ក្រុមប្រទេស G7 ចៀសវាងប្រធានបទរស៊ើបខ្លាំងនៅក្នុងកិច្ចប្រជុំនៅអ៊ីតាលី
រដ្ឋមន្ត្រីក្រសួងហិរញ្ញវត្ថុរបស់ក្រុមប្រទេសG7 ដែលរួមប្រជុំគ្នានៅថ្ងៃសុក្រនិងថ្ងៃសៅរ៍ស្អែកនៅប្រទេសអ៊ីតាលី សុខចិត្តចៀសវាងមិនលើកយកបញ្ហាណាដែលមានលក្ខណៈដ៏រស៊ើបខ្លាំង ដាក់នៅក្នុងរបៀបវារៈនៃកិច្ចពិភាក្សារបស់ខ្លួនឡើយ។ ក៏ប៉ុន្តែបានលើកយកបញ្ហាសន្តិសុខអ៊ីនធ័តនែតឬក៏ការប្រយុទ្ធប្រឆាំងទប់ស្កាត់នឹងហិរញ្ញប្បទានភេរវនិយមវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងប្រជុំរបស់បណ្តារដ្ឋមន្រ្តិក្រសួងហិរញ្ញវត្ថុនៃក្រុមប្រទេស G7 នៅថ្ងៃសុក្រនិងថ្ងៃសៅរ៍ស្អែកក្នុងប្រទេសអ៊ីតាលី បញ្ហាពាណិជ្ជកម្មដោយសេរីឬក៏កិច្ចការពារផលិតផលក្នុងស្រុក គឺពុំមានទេនៅក្នុងរបៀបវារៈនៃកិច្ចប្រជុំនេះដើម្បីចៀសវៀង នូវភាពប្រទូស្តរាយរវាងគ្នា។ នេះគឺជាលើកទីមួយដែរចាប់តាំងពីលោកត្រាំ បានឡើងជាប្រធានាធិបតីអាមេរិកមកដែលកិច្ចប្រជុំរបស់ក្រុមG7 ដែលមានអាមេរិក អាល្លឺម៉ង់ បារាំងអង់គ្លេស អ៊ីតាលីនិងកាណាដា បាន សម្រេចចិត្ត មិនលើកយកបញ្ហាដ៏ចម្រូងចម្រាសមកដាក់នៅក្នុងរបៀបវារៈនៃកិច្ចពិភាក្សាគ្នាទេ។
ក៏ប៉ុន្តែ យោងតាមការថ្លែងបញ្ជាក់របស់មន្ត្រីទទួលខុសត្រូវម្នាក់របស់អាមេរិក បានអោយដឹងថា លោក Steven Mnuchin រដ្ឋមន្ត្រីក្រសួងហិរញ្ញវត្ថុអាមេរិក បានត្រៀមខ្លួនជាស្រេចដែរដើម្បីការពិភាក្សាគ្នានៅលើបញ្ហាដ៏សំខាន់ទាំងពីរខាងលើនេះនៅក្នុងកិច្ចប្រជុំទ្វេភាគី។ រីឯអាជ្ញាធរអ៊ីតាលីវិញ ដែលជាម្ចាស់ផ្ទះទទួលកិច្ចប្រជុំ បានថ្លែងប្រាប់ថា “បញ្ហាបែបដូចនេះ នឹងត្រូវរក្សាទុកសម្រាប់ការពិភាក្សាគ្នានៅក្នុងកិច្ចប្រជុំកំពូលរបស់បណ្តាប្រមុខរដ្ឋនិងរដ្ឋាភិបាលនៃក្រុមប្រទេស G7 ដែលនឹងត្រូវប្រព្រឹត្តទៅនៅចុងខែឧសភាខាងមុខនៅ Sicile តំបន់ស្វ័យត្តអ៊ីតាលី។
ម្យ៉ាងទៀតចំណុចដែលត្រូវបានគេលើកមកពិភាក្សាគ្នានៅក្នុងកិច្ចប្រជុំរបស់រដ្ឋមន្ត្រីក្រសួងហិរញ្ញវត្ថុនៃក្រុមប្រទេស G7 គឺស្ថិតនៅលើបញ្ហាសន្តិសុខអ៊ីនធ័រនែត ឬក៏ការប្រយុទ្ធប្រឆាំងទប់ស្កាត់បណ្តាញហិរញ្ញប្បទានភេរវនិយម។ ប្រធានបទទាំងពីរខាងលើនេះ ត្រូវបានរដ្ឋមន្រ្តីក្រសួងហិរញ្ញវត្ថុរបស់អាមរិកនិងរដ្ឋមន្រ្តីហិរញ្ញវត្ថុអ៊ីតាលី យល់ស្របគ្នាថាជាប្រធានបទយុទ្ធសាស្ត្រមួយនៅនាពេលជួបប្រាស្រ័យគ្នាកាលពីថ្ងៃព្រហ្បតិ៍មុន។
ផ្ទុយទៅវិញ ទាំងរដ្ឋមន្ត្រីក្រសួងហិរញ្ញវត្ថុរបស់អាមេរិកនិងទាំងខាងអ៊ីតាលី ពុំបានលើកពីបញ្ហានៃការកំណត់អត្រាពន្ធទៅលើក្រុមហ៊ុនអន្តរជាតុធំៗដែលជាអ្នករកស៊ីនៅលើបណ្តាញអ៊ីនធ័រនែតឬ Webtax នោះទេ ពីព្រោះយោងតាមថ្នាក់ដឹកនាំជាន់ខ្ពស់ម្នាក់នៃក្រុមប្រទេស G7 វាជាប្រធានបទដ៏រស៊ើបខ្លាំងនិងក៏មិនងាយចប់ឡើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ