ការវាយប្រហារអ៊ីនធ័រនែតដោយកម្មវិធីចាប់ជំរិតទំនងជាស្នាដៃរបស់កូរ៉េខាងជើង
ក្រុមអ្នកស្រាវជ្រាវសន្តិសុខអ៊ីនធ័រនែត បានរកឃើញនូវភស្តុតាងបច្ចេកទេសមួយចំនួន ដែលបង្ហាញថា ការវាយប្រហារតាមអ៊ីនធ័រនែត ដោយប្រើកម្មវិធីចាប់ជំរិត WannaCry អាចមានជាប់ទាក់ទងនឹងកូរ៉េខាងជើង។ ការវាយប្រហារកំរិតពិភពលោក មិនធ្លាប់មាន បានផ្ទុះឡើងកាលពីថ្ងៃសុក្រ ក្នុងប្រមាណ១៥០ប្រទេស រាប់តាំងពីអាមេរិក ម៉ិចស៊ិក ដល់អឺរ៉ុប រុស្ស៊ី និងបណ្តាប្រទេសទ្វីបអាស៊ីជាច្រើនទៀត ដូចជាចិន ជប៉ុន ឥណ្ឌា អូស្ត្រាលី វៀតណាម។ល។ និង។ល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
Neel Nehta អ្នកព័ត៌មានវិទ្យារបស់ក្រុមហ៊ុនGoogle បានបង្ហោះផ្សាយតាមអ៊ីនធ័រនែត លេខកូដព័ត៌មានវិទ្យា ដែលមានលក្ខណៈស្រដៀងគ្នាបំផុតរវាងវីរ៉ុស Wannacry និងកូដវាយប្រហារតាមអ៊ីនធ័រនែតមួយខ្សែផ្សេងទៀតរបស់កូរ៉េខាងជើង។
ហេតុដូច្នេះហើយបានជាក្រុមអ្នកជំនាញផ្តោតការសង្ស័យភ្លាមថា កូរ៉េខាងជើងទំនងនៅពីក្រោយការវាយប្រហារនេះ ប៉ុន្តែអ្នកឯកទេសសន្តិសុខអ៊ីនធ័រនែតមិនទាន់ចេញសេចក្តីសន្និដ្ឋាន សរុបទេ ព្រោះត្រូវការស្រាវជ្រាវស៊ីជម្រៅបន្ថែមទៀតច្រើនសិន។
បើតាមអ្នកជំនាញសន្តិសុខអ៊ីនធ័រនែត Kaspersky របកឃើញរបស់Neel Nehta បានចង្អុលផ្លូវឱ្យអ្នកស្រាវជ្រាវផ្តោតភាពសង្ស័យទៅលើកក្រុមចោរ អ៊ីនធ័រនែតឈ្មោះថា Lazarus ដែលធ្លាប់ធ្វើការវាយប្រហារតាមអ៊ីនធ័រនែត កាលពីឆ្នាំ២០១៤ លើStudio Sony Pictures ដើម្បីសងសឹកក្រុមហ៊ុននេះដែលបានផលិតកុនចំហកឱ្យប្រមុខដឹកនាំ កូរ៉េខាងជើង គីម ជុងអ៊ុន។ ក្រុមចោរនេះក៏ធ្លាប់ជាប់សង្ស័យថា បានវាយប្រហារអ៊ីនធ័រនែតលើធនាគារកណ្តាលបង់ក្លាដែស និងប្រព័ន្ធហិរញ្ញវត្ថុអន្តរជាតិផ្សេងៗ។
មានសកម្មភាពខ្លាំងតាំងពីឆ្នាំ២០១១មក ឡាហ្សារ៉ុស ជារោងចក្រផលិតវីរ៉ុស ដែលមានគំរូថ្មីៗរហូត ព្រោះតែមានអ្នកផ្គត់ផ្គង់ឯករាជ្យឱ្យច្រើន។
ក្នុងពេលរង់ចាំសេចក្តីសន្និដ្ឋានចុងក្រោយ អ្នកជំនាញបានព្រមានអំពីគ្រោះរងការវាយប្រហារដោយប្រើកម្មវិធី ជំរិតនេះជាថ្មីទៀត បើទោះបីជាពេលនេះកម្មវិធីការពារសន្តិសុខអ៊ីនធ័រនែតអាចចាប់វីរ៉ុស Wannacryនេះបានក៏ដោយ។
សូមបញ្ជាក់ថា កាលពីថ្ងៃសុក្រទី ១២ឧសភា ពិភពលោកបានរងការវាយប្រហារអ៊ីនធ័រនែតទ្រង់ទ្រាយធំមិនធ្លាប់ ដោយមានកុំព្យូទ័រប្រមាណ៣០ម៉ឺនគ្រឿង របស់ក្រុមហ៊ុនឯកជននិងសេវាសាធារណៈ ក្នុងប្រទេសចំនួន១៥០ ត្រូវគាំង ដោយមានសារទារប្រាក់ចំនួន ៣០០ដុល្លារ បើចង់បានទិន្នន័យក្នុងកុំព្យូទ័រនោះវិញ។ ប៉ុន្តែមានការបង់លួសតិចតួចណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ