អាមេរិកទាមទារឲ្យចិនដាក់សម្ពាធបន្ថែមទៀត លើកូរ៉េខាងជើង
សហរដ្ឋអាមេរិកបានទាមទារនៅថ្ងៃពុធម្សិលមិញ ឲ្យប្រទេសចិន បង្កើនការដាក់សម្ពាធទាំងផ្នែក សេដ្ឋកិច្ច និងការទូតទៅលើកូរ៉េខាងជើង ដើម្បីឲ្យប្រទេសនេះ លះបង់ចោលកម្មវិធីផលិតអាវុធនុយក្លេអ៊ែរ និងមីស៊ីលបាលីស្ទីក។ អាមេរិកបានទាមទារយ៉ាងដូច្នេះ នៅក្នុងឱកាសដែលរដ្ឋមន្រ្តីការបរទេស និងការពារជាតិអាមេរិកបានទទួលជួប មេទ័ព ហើយនិងប្រមុខការបរទេសចិន នៅទីក្រុងវ៉ាស៊ីនតោន។
ចុះផ្សាយនៅថ្ងៃ៖
ជំនួបថ្នាក់រដ្ឋមន្រ្តីការបរទេសចិន និងអាមេរិក រៀបចំឡើងបន្តពីជំនួប រវាងប្រធានាធិបតីចិន និងលោកដូណាល់ ត្រាំ នៅរដ្ឋហ្លរីដា កាលពីខែមេសាកន្លងទៅ។ កម្មវិធីផលិតអាវុធនុយក្លេអ៊ែររបស់កូរ៉េខាងជើងជាប្រធានបទ ដែលភាគីចិន និងអាមេរិក បានលើកយកមកដាក់លើតុពិភាក្សា។
នៅថ្ងៃពុធម្សិលមិញ នៅក្នុងសន្និសីទកាសែតដ៏ខ្លី លោកប្រមុខការបរទេសអាមេរិក រេច ធីល័រសុន បាននិយាយថា ភាគីអាមេរិកបានបញ្ជាក់សាជាថ្មីទៅចិនថា ចិនមានចំណែកទទួលខុសត្រូវដ៏សំខាន់ ក្នុងការដាក់គំនាបទៅលើកូរ៉េខាងជើង ទាំងផ្នែកសេដ្ឋកិច្ច និងការទូត។ រដ្ឋមន្រ្តីការបរទេសអាមេរិក សង្ឃឹមដែរថា ចិននឹងចាត់វិធានការបិទខ្ទប់សកម្មភាពរបស់ពួកឧក្រិដ្ឋជន តួយ៉ាងដូចជាការលាងលុយកខ្វក់ ការវាយប្រហារអ៊ីនធ័រនែត ឬការចាប់ជំរិតយកលុយ ដែលកូរ៉េខាងជើង បានអនុវត្តរហូតមក ដើម្បីបានប្រាក់យកទៅអភិវឌ្ឍកម្មវិធីអាវុធនុយក្លេអ៊ែរ។
នៅក្នុងក្របខ័ណ្ឌដាក់ទណ្ឌកម្មសេដ្ឋកិច្ចរបស់ ក្រុមប្រឹក្សាសន្តិសុខ ចិនបានផ្អាក ការទិញ នាំចូលធ្យូងថ្មពីកូរ៉េខាងជើង ប៉ុន្តែ អ្នកជំនាញជាច្រើនសុទ្ធតែយល់ថា ចិននៅមិនទាន់ត្រៀមខ្លួន ដើម្បីដាក់ទណ្ឌកម្មថ្មី បន្ថែម ដែលនឹងអាចគំរាមកំហែងដល់ស្ថិរភាពរបស់ប្រទេសជិតខាងខ្លួន នោះទេ។
នៅក្នុងសំណុំរឿងនុយក្លេអ៊ែរកូរ៉េខាងជើង ប៉េកាំង និងវ៉ាស៊ីនតោនបានពិភាក្សា គ្នារបៀបតម្លង់៧សណ្តាន។ អាមេរិកបានទាមទារឲ្យចិន ដែលជាសម្ព័ន្ធមិត្តសំខាន់របស់កូរ៉េខាងជើង ដាក់គំនាបហិរញ្ញវត្ថុទៅលើកូរ៉េខាងជើង ប៉ុន្តែ ចិនឯណោះវិញ បានទាមទារឲ្យអាមេរិកដកចេញទៅវិញ ប្រព័ន្ធខែលមីស៊ីល របស់អាមេរិកនៅកូរ៉េខាងត្បូង ដែលចិនចាត់ទុកថា ជាការគំរាមកំហែងដល់ប្រព័ន្ធការពារសន្តិសុខជាតិចិន។ នេះបើតាមសេចក្តីថ្លែងការណ៍របស់ក្រសួងការបរទេសចិន។ នៅក្នុងសំណុំរឿងនុយក្លេអ៊ែរកូរ៉េខាងជើង ទីក្រុងប៉េកាំងអំពាវនាវសាជាថ្មី ចង់ឲ្យមានការចរចាតាមវិធីសាស្រ្ត ដែលនៅក្នុងនោះកូរ៉េខាងជើងយល់ព្រមផ្អាកកម្មវិធីផលិតអាវុធនុយក្លេអ៊ែរ និងមីស៊ីលបាលីស្ទីក ចំណែកអាមេរិក និងកូរ៉េខាងត្បូងក៏ត្រូវបញ្ឈប់សមយុទ្ធរួមគ្នា រវាងប្រទេសទាំងពីរ។
វ៉ាស៊ីនតោនធ្វើមិនលឺ មិនឆ្លើយតបនឹងសំណើរបស់ប៉េកាំង។ ប្រជាជនអាមេរិកាំងហាក់លែងមានភាពអត់ធ្មត់ និងខឹងខ្លាំងណាស់ នៅក្រោយនិស្សិតអាមេរិកាំង អូតូ វ៉មបៀរ បានស្លាប់ នៅថ្ងៃចន្ទ បន្ទាប់ពីត្រូវបានកូរ៉េខាងជើង ដោះលែង នៅថ្ងៃទី១៣មិថុនា។ នៅថ្ងៃពុធម្សិលមិញ លោកដូណាល់ ត្រាំ បានសម្រេចជានិមិត្តរូប ពន្យារកម្រិតប្រកាសអាសន្នជាតិ ដើម្បី ប្រឈមទៅនឹងកូរ៉េខាងជើង ដែលត្រូវបានបង្កើតឡើង លើកដំបូងដោយលោកW Bush នៅឆ្នាំ ២០០៨។ នៅក្នុងលិខិតផ្ញើទៅកាន់សភាលោកដូណាល់ ត្រាំ បានពន្យល់ថា ការគំរាមកំហែងរបស់កូរ៉េខាងជើង ទៅលើសន្តិសុខជាតិ សេដ្ឋកិច្ច និងនយោបាយការបរទេសអាមេរិក មានលក្ខណៈធំធេង និងខុសពីធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ