាស់កំលាំងពលកម្មមនុស្សដោយបង្ខំ ជាពិសេសគឺ ពលករកូរ៉េខាងជើងក៏នឹងត្រូវហាមឃាត់ផងដែរ។ និយាយរួម ច្បាប់នេះមានគោលដៅកាត់ផ្តាច់ដង្ហើមសេដ្ឋកិច្ចកូរ៉េខាងជើងដោយមិនឲ្យរបបដឹកនាំប្រទេសនេះមានលទ្ធភាពធ្វើនាវាចរណ៍ពាណិជ្ជកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ