កូរ៉េខាងជើងបាញ់សាកមីស៊ីលមួយដើមថ្មីទៀត ធ្លាក់ក្រៅតំបន់សេដ្ឋកិច្ចផ្តាច់មុខរបស់ជប៉ុន
កូរ៉េខាងជើងបានបាញ់មីស៊ីលបាលិស្ទីកជាថ្មីទៀតហើយ នៅរសៀលថ្ងៃអាទិត្យនេះ។ យោងតាមកូរ៉េខាងត្បូង មីស៊ីលថ្មីនេះស្រដៀងនឹងមីស៊ីល Pukguksong-2 ដែលក្រុងព្យុងយ៉ាងធ្វើការអភិវឌ្ឍន៍ដែរ។ មីស៊ីលថ្ងៃអាទិត្យនេះ បានហោះចំងាយ៥០០គីឡូម៉ែត្រទៅធ្លាក់នៅឆ្នេរខាងកើតប្រទេស។ អាមេរិកបានសំដែងការបារម្ភនិងខកចិត្ត ចំពោះក្រុងព្យុងយ៉ាង ដែលបន្តបាញ់មីស៊ីលញឹកញាប់។ កូរ៉េខាងត្បូងនិងជប៉ុនបានរៀបចំកិច្ចប្រជុំបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
ការបាញ់មីស៊ីលជាថ្មីនៅរសៀលថ្ងៃអាទិត្យនេះ ជាការបាញ់សាកល្បងមីស៊ីលលើកទី២ របស់ក្រុងព្យុងយ៉ាង គិតតាំងពីប្រធានាធិបតីកូរ៉េខាងត្បូងថ្មី ឡើងកាន់អំណាចមក។ មីស៊ីលដែល បានបាញ់ថ្ងៃអាទិត្យនេះ ហោះបានចំងាយ៥០០គីឡូម៉ែត្រ និងកម្ពស់៥៦០គីឡូម៉ែត្រ ហើយទៅធ្លាក់នៅឆ្នេរភាគខាងកើតប្រទេស។ ជប៉ុនប្រាប់ថា មីស៊ីលនេះបានធ្លាក់នៅក្រៅតំបន់សេដ្ឋកិច្ចផ្តាច់មុខរបស់ជប៉ុន។ ទោះយ៉ាងនេះក្តី មីស៊ីលនេះហោះមិនឆ្ងាយដូចមីស៊ីលដែលក្រុងព្យុងយ៉ាងបានបាញ់សាកទាំង៣លើកមុននេះទេ។
ការបាញ់មីស៊ីលថ្ងៃអាទិត្យនេះ ធ្វើឡើងនៅជិតតំបន់ Pukchang ចំងាយ៦០គីឡូម៉ែត្រ ពីភាគខាងជើងទីក្រុងព្យុងយ៉ាង។ តំបន់នេះមិនឆ្ងាយទេ ពីកន្លែងដែលកូរ៉េខាងជើងសាកល្បងមីស៊ីល កាលពីខែមុន ដែលកាលនោះ ការសាកល្បងមិនបានជោគជ័យ។
មួយសប្តាហ៍មុននេះ កូរ៉េខាងជើងទើបនឹងធ្វើអោយគ្រប់គ្នាភ្ញាក់ផ្អើល ដោយបានបាញ់សាកល្បងមីស៊ីលពិសេស ឈ្មោះ Hwasong-12 ជាមីស៊ីលរយៈចំងាយមធ្យម។ ក្រុមជំនាញហ៊ានរហូតវាយតម្លៃថា Hwasong-12 អាចបាញ់ដល់កោះហាវ៉ៃសហរដ្ឋអាមេរិកទៀតផង។ កូរ៉េខាងជើងបានឆ្លៀតអួតដែរថា មីស៊ីលនោះអាចបំពាក់ក្បាលគ្រាប់នុយក្លេអ៊ែរ និងមិនភ្លេចអួតដែរថា ខ្លួនមានសមត្ថភាពវាយប្រហារសហរដ្ឋអាមេរិក។
ដោយឡែក គិតតាំងពីដើមឆ្នាំ២០១៧មក ការបាញ់មីស៊ីលថ្ងៃអាទិត្យនេះ ជាការបាញ់មីស៊ីលលើកទី១០ របស់កូរ៉េខាងជើង។ កាលពីឆ្នាំ២០១៦ ក្រុងព្យុងយ៉ាងបានបាញ់មីស៊ីលជាង១០ដើម និងបានសាកល្បងនុយក្លេអ៊ែរ២លើក ដោយមិនខ្វល់ទណ្ឌកម្មសហគមន៍អន្តរជាតិទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ