លោកតេ ជុងហូ៖មានតែការរំលំរបបគីម ជុនអ៊ុនទេទើបគេអាចដោះស្រាយបញ្ហានុយក្លេអ៊ែរកូរ៉េខាងជើងបាន
កូរ៉េខាងជើងកំពុងបន្តយកនុយក្លេអ៊ែរ និងគ្រាប់មីស៊ីលផ្គើនសហគមន៍អន្តរជាតិ និងព្រមានអាមេរិករបស់លោកដូណាល់ ត្រាំ។ តាំងពីដើមឆ្នាំ ២០១៧ នេះមក របបក្រុងព្យុងយ៉ាងបានបាញ់សាកល្បងគ្រាប់មីស៊ីលអន្តរទ្វីបដល់ទៅ ៨លើក។ លោកតេ ជុងហូ អតីតឯកអគ្គរដ្ឋទូតរងកូរ៉េខាងជើងប្រចាំប្រទេសអង់គ្លេសដែលបានផ្តាច់ខ្លួនរត់ទៅកូរ៉េខាងត្បូងបានបញ្ជាក់ថា គ្មានថ្ងៃដែលមនុស្សខ្លាំងគីម ជុនអ៊ុនបោះបង់កម្មវិធីនុយក្លេអ៊ែរ និងគ្រាប់មីស៊ីលទេ។ តាមលោកជុងហូ មានតែការផ្តួលរំលំរបបគីម ជុនអ៊ុនទើបគេអាចដោះស្រាយបញ្ហានុយក្លេអ៊ែរកូរ៉េខាងជើងបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
« សម្រាប់គីម ជុនអ៊ុន កម្មវិធីអភិវឌ្ឍន៍នុយក្លេអ៊ែរ និងគ្រាប់មីស៊ីលអន្តរទ្វីបជាមធ្យោបាយតែមួយគត់ដើម្បីធានាពីការកាន់អំណាច និងរបបដឹកនាំរបស់គាត់។ ដូច្នេះហើយបានជាគាត់ប្តេជ្ញាចិត្តមិនលះបង់ជាដាច់ខាតរហូតដល់ការដាក់ពង្រាយក្បាលនុយក្លេអ៊ែរ និងគ្រាប់មីស៊ីលអន្តរទ្វីបដើម្បីត្រៀមប្រយុទ្ធ។
កូរ៉េខាងជើងនឹងមិនចាត់វិធានការណាមួយដើម្បីរំសាយកម្មវិធីនុយក្លេអ៊ែរទេ។ សម្រាប់កូរ៉េខាងជើង គ្រប់កិច្ចព្រមព្រៀងបណ្តោះអាសន្ន និងកិច្ចសន្យាទាំងអស់គ្រាន់ជាមធ្យោបាយមួយដើម្បីឲ្យគ្រប់គ្នាទទួលស្គាល់ខ្លួនជាមហាអំណាចនុយក្លេអ៊ែរ។ មានអ្នកខ្លះគិតថា គីម ជុនអ៊ុនជាមនុស្សឆ្កួត ឡប់សតិ តែមិនពិតទេ គាត់មិនមែនជាមនុស្សឆ្កួត ឡប់សតិឡើយ។
មានតែការផ្តួលរំលំរបបគីម ជុនអ៊ុនតែមួយគត់ទើបគេអាចដោះស្រាយបញ្ហានុយក្លេអ៊ែរកូរ៉េខាងជើងបាន។ បើមិនអ៊ីចឹងទេ គឺគ្មានថ្ងៃដែលគីម ជុនអ៊ុននឹងបោះបង់ចោលមហិច្ឆតានុយក្លេអ៊ែររបស់គាត់ឡើយ។ ពិតណាស់ គេមិនត្រូវជ្រើសរើសផ្លូវយោធាដើម្បីរំលំរបបគីម ជុនអ៊ុនទេ ព្រោះវានឹងបង្កឲ្យមានហានិភ័យធំធេងណាស់។ អ៊ីចឹងសួរថា តើអ្វីទៅជាដំណោះស្រាយ?។ គេត្រូវតែទាញយកមេរៀនពីការដួលរលំរបបសង្គមនិយមនៅអឺរ៉ុបខាងកើត។
ក្នុងសម័យសហភាពសូវៀត ពលរដ្ឋរស់នៅអឹរ៉ុបខាងកើតដឹងថា អ្នករស់នៅអឺរ៉ុបខាងលិចមានសេរីភាព និងរបបប្រជាធិបតេយ្យ។ ដូច្នេះគេត្រូវតែរំលំរបបក្រុងព្យុងយ៉ាងពីខាងក្នុង។ សព្វថ្ងៃ មានខ្សែភាពយន្ត និងវប្បធម៌ពីកូរ៉េខាងត្បូងបានជ្រាបចូលបន្តិចម្តងៗទៅក្នុងជីវិតរស់នៅប្រចាំថ្ងៃរបស់ពលរដ្ឋកូរ៉េខាងជើង។ តាមរយៈខ្សែភាពយន្ត និងវប្បធម៌នេះ ពលរដ្ឋកូរ៉េខាងជើងបានដឹងពីសង្គម និងភាពរីកចម្រើនរបស់ខាងត្បូង។ នៅពេលដែលពលរដ្ឋនៅខាងជើងគ្រប់រូបបានជ្រាបច្បាស់ហើយ នោះពួកគេអាចនឹងក្រោកឈរឡើងព្រមគ្នាដើម្បីរំលំប្រព័ន្ធដឹកនាំសព្វថ្ងៃ។
ខ្ញុំមានជំនឿជឿជាក់លើលទ្ធភាពនេះខ្លាំងណាស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ