ទស្សនកិច្ចប្រធានាធិបតីហ្វីលីពីន នៅរុស្ស៊ី ត្រូវពង្រួញឲ្យមកនៅត្រឹម ២ថ្ងៃ
ចុះផ្សាយនៅថ្ងៃ៖
ស្តាប់ - ០៥:៤៨
លោកប្រធានាធិបតីហ្វីលីពីន Rodrigo Duterte ដែលបានអញ្ជើញមកដល់ក្រុងម៉ូស្គូ ថ្ងៃ ចន្ទ ២២ឧសភា ហើយត្រូវទទួលជួបចរចា ដោយសមភាគីរុស្ស៊ី លោក វ៉្លាឌីមៀរ ពូទីន លុះនៅថ្ងៃព្រហស្បតិ៍ ២៥ ឧសភា ស្រាប់តែបានហោះត្រឡប់ទៅស្រុកវិញ ជាបន្ទាន់ នៅកណ្តាលអធ្រាត្រ ថ្ងៃអង្គារឆ្លងចូលថ្ងៃពុធ ២៤ ឧសភា ដោយមកពី ខេត្តខាងត្បូងប្រទេសគាត់ ធ្លាក់ទៅក្នុងដៃពួកឧទ្ទាមភេរវនិយម នៃអង្គការ ”រដ្ឋអ៊ីស្លាម” ។ ម៉្លោះហើយបានជា លោកពូទីន គ្រាន់តែត្រឡប់មកពីបេសកកម្ម នៅមូលដ្ឋានភ្លាម បាន រួសរាន់ ទៅកាន់វិមានក្រេមឡាំង ទាំងកណ្តាលអធ្រាត្រនោះ ហើយទទួលជួបលោក Duterte ដែលពី ចំណែកខ្លួន បានសុំការអភ័យទោស ចំពោះការរំខានដល់ តារាងចែកពេល ការងារនៃប្រមុខរដ្ឋរុស្ស៊ី។
ជំនួបនេះ ក្នុងរយៈពេល ១០នាទី ដំបូង ត្រូវបានអនុញ្ញាតឲ្យ ពួកអ្នកកាសែត ចូលថត។ រីឯ កិច្ចចរចាផ្ទាល់ បានប្រព្រឹត្តទៅ អស់ជិត ១ម៉ោងកន្លះ រហូតដល់ម៉ោង ១ យប់ ថ្ងៃ ២៤ ឧសភាទៅហើយ ប៉ុន្តែ ក្នុងលក្ខណៈបិទទ្វារ។
បានចូលរួមក្នុងកិច្ចចរចា ៖-ពីខាងរុស្ស៊ី ក៏ទាំង រដ្ឋមន្ត្រីការបរទេស , ឧបការីប្រធានាធិបតីខាងកិច្ចការ អន្តរជាតិ, រដ្ឋមន្ត្រីអភិវឌ្ឍន៍សេដ្ឋកិច្ច។ ពីខាងហ្វីលីពីន ក៏មានទាំងរដ្ឋមន្ត្រីការបរទេស , រដ្ឋមន្ត្រីការពារជាតិ។
លោក Duterte បានថ្លែងទៅលោក ពូទីន ៖ ខ្ញុំសូមការអភ័យទោស ដោយខ្ញុំបានធ្វើឲ្យខូចដល់តារាងចែកពេល ការងាររបស់ឯកឧត្តមប្រធានាធិបតី ។ ពួកឧទ្ទាម នៃ”អង្គការរដ្ឋអ៊ីស្លាម” បានវាយប្រហារ ដណ្តើមយកបានខេត្ត Mindanao។ ការប៉ះទង្គិច គ្នា និង យុទ្ធនាការ កំពុងបន្តទៅ។ ម៉្លោះហើយ បានជាខ្ញុំត្រូវហោះចេញទៅកាន់ទីនោះ
-ឯកឧត្តមប្រធានាធិបតី ខ្ញុំសូមសំដែងអំណរគុណយ៉ាងជ្រាលជ្រៅចំពោះ សេចក្តីអញ្ជើញឲ្យមានធ្វើ ទស្សនកិច្ច នៅសហព័ន្ធរុស្ស៊ី។ ប្រាកដណាស់ ដែលយើងខ្ញុំ ចាត់ទុករុស្ស៊ី ជាមិត្តដ៏ជំនិតរបស់យើង។ យើង ប្រាថ្នាធ្វើការងារ ដើម្បីពង្រឹងទំនាក់ទំនងទ្វេភាគី នៅតាមគ្រប់មុខព្រួញ។
-ខ្ញុំមកនេះ ដើម្បីទទួលការគាំទ្ររបស់ឯកឧត្តម ហើយបញ្ជាក់ពីមិត្តភាពយើង។ យើងត្រូវការពង្រីកចំណង ពាណិជ្ជកម្មទ្វេភាគី បង្កើនទំហំផ្តោះប្តូរពាណិជ្ជកម្ម ទៅវិញ ទៅមក។
-ជាការពិត ដែលប្រទេសហ្វីលីពីនយើងខ្ញុំ ត្រូវការអាវុធទំនើបៗ។ យើងបានធ្វើកុម្ម៉ង់ជាក់លាក់ ដើម្បី ទិញអាវុធពីសរអា។ ប៉ុន្តែ ឥឡូវ ស្ថានការណ៍ នៅសរអា ដូចជាមិនរលូនសោះ។ អាវុធរុស្ស៊ី ដ៏ទំនើបៗ ដែលយើងត្រូវការ គឺដើម្បីប្រើវា ច្បាំងទល់នឹងពពួកក្រុមឧទ្ទាម នៃអង្គការ ”រដ្ឋអ៊ីស្លាម”។
លោក Putin ពីចំណែកគាត់ បានថ្លែងទៅ លោក Duterte ដូចតទៅ ៖ ខ្ញុំត្រេកអរទទួលរូបឯកឧត្តម នៅក្រុងម៉ូស្គូផ្ទាល់។ ខ្ញុំនិងឯកឧត្តមធ្លាប់បានជួបគ្នា នៅក្រុង Lima រដ្ឋធានី Perou ហើយពេលថ្មីៗ គឺនៅក្រុង Pekin។ ក្នុងឆ្នាំមុន រុស្ស៊ី និង ហ្វីលីពីន បានប្រារព្ធខួប ៤០ ឆ្នាំ នៃ ការតាំងទំនាក់ទំនង ការទូត រវាងប្រទេសទាំងពីរ។
-ក្នុងដំណាក់ឥឡូវ គួរឲ្យស្តាយដែល ទំហំផ្តោះប្តូរពាណិជ្ជកម្ម រវាងប្រទេសយើង នៅមិនទាន់ហំហួន នៅឡើយ។ ប៉ុន្តែ នៅដើមឆ្នាំនេះ វាបានងើបឡើងវិញ ហើយកើនឡើង ២៥% តែម្តង។ Moscou និងក្រុង Manille មាន ទិសដៅជាច្រើនប្រកបដោយទស្សនវិស័យល្អ សម្រាប់សហប្រតិបត្តិការនឹងគ្នា បែបយ៉ាង ៖ វិស័យថាមពល , វិស័យផលិតគ្រឿងចក្រ , ហេដ្ឋារចនាសម្ព័ន្ធដឹកជញ្ជូន , មិនតែប៉ុណ្ណោះ ប្រទេសទាំងពីរ មានលទ្ធភាព សម្រាប់សហការក្នុង វិស័យ យោធា-បច្ចេកទេស។
-មុននឹងចាប់ផ្តើមកិច្ចចរចា ខ្ញុំសូមសំដែងនូវការរួមមរណទុក្ខ ចំពោះការធ្លាក់ខ្លួនស្លាប់នៃ ប្រជាពលរដ្ឋ ប្រទេសឯកឧត្តម បណ្តាលមកពីការវាយប្រហារពីខាងពួកភេរវជន។ ខ្ញុំនិងថ្នាក់ដឹកនាំរុស្ស៊ី សូមសំដែង នូវការយោគយល់ទាំងស្រុង ចំពោះកាលៈទេសៈ ដែលបង្ខំឲ្យឯកឧត្តម ត្រឡប់ទៅស្រុកវិញ ជាបន្ទាន់ ។ ខ្ញុំក៏ សូមសំដែងសេចក្តីសង្ឃឹមថា ជម្លោះដែលឯកឧត្តម ទើបបានរ៉ាយរ៉ាប់ មុខជានឹងដោះស្រាយបានរួច យ៉ាង ឆាប់បំផុត ដោយហែហម ទៅដោយការបាត់បង់តិចបំផុត។
លោកប្រមុខរដ្ឋរុស្ស៊ី ដោយថ្លែងទៅសមភាគីហ្វីលីពីន គូសបញ្ជាក់ថា ៖ ទោះបីឯកឧត្តម ត្រូវចេញដំណើរ ទៅក្តី ក៏បណ្តារដ្ឋមន្ត្រីរបស់ឯកឧត្តម នឹងបន្តស្ថិតនៅទេតើ ដើម្បីចុះហត្ថលេខា លើឯកសារមួយចំនួន ដែល ត្រូវបានតាក់តែងឡើង ដោយបណ្តា សហការីនៃភាគីទាំងសងខាង។ ឯកសារទាំងនេះ តម្រង់ទៅ បំផុស បំផុល តទៅទៀត ទំនាក់ទំនង រវាងប្រទេសទាំងពីរ។
លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ្រ៉ូវ បានថ្លែងថ្ងៃ២៥ ឧសភាថា ឯកសាររុស្ស៊ី-ហ្វីលីពីន សំខាន់ៗ ដែលត្រូវបានចុះហត្ថលេខា ដោយរដ្ឋមន្ត្រីសមស្របនៃប្រទេសទាំងពីរ សរុបទៅគឺ ៩ ច្បាប់ ក្នុងនោះមាន កិច្ចព្រមព្រៀង ខាងសហប្រតិបត្តិការ ផ្នែកការពារប្រទេស , កិច្ចព្រមព្រៀងស្តីអំពីការប្រើ ថាមពលបរមាណូ ក្នុង គោលដៅស៊ីវិល, កិច្ចព្រមព្រៀងខាងអភិវឌ្ឍន៍ទេសចរណ៍ សម្រាប់ ឆ្នាំ២០១៧-២០១៩, អនុស្សរណៈ ស្តីអំពីការយោគយល់គ្នាវិស័យកសិកម្ម , កិច្ចព្រមព្រៀងវិស័យដឹកជញ្ជូន , ពិធីសារ ខាង សហការគ្នា វិស័យវប្បធម៌ , កិច្ចព្រមព្រៀងឆ្ពោះទៅពង្រីកពាណិជ្ជកម្ម និងវិនិយោគ , អនុស្សរណៈខាងអភិវឌ្ឍន៍ សហប្រតិបត្តិការ វិស័យឧស្សាហកម្ម , កម្មវិធីសកម្មភាពស្តីអំពីការផ្លាស់ប្តូរយោបល់រវាង ក្រសួងមន្ទីរ។
ដោយមកពីបង្ខំចិត្តផ្តាច់ទស្សនកិច្ច លោក Duterte មិនបានសម្រេចឯណា គម្រោងរបស់គាត់ ជួបជាមួយ ពួកអ្នកតំណាងមជ្ឈដ្ឋាន Business រុស្ស៊ី , ការអញ្ជើញទៅថ្លែងសុន្ទរកថា ក្នុងសាលាវណ្ណៈ ក្រុងម៉ូស្គូ ខាង បណ្តុះបណ្តាល ពួកអ្នកការទូត ហៅថា MGIMO ដែលរៀបចំឡើងដោយនាយកដ្ឋាន ASEAN សាលានេះ ព្រមទាំងជួប ជាមួយអាណិកជនហ្វីលីពីន ៥.០០០ នាក់ រស់នៅរុស្ស៊ី។
តាមរយៈ បទយកការណ៍នៃទូរទស្សន៍រុស្ស៊ីពីហ្វីលីពីន ឧទ្ទិសដល់ទស្សនកិច្ច លោក Duterte អ្នកស្រុករុស្ស៊ី បានដឹងថា ហ្វីលីពីន ផ្សំឡើងពី កោះដល់ទៅ ជាង ៧.០០០ កោះ ម៉្លោះហើយបានជាព្រំដែនសមុទ្រ ប្រទេសនេះ មានប្រវែងដល់ទៅ ៣០.០០០ គ.ម. , បណ្តាជនហ្វីលីពីនជាទូទៅ មានជីវភាពយ៉ាប់យ៉ឺន គេខំចាប់ត្រី យក ទៅលក់ ក្នុង១ថ្ងៃៗ បានជាមធ្យម ពី ២ ទៅ៣ ដុល្លារ ហើយនរណាដែលគ្មានដំបូលជ្រក នាំគ្នារស់នៅ លើ ផ្នូរខ្មោច តែម្តង លុះទាល់តែអាជ្ញាធរ លែងរវល់ចាត់វិធានការទៅហើយ។ ទូរទស្សន៍រុស្ស៊ី ចាប់អារម្មណ៍ ជាពិសេសថា ក្នុងចំណោម បណ្តាជន ១០០ លាននាក់នៅហ្វីលីពីន មាន ៤ លាននាក់ ឯណោះ ដែល សេពគ្រឿងញៀន។ ចំពោះ ធម៌ក្តៅ របស់លោក Duterte ដែលតែ ក្នុងរយៈពេលជិតមួយឆ្នាំ តាំងពីគាត់ ឡើងកាន់អំណាចមក បាន កំទេចឈ្មួញជួញគ្រឿង អស់ ជាង១.០០០នាក់ ទៅហើយ អំណាចនៅរុស្ស៊ី មិន បញ្ចេញយោបល់អ្វីទេ ដោយចាត់ទុករឿងនេះ ជាកិច្ចការផ្ទៃក្នុងរបស់ហ្វីលីពីនផ្ទាល់។ គេដឹងថា លោក Duterte ជាមនុស្ស មាត់ឆៅ មិនញញើតនឹងហៅ អតីតប្រធានាធិបតី សរអា អូបាម៉ា ថាជា “ កូនរបស់ស្រីខូច “ តែម្តង ចំពោះការហ៊ានទិតៀនគាត់ ក្នុងរឿងបង្ក្រាបពួកជួញគ្រឿងញៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ