កូរ៉េខាងជើងបានបាញ់គ្រាប់មីស៊ីលជាថ្មីដោយមិនឈឺក្បាលនឹងលោកត្រាំ ឬទ័ណ្ឌកម្មអន្តរជាតិ
នៅថ្ងៃព្រហស្បតិ៍ ទី៨ មិថុនានេះ កូរ៉េខាងជើងបានបន្តផ្គើនសហគមន៍អន្តរជាតិដោយបានធ្វើការបាញ់សាកល្បងគ្រាប់មីស៊ីលជាថ្មី។ មានគ្រាប់មីស៊ីលបាញ់បានចម្ងាយជិតជាច្រើនគ្រាប់ត្រូវបានបាញ់ចេញពីឆ្នេរសមុទ្រ និងបានធ្លាក់ទៅក្នុងសមុទ្រជប៉ុន។ ក៏ដូចជាសព្វមួយដង ជប៉ុនតាមរយៈអ្នកនាំពាក្យក្រសួងការបរទេសលោកហ្វ៊ូមីយ៉ូ គីស្ហ៊ីដាបានថ្លែងថា ជប៉ុននឹងមិនអាចអនុគ្រោះឲ្យមានការបង្ករឿងរបៀបនេះទេ និងទទួលស្គាល់ថា ការបាញ់សាកល្បងគ្រាប់មីស៊ីលរបស់កូរ៉េលើកនេះមិនបានផ្តល់វិបាកភ្លាមៗដល់សន្តិសុខរបស់ជប៉ុនឡើយ។
ចុះផ្សាយនៅថ្ងៃ៖
ស្តាប់ - ០២:០៩
នៅមិនទាន់មានព័ត៌មានណាមួយដែលបញ្ជាក់ពីអត្តសញ្ញាណ និងចំនួនគ្រាប់មីស៊ីលពិតប្រាកដដែលកូរ៉េខាងជើងបានបាញ់ជាថ្មីនាថ្ងៃព្រហស្បតិ៍ ទី៨ មិថុនានេះទេ។ តែអ្វីដែលគេដឹង គ្រាប់មីស៊ីលជាច្រើនគ្រាប់ត្រូវបានកូរ៉េខាងជើងបាញ់ចេញពីកំពង់ផែ Wonsan ដែលបែរមុខចំប្រទេសជប៉ុន និងដែលសេនាធិការដ្ឋាននៃកងទ័ពកូរ៉េខាងត្បូងបានប្រាប់ឲ្យដឹងថា គ្រាប់មីស៊ីលទាំងនោះបានធ្លាក់ចូលក្នុងសមុទ្រជប៉ុន បន្ទាប់ពីហោះបានចម្ងាយ ២០០គីឡូម៉ែត្រ និងក្នុងកម្ពស់ ២គីឡូម៉ែត្រ។
ម្យ៉ាងទៀត គ្រាប់មីស៊ីលទាំងនោះត្រូវបានបាញ់ចេញពីនាវា ឬមួយក៏ពីនាវាមុជទឹក និងដែលគោលដៅរបស់គ្រាប់មីស៊ីលទាំងនេះសម្រាប់វាយប្រហារលើនាវា។ គេអាចនិយាយបានថា ការដែលកូរ៉េខាងជើងបានធ្វើការបាញ់សាកល្បងគ្រាប់មីស៊ីលប្រភេទនេះ គឺជាសារព្រមានមួយដែលរបបក្រុងព្យុងយ៉ាងចង់បញ្ជូនទៅកាន់ទីក្រុងវ៉ាស៊ីនតោន។ ការហ៊ានអះអាងយ៉ាងដូចនេះក៏ដោយសារថា ការបាញ់គ្រាប់មីស៊ីលប្រភេទនេះបានធ្វើឡើង មួយថ្ងៃក្រោយពីនាវាចម្បាំងពីរគ្រឿងរបស់អាមេរិកាំងទើបបានចាកចេញពីតំបន់នោះ។
តាមអ្នកនាំពាក្យរបស់សេនាធិការដ្ឋានកូរ៉េខាងត្បូង ការសាកល្បងគ្រាប់មីស៊ីលប្រភេទនេះហាក់មិនបានរំលោភលើសេចក្តីសម្រេចរបស់ក្រុមបប្រឹក្សាសន្តិសុខទេ ព្រោះសេចក្តីសម្រេចបានហាមតែការសាកល្បងគ្រាប់មីស៊ីលអន្តរទ្វីបប៉ុណ្ណោះ។ យ៉ាងណាក៏ដោយ ក្រុមអ្នកវិភាគនៅកូរ៉េខាងត្បូងបានយល់ឃើញថា ការដែលរបបក្រុងព្យុងយ៉ាងបន្តបាញ់សាកល្បងគ្រាប់មីស៊ីលគ្រប់បែប និងបាញ់ញឹកញាប់សឹងរាល់សប្តាហ៍ពេលនេះ គឺក្នុងបំណងទទួលបានកិច្ចចរចានាពេលខាងមុខ ពិសេសកិច្ចចរចាជាមួយកូរ៉េខាងត្បូងដែលលោកប្រធានាធិបតីថ្មីមូន ចៃអ៊ីនចង់បាន និងជាមួយអាមេរិកដែលលោកដូណាល់ ត្រាំធ្លាប់បានលើកឡើងនាពេលថ្មីកន្លងទៅ។
ដោយឡែក និងក៏ដូចជាសព្វមួយដង ជប៉ុនតាមរយៈអ្នកនាំពាក្យក្រសួងការបរទេសលោកហ្វ៊ូមីយ៉ូ គីស្ហ៊ីដាបានថ្លែងថា ជប៉ុននឹងមិនអាចអនុគ្រោះឲ្យមានការបង្ករឿងរបៀបនេះ និងទទួលស្គាល់ថា ទង្វើរបស់កូរ៉េខាងជើងលើកនេះមិនបានផ្តល់វិបាកភ្លាមៗដល់សន្តិសុខរបស់ជប៉ុនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ