ជំនួបកំពូលសន្តិសុខនៅសិង្ហបុរី៖លោកប្រមុខការពារជាតិអាមេរិកវាយប្រហារកូរ៉េខាងជើង និងរិះគន់ចិន
នៅថ្ងៃសៅរ៍ ទី៣ មិថុនានេះ លោករដ្ឋមន្រ្តីការពារជាតិអាមេរិក James Mattis បានថ្លែងវាយប្រហារកូរ៉េខាងជើងទាក់ទងនឹងបញ្ហានុយក្លេអ៊ែរ និងថ្លែងរិះគន់ចិនទាក់ទងនឹងសំណុំរឿងសមុទ្រចិនខាងត្បូង។ លោក Mattis បានថ្លែងយ៉ាងដូចនេះនៅក្នុងជំនួបកំពូលតំបន់ស្តីពីសន្តិសុខរៀបចំនៅក្នុងប្រទេសសិង្ហបុរី។ ទន្ទឹមគ្នានេះ លោករដ្ឋមន្រ្តីការពារជាតិអាមេរិកបានព្យាយាមនិយាយធានាសម្ព័ន្ធមិត្តអាស៊ីថា អាមេរិកនៅតែស្ថិតពីក្រោយពួកគេ និងជួយគិតគូរដោះស្រាយពីក្តីកង្វល់របស់គេគ្រប់ពេល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
គឺសំណុំរឿងនុយក្លេអ៊ែរកូរ៉េខាងជើងដែលលោករដ្ឋមន្រ្តីការពារជាតិអាមេរិកលោក James Mattis បានលើកទៅនិយាយមុនគេដោយចាត់ទុកជាការគំរាមកំហែងសម្រាប់ទាំងអស់គ្នា និងថា វាចាំបាច់ខ្លាំងណាស់ដែលគ្រប់គ្នាត្រូវធ្វើអ្វីៗគ្រប់យ៉ាងដើម្បីឲ្យឧបទ្វីបកូរ៉េគ្មានអាវុធនុយក្លេអ៊ែរ។ នៅក្នុងន័យនេះ លោក James Mattis បានអំពាវនាវឲ្យមានកិច្ចសហប្រតិបត្តិការរួមគ្នារវាងគ្រប់ភាគីពាក់ព័ន្ធទាំងអស់។ ការថ្លែងរបស់លោក Mattis ពេលនេះបានធ្វើឡើង បន្ទាប់ពីរបបក្រុងព្យុងយ៉ាងកំពុងបន្តធ្វើការបាញ់សាកល្បងគ្រាប់មីស៊ីលអន្តរទ្វីបជារឿយៗដែលថ្មីចុងក្រោយកាលពីថ្ងៃចន្ទដើមសប្តាហ៍នេះ។ លោក Mattis បានចាត់ទុកទង្វើរបស់កូរ៉េខាងជើងថាខុសនឹងច្បាប់អន្តរជាតិ ហើយបន្ថែមដោយព្រមានថា សហគមន៍អន្តរជាតិនឹងមិនអាចទុកបណ្តោយឲ្យក្រុងព្យុងយ៉ាងបន្តធ្វើរបៀបនេះបានទៀតឡើយ។
យ៉ាងណាក៏ដោយ លោក Mattis មិនភ្លេចនិយាយពីការរួមចំណែករបស់ចិនក្នុងការចូលរួមជួយនិយាយជាមួយសម្ព័ន្ធមិត្តកូរ៉េខាងជើងរបស់ខ្លួនឲ្យបញ្ឈប់ផ្គើនសហគមន៍អន្តរជាតិ តាមរយៈកម្មវិធីនុយក្លេអ៊ែរ និងគ្រាប់មីស៊ីលអន្តរទ្វីប។ តែទន្ទឹមនឹងការរំពឹងលើចិនឲ្យជួយដោះស្រាយរឿងកូរ៉េខាងជើង លោក Mattis ក៏មិនញញើតនឹងរិះគន់ចិនលើបញ្ហាជម្លោះនៅក្នុងសមុទ្រចិនខាងត្បូងទេ។ ដោយនិយាយមិនបញ្ឆិតបញ្ឆៀង លោក Mattis បានវ៉ៃប្រហារចិនពីការប្រើកម្លាំងបាយដើម្បីវាតទីលើដែនទឹកនៅក្នុងសមុទ្រចិនខាងត្បូង។ នៅក្នុងន័យនេះ លោក Mattis បានបរិហារលើការមើលងាយ មើលថោករបស់ចិនលើក្រុមប្រទេសជិតខាងមួយចំនួនក្នុងតំបន់ដែលកំពុងមានជម្លោះជាមួយខ្លួន។
ទោះជាយ៉ាងនេះក្តី លោក Mattis នៅតែសង្ឃឹមលើដំណោះស្រាយដោយសន្តិភាព និងបានអំពាវនាវដល់គ្រប់ភាគីជម្លោះទាំងអស់ក្នុងតំបន់ ពិសេសវៀតណាម ហ្វីលីពីន និងម៉ាឡេស៊ីឲ្យបន្តស្វែងរកដំណោះស្រាយជាមួយចិនតាមកិច្ចចរចា។ សូមជម្រាបជូនថា អាមេរិកគ្មានទាក់ទងនឹងជម្លោះនេះទេ តែវ៉ាស៊ីនតោនបានចេញមុខឈឺឆ្អាលដោយបានបញ្ជូននាវាចម្បាំងទៅកាន់តំបន់ដើម្បីបញ្ជាក់ពីការធ្វើចរាចរណ៍ដោយសេរីនៅក្នុងដែនទឹកអន្តរជាតិ។ តែចិនមិនបានយល់ឃើញដូចនេះទេ និងតែបញ្ចេញកំហឹងតបនឹងអាមេរិកវិញដោយបានបញ្ជូននាវាចម្បាំងទៅតតាំងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ