និស្សិតអាមេរិកដែលព្យុងយ៉ាងកាត់ទោសឱ្យជាប់ពន្ធនាគារ១៥ឆ្នាំ បានរួចខ្លួន
Otto Warmbier និស្សិតអាមេរិក អាយុ២២ឆ្នាំ ជាប់ទោសធ្វើការជាទម្ងន់ រយៈពេល១៥ឆ្នាំនៅកូរ៉េខាងជើង ពីបទបានលួចក្រដាសឃោសនាបិទនៅជញ្ជាំងសណ្ឋាគារ បានរួចខ្លួនមានសេរីភាព និងបញ្ជូនមកដល់សហរដ្ឋអាមេរិកវិញហើយ។ ប៉ុន្តែនិស្សិតរូបនេះស្ថិតក្នុងស្ថានភាព ដូចមនុស្សស្លាប់។ តាមការពិត Otto Warmbier បានធ្លាក់ខ្លួនឈឺសន្លប់ បាត់ស្មារតី តាំងពីជាងមួយឆ្នាំមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
យន្តហោះយោធាអាមេរិកបានដឹក Otto Warmbier មកដល់ រដ្ឋOhio និងបញ្ចូនភ្លាមទៅកាន់មន្ទីរពេទ្យ។ អ្នកជាឪពុកម្តាយ ដែលជាបានជូនដំណឹងមុនគេអំពីសេរីភាពរបស់ Otto Warmbier ទើបដឹង ថាកូនមានជំងឺជាទម្ងន់ដល់សន្លប់បាត់ស្មារតី កាលពីសប្តាហ៍មុននេះតែប៉ុណ្ណោះ។
បើតាមសារព័ត៌មានWashington Post Otto Warmbier ទំនងជាធ្លាក់ខ្លួនមានជំងឺ Botulisme ជំងឺប៉ះពាល់ដល់ប្រព័ន្ធប្រសាទ ដោយសារជាតិពុលកំណាចម្យ៉ាង ចម្លងដោយបាក់តេរី ក្នុងអាហារ នៅក្រោយការកាត់ទោស កាលពីខែមីនា ២០១៦បន្តិច ហើយក៏ត្រូវបានពេទ្យកូរ៉េខាងជើង ដាក់ថ្នាំឱ្យដេកសន្លប់បាត់ស្មារតីរហូតមកទល់ពេលនេះ។
លោក Bill Richardson អន្តរការី ទទួលបន្ទុកចរចាដោះលែងអ្នកទោសអាមេរិកនៅកូរ៉េខាងជើង និងនិស្សិតOtto Warmbierផ្ទាល់ បានចេញសេចក្តីថ្លែងការណ៍មួយទាមទារឱ្យព្យុងយ៉ាងពន្យល់លម្អិតអំពីមូលហេតុនៃការធ្លាក់ខ្លួនសន្លប់របស់Otto Warmbier។
សូមបញ្ជាក់ថា និស្សិត Otto Warmbier ដែលធ្វើដំណើរទៅកូរ៉េខាងជើង តាមតួកំសាន្តបេលបុណ្យចូលឆ្នាំ ត្រូវបានតុលាការកំពូលកូរ៉េខាងជើង កាត់ទោសឱ្យជាប់ពន្ធនាគារនិងធ្វើពលកម្មជាទម្ងន់រយៈពេល១៥ឆ្នាំ ពីបទបានលួចក្រដាសឃោសនានយោបាយដែលគេបិទនៅលើជញ្ជាំងសណ្ឋាគារ តែសម្រាប់ព្យុងយ៉ាង សកម្មភាពបែបនេះ ជាបទវិទ្ធង្សនាប្រឆាំងនឹងរបបកុម្មុយនិស្ត។ នៅក្នុងពេលកាត់ក្តី ដែលប្រព្រឹត្តទៅក្នុងរយៈពេលមិនដល់មួយម៉ោងផង Otto Warmbierបានសារភាពថាបានធ្វើទង្វើខុសឆ្គងធ្ងន់ធ្ងរបំផុតនៃជីវិត។
ក្នុងរយៈពេល១០ឆ្នាំចុងក្រោយនេះ មានជនជាតិអាមេរិកយ៉ាងហោចណាស់ ១៧នាក់ ត្រូវបានព្យុងយ៉ាងចាប់ ក្នុងនោះបីនាក់ កំពុងស្ថិតក្រោយចំរ៉ឹងដែកនៅឡើយ។ លោកប្រមុខការទូតអាមេរិក Rix Tillerson បានអះអាងថាកំពុងតែបន្តការចរចាជាមួយព្យុងយ៉ាងដើម្បីសេរីភាពពលរដ្ឋអាមេរិកបីនាក់នោះ តែបដិសេធមិនធ្វើអត្ថាធិប្បាយអ្វីទាំងអស់ ទាក់ទងស្ថានភាពសុខភាពរបស់Otto Warmbier។ ការដោះលែងOtto Warmbier ប្រព្រឹត្តទៅក្នុងខណៈដែលអតីតតារាកីឡាករបាល់បោះអាមេរិក Dennis Rodman ធ្វើដំណើរទៅកូរ៉េខាងជើង ដើម្បីសួរសុខទុក្ខ “មិត្ត” គឺ គីមជុងអ៊ុន។ ប៉ុន្តែរដ្ឋាបាលលោកត្រាំ បានអះអាងថាទស្សនកិច្ចរបស់ Rodman ជាកិច្ចការឯកជន គ្មានអ្វីពាក់ព័ន្ធនឹងករណីOtto Warmbierទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ