បណ្តាញជីហាតអង្គការរដ្ឋអ៊ីស្លាមលុកលុយចូលដល់អាស៊ីអាគ្នេយ៍
ប៉ូលិសឥណ្ឌូណេស៊ីបានចាប់ខ្លួនជនសង្ស័យ៣នាក់ នៅក្នុងក្របខ័ណ្ឌស៊ើបអង្កេត ក្រោយការវាយប្រហារភេរវកម្ម នៅទីក្រុងហ្សាកាតា ដែលបានសម្លាប់ប៉ូលិសឥណ្ឌូណេស៊ី បីនាក់ កាលពីថ្ងៃពុធ។ ក្រុមជីហាតអង្គការរដ្ឋអ៊ីស្លាមដែលមានទីតាំងនៅស៊ីរី នៅថ្ងៃសុក្រនេះ បានចេញមុខ ទទួលខុសត្រូវលើភេរវកម្ម នៅឥណ្ឌូណេស៊ី។ នៅហ្វីលីពីនឯណោះវិញ រដ្ឋអាជ្ញាបាននិយាយថា ក្រុមប្រដាប់អាវុធ បរទេស ដូចជាឥណ្ឌូណេស៊ី និងម៉ាឡេស៊ីកំពុងចូលរួមកៀកស្មាជាមួយពួកឧទ្ទាមអ៊ីស្លាមជ្រុលនិយមហ្វីលីពីន ដែលបានប្រកាសភ្ជាប់ខ្លួនទៅក្រុមជីហាតអង្គការរដ្ឋអ៊ីស្លាមនៅស៊ីរី និងនៅអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
មានជនជាតិឥណ្ឌូណេស៊ី និងម៉ាឡេស៊ីកំពុងប្រយុទ្ធក្នុងជួរក្រុមអ៊ីស្លាមជ្រុលនិយមនៅហ្វីលីពីន។ ក្រុមឧទ្ទាមអ៊ីស្លាមជ្រុលនិយម ឈ្មោះ Maute ដែលចូលកាន់កាប់ទីក្រុងម៉ារ៉ាវី របស់កោះមីនដាណាវតាំងពីថ្ងៃអង្គារ កំពុងជាប់ដៃប្រយុទ្ធជាមួយកងទ័ពហ្វីលីពីន។ នេះបើតាមការអះអាងរបស់រដ្ឋអាជ្ញាហ្វីលីពីន លោកJosé Calida។
តាមរដ្ឋអាជ្ញាហ្វីលីពីន វត្តមានរបស់ជនជាតិឥណ្ឌូណេស៊ី និងម៉ាឡេស៊ី ក្នុងជួរពួកឧទ្ទាមអ៊ីស្លាមជ្រុលនិយម ស បង្ហាញឃើញពីការឈ្លានពានរបស់ក្រុមភេរវជនបរទេស។ នៅហ្វីលីពីន ពួកឧទ្ទាមMaute ពីមុន គ្រាន់តែជាក្រុមភេរវនិយមក្នុងស្រុក ប៉ុន្តែ ក្រុមនេះ បានចុះចូល ជឿតាមមនោគមវិជ្ជារបស់ក្រុមជីហាតអង្គការរដ្ឋអ៊ីស្លាម ដែលមានមូលដ្ឋាន នៅប្រទេសស៊ីរី។ ក្រុមភេរវនិយមទាំងនេះមានបំណង ចង់ប្រែក្លាយកោះមីនដាណាវ ដែលមានប្រជាជនអ៊ីស្លាមរស់នៅប្រមាណ ២សែននាក់ ឲ្យទៅជារដ្ឋកាលីហ្វាមួយទៀត របស់ក្រុមជីហាត ប្រចាំនៅអាស៊ីអាគ្នេយ៍។ សម្រាប់រដ្ឋអាជ្ញាហ្វីលីពីន អ្វីដែលគេព្រួយបារម្ភ គឺក្រុមឧទ្ទាមអ៊ីស្លាមជ្រុលនិយម បានអូសទាញ យុវជនអ៊ីស្លាមហ្វីលីពីនជាច្រើននាក់ឲ្យចូលរួមក្នុងចលនាភេរវនិយមរបស់ពួកខ្លួន។
នៅថ្ងៃល្ងាចថ្ងៃព្រហស្បតិ៍ម្សិលមិញ ក្រុមជីហាតអង្គការរដ្ឋអ៊ីស្លាម បានចេញមុខប្រកាសថា ភេរវជនអត្តឃាត ដែលបានបំផ្ទុះគ្រាប់បែក សម្លាប់ប៉ូលិស ៣នាក់ នៅចំណតរថយន្តក្រុងនៅ ទីក្រុងហ្សាការ កាលពីថ្ងៃពុធ គឺជាទាហានស្មោះស្ម័គ្ររបស់ខ្លួន។
ប៉ូលិសឥណ្ឌូណេស៊ី ដែលកំពុងស៊ើបអង្កេត និងបានចាប់ខ្លួនជនសង្ស័យបីនាក់ ដែលទាក់ទងនឹងភេរវកម្មនៅថ្ងៃពុធ នៅមិនទាន់ធ្វើអត្ថាធិប្បាយអ្វីទៅលើការប្រកាសចេញមុខរបស់ក្រុមអង្គការរដ្ឋអ៊ីស្លាមនៅឡើយទេ។ ប៉ុន្តែ តាមអ្នកជំនាញខាងភេរវនិយម ការអះអាងរបស់ក្រុមជីហាត អាចគួរឲ្យជឿជាក់ និងថា ភេរវកម្មសម្លាប់ប៉ូលិស អាចជាស្នាដៃរបស់ក្រុមអ៊ីស្លាមជ្រុលនិយម JAD នៅកោះហ្សាវ៉ា ដែលបានភ្ជាប់ខ្លួនទៅក្រុមជីហាតអង្គការរដ្ឋអ៊ីស្លាម។
ឥណ្ឌូណេស៊ី ដែលមានប្រជាជនកាន់សាសនាអ៊ីស្លាមច្រើនជាងគេក្នុងពិភពលោក មានយុវជនជ្រុលនិយមជាច្រើនរយនាក់ បានចេញទៅប្រយុទ្ធនៅក្នុងជួរក្រុមជីហាត អង្គការរដ្ឋអ៊ីស្លាម នៅប្រទេសស៊ីរី និងអ៊ីរ៉ាក់។ នៅមួយឆ្នាំចុងក្រោយនេះ ឥណ្ឌូណេស៊ីឧស្សាហ៍រងគ្រោះដោយ ការវាយប្រហារភេរវកម្ម ដែលភាគច្រើនបង្កឡើងដោយក្រុមជ្រុលនិយម ដែលបានភ្ជាប់ខ្លួនទៅបណ្តាញជីហាតអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ