ប៉ូលិសបង់ក្លាដែសចុះឆែកឆេរការិយាល័យមេដឺកនាំបក្សប្រឆាំង
នៅទីក្រុងដាកា ប្រទេសបង់ក្លាដែសថ្ងៃសៅរ៍នេះ ប៉ូលិសបាននាំគ្នាចុះឆែកឆេរការិយាល័យរបស់លោកស្រីខាលីដា ហ្ស៊ីយ៉ា ជាមេដឺកនាំបក្សប្រឆាំង។ សកម្មជនបក្សប្រឆាំងរាប់រយនាក់បានតវ៉ាប្រឆាំងការឆែកឆេរនេះ។ បក្សប្រឆាំងបានចាត់ទុកការឆែកឆេរនេះ ជាល្បិចនយោបាយរបស់រដ្ឋាភិបាលដើម្បីបង្ខូចឈ្មោះមេដឺកនាំបក្សប្រឆាំង។
ចុះផ្សាយនៅថ្ងៃ៖
ប៉ូលិសបង់ក្លាដែសបានទទួលដីកាឆែកឆេរពីតុលាការ អោយចូលទៅឆែកឆេរការិយាល័យរបស់លោកស្រី ខាលីដា ហ្ស៊ីយ៉ា មេដឺកនាំគណបក្សប្រឆាំង ដែលស្ថិតនៅសង្កាត់Gulshan នៅថ្ងៃសៅរ៍នេះ។ ប៉ូលិសប្រាប់ថា ចង់រកមើលក្រែងមានឯកសារប្រឆាំងរដ្ឋាភិបាលបង់ក្លាដែស នៅការិយាល័យលោកស្រីហ្ស៊ីយ៉ា។ ប៉ុន្តែ ប៉ូលិសមិនបានរកឃើញអ្វីទេ។
បក្សប្រឆាំងប្រាប់ថា ក្នុងពេលឆែកឆេរ ប៉ូលិសបានបង្អាក់ដំណើរការកាមេរ៉ា នៅការិយាល័យមេដឺកនាំបក្ស ហើយថែមទាំងបានវាយកំទេចសោទៀតផង។ បក្សប្រឆាំងចោទថា នេះជារបស់រដ្ឋាភិបាលដើម្បីធ្វើបាបបក្សប្រឆាំង បង្ខូចរូបភាពលោកស្រីខាលីដា ជាមេដឺកនាំបក្ស។ លោកស្រីខាលីដា ហ្ស៊ីយ៉ា ធ្លាប់កាន់តំណែងជានាយករដ្ឋមន្ត្រីបង់ក្លាដែស២ដង និងជាមេដឺកនាំបក្សប្រឆាំង គឺបក្សជាតិនិយមបង់ក្លាដែស ហៅកាត់ថា បក្សBNP។ លោកស្រីរងការចោទប្រកាន់ជាង៣០ករណី ដូចជាអំពើពុករលួយ រឺហិង្សាជាដើម។ លោកស្រីខាលីដា ហ្ស៊ីយ៉ា ជាគូប្រជែងរបស់នាយករដ្ឋមន្ត្រី បច្ចុប្បន្ន គឺលោកស្រីហាហ្ស៊ីណា ឆែក។
បក្សប្រឆាំងBNP បានចាប់ផ្តើមរៀបចំមីទ្ទិញផ្សេងៗ ដើម្បីត្រៀមការបោះឆ្នោតសភា ដែលគ្រោងធ្វើ នៅខែមករា ឆ្នាំ២០១៩។ ប៉ុន្តែ យោងតាមក្រុមជំនាញ ការបោះឆ្នោតនេះប្រហែលជាអាចធ្វើមុនអាណត្តិ គឺនៅឆ្នាំក្រោយនេះវិញ។ សូមរំលឹកថា បក្សប្រឆាំងBNP បានធ្វើពហិការក្នុងការបោះឆ្នោតសភា ឆ្នាំ២០១៤ ដោយសារខ្លាចមានការបន្លំសន្លឹកឆ្នោត ធ្វើអោយគណបក្សលោកស្រីហាហ្ស៊ីណា ឆែក ជានាយករដ្ឋមន្ត្រីបច្ចុប្បន្ន បានទទួលជោគជ័យ។
កាលពីដើមឆ្នាំ២០១៥ បក្សប្រឆាំងបានរៀបចំបាតុកម្ម ទាមទារអោយលោកស្រីហាស៊ីណា ចុះពីអំណាច តែលោកស្រីហាស៊ីណាបានប្រើកម្លាំងប៉ូលិសបំបែកបាតុកម្ម ធ្វើអោយមានមនុស្សស្លាប់១២០នាក់។ កាលនោះ សកម្មជនបក្សប្រឆាំងរាប់ពាន់នាក់ត្រូវបានប៉ូលិសចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ