ប្រធានាធិបតី ហ្វីលីពីនផ្តើមទស្សនកិច្ចរយៈពេល៥ថ្ងៃនៅរុស្ស៊ី
លោកប្រធានាធិបតីហ្វីលីពីន Rodrigo Duterte ថ្ងៃចន្ទនេះ បានហោះចេញពីប្រទេសគាត់ មកកាន់ប្រទេសរុស្ស៊ី ដើម្បីជួបក្នុង៤ថ្ងៃទៀត ជាមួយសមភាគីរុស្ស៊ី គឺលោកពូទីន ដែល តាមសំដីគាត់ ជា ”វីរបុរសសំណប់”របស់គាត់ ក្នុងបំណងទទួលអាវុធណាពីរុស្ស៊ី ដែលប្រទេសគាត់ត្រូវការ ហើយដកខ្លួនឲ្យ កាន់តែឃ្លាត ពី សរអា ជាសម្ព័ន្ធមិត្តចាស់ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ទស្សនកិច្ចនេះដែលនឹងពន្យារទៅដល់៥ថ្ងៃ ត្រូវបញ្ជាក់ពីការស្តារបានល្អមែនទែន ទំនាក់ទំនង ហ្វីលីពីន-រុស្ស៊ី ក្រោយពីលោក Duterte បានឡើងកាន់អំណាច កាលពីចុងខែមិថុនាឆ្នាំ២០១៦។ តាំងពី ពេលនោះមក លោកប្រធានាធិបតីហ្វីលីពីន ដាក់ទិសស្រាយទៅវិញ សម្ព័ន្ធជាមួយនឹង សរអា ជាអតីត ចៅហ្វាយអាណានិគមខ្លួន ដែលត្រូវគាត់ចោទថា លាក់ពុត និង ជា មេសម្លុត។
គឺនៅថ្ងៃព្រហស្បត៏ ២៥ ឧសភា ដែលលោក Duterte នឹងត្រូវទទួលជួបដោយលោកប្រធានាធិបតីរុស្ស៊ី វ៉្លាឌីមៀរ ពូទីន ដែលលោក Duterte ផ្ទាល់ ធ្លាប់បានចាត់ទុក ជា” វីរបុរសសំណប់” របស់គាត់។ លោក Duterte ក៏ធ្លាប់ និយាយអំពី ចំណងពិសេសរវាងរូបគាត់ និង លោកពូទីន ដែលមានចំណូលចិត្តដូចគ្នា ខាងបរបាញ់ និង ខាងស្រឡាញ់ កាំភ្លើង។
ថ្លែងទៅពួកអ្នកកាសែត កាលពីថ្ងៃ សុក្រ ១៩ឧសភា លោកប្រមុខរដ្ឋហ្វីលីពីន បានពន្យល់បំភ្លឺថា អាទិភាព មួយ នៃការធ្វើដំណើររបស់គាត់ទៅរុស្ស៊ី គឺដើម្បីទិញ គ្រាប់បែករុស្ស៊ីបញ្ជាពីចម្ងាយ សម្រាប់ប្រយុទ្ធទល់នឹង ពួកសកម្មជនអ៊ីស្លាមនិយម នៅប៉ែកខាងត្បូងប្រទេស។ តាមសំដីគាត់ ហ្វីលីពីន មានមិនខ្វះទេ គ្រាប់បែក ដែល” ប្រាជ្ញា” ប៉ុន្តែ វានៅចាញ់ គ្រាប់បែករុស្ស៊ីបញ្ជាពីចម្ងាយ ដែលប្រតិបត្តិការត្រវចំទីដៅក្នុងកម្រិតខ្ពស់។
អស់ជាច្រើនសិបឆ្នាំ សរអា បានដើរតួជា អាណាព្យបាលចម្បង របស់ហ្វីលីពីន ស្របនឹងសន្ធិសញ្ញាទ្វេភាគី ស្តីអំពីការការពារទៅវិញទៅមក។
លោក Duterte បានកាត់បន្ថយចំនួនលំហាត់សឹកប្រចាំឆ្នាំរួមគ្នាហ្វីលីពីន-អាមេរិកាំង ដោយថែមទាំងស្នើ ឲ្យ សរអា ដកកងទ័ពចេញ ពីហ្វីលីពីន ទៅផង។មុននឹងចេញដំណើរមកបំពេញទស្សនកិច្ចនេះ លោកប្រធានាធិបតីហ្វីលីពីន Duterte ក្នុងសម្ភាសន៍ ទៅ ពួកអ្នកកាសែតរុស្ស៊ី បានថ្លែងជាអាទ៏ ៖ តាំងពីក្នុងសម័យឃោសនាបោះឆ្នោតម៉្លេះ ខ្ញុំបានសន្យាថា នៅលើ ដែនដីប្រទេសខ្ញុំ នឹងពុំមានមូលដ្ឋានយោធាបរទេសអ្វីណាទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ