ប្រធានាធិបតិចិន ស៊ីជីនពីង នឹងអញ្ជើញទៅហុងកុង ជាលើកទីមួយ នៅសប្តាហ៍ក្រោយ
លោក ស៊ីជីនពីង ប្រធានាធិបតីចិន នឹងអញ្ជើញទៅបំពេញទស្សនកិច្ច នៅហុងកុង ជាលើកដំបូង គិតចាប់ពីលោកឡើងកាន់តំណែងនៅឆ្នាំ២០១៣មក។ ដំណើរទស្សនកិច្ច ដែលប្រព្រឹត្តទៅ ចំឱកាសប្រារព្វខួប ២០ឆ្នាំនៃការប្រគល់ទឹកដីហុងកុងមកឱ្យចិនកាន់កាប់វិញ អាចនឹងបញ្ចេះឱ្យមានភាពតានតឹងខ្លាំង ព្រោះពលរដ្ឋហុងកុងភាគច្រើន យល់ថាប៉េកាំង កំពុងលូកដៃកាន់ជ្រៅមកក្រសោបដែនកោះ និង លេបត្របាក់សេរីភាពហុងកុងកាន់តែខ្លាំងឡើងៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
គ្រប់គ្នារង់ចាំដំណើរទស្សនកិច្ចលើកដំបូងរបស់លោកប្រធានាធិបតីស៊ីជិនពីង នៅហុងកុងនាឱកាសថ្ងៃខួប២០ឆ្នាំនៃការបញ្ចប់អាណានិគមកិច្ចអង់គ្លេសលើហុងកុងណាស់ ប៉ុន្តែគ្មានអ្នកទទួលខុសត្រូវនយោបាយណាម្នាក់ហ៊ានអះអាង ដោយច្បាស់លាស់ទេនៅដំណាក់កាលនេះ។ អ្នកនាំពាក្យរដ្ឋាភិបាលក៏បានបដិសេធមិនធ្វើអត្ថាធិប្បាយអ្វីដែរ !
ប៉ុន្តែបើតាមសារព័ត៌មាន South China Morning Post ប្រធានាធិបតីចិន ស៊ីជីនពីង ពិតជានឹងអញ្ជើញទៅហុងកុងជាលើកទីមួយមែន ដោយនឹងអញ្ជើញទៅត្រួតពិនិត្យមូលដ្ឋានយោធានៃកងទ័ពប្រជាមានិតចិន នៅភាគកណ្តាលនៃកោះផង និងការដ្ឋានសាងសង់ដែលជាផែនការដ៏សំខាន់ៗផង។ លោក ស៊ី ជីនពីង និងភរិយា នឹងទៅដល់ហុងកុង នៅថ្ងៃព្រហស្បតិ៍ទី ២៩មិថុនា រហូតដល់ថ្ងៃទី ១ កក្កដា ដែលត្រូវចំថ្ងៃខួប២០ឆ្នាំគត់នៃការប្រគល់ហុងកុងមកឱ្យចិនវិញ។ នេះបើតាមលម្អិតរបស់សារព័ត៌មានដដែល។
ដំណើរទស្សនកិច្ចនេះ ប្រព្រឹត្តទៅជួនចំពេលដែលបណ្តាជនហុងកុងជាច្រើន មានអារម្មណ៍ថាប៉េកាំងកំពុងពង្រឹងឥទ្ធិពលគ្របដណ្តប់លើដែនកោះ។ ក្តីព្រួយបារម្ភរីកធំធាត់ខ្លាំង រហូតដល់ក្រុមអ្នកជ្រុលនិយមខ្លះចង់ប៉ះបោរទាមទារឯករាជ្យឱ្យហុងកុងតែម្តង។ ចលនាបាតុកម្មស្វាគមន៍ដំណើរមកដល់របស់លោក ស៊ីជីនពីង បានត្រៀមចុះថ្នល់ជាស្រេចហើយ !
សូមបញ្ជាក់ថា ឡុងដ៍បានប្រគល់ហុងកុងឱ្យចិនគ្រប់គ្រងវិញនៅឆ្នាំ១៩៩៧ ជាមួយកិច្ចសន្យាធានាសេរីភាពហុងកុង តាមគោលការណ៍ រដ្ឋមួយប្រព័ន្ធពីរ។ ហុងកុងត្រូវស្ថិតក្នុងលក្ខន្តិកៈពិសេសនេះ រយៈពេល៥០ឆ្នាំ ពោលគឺហុងកុង ជាតំបន់មានសេរីភាពខ្លាំងជាងគេបង្អស់នៅចិនរហូតដល់ឆ្នាំ២០៤៧។ ប៉ុន្តែបើយោលទៅលើឥទ្ធិពល និងទង្វើលូកដៃរបស់ប៉េកាំង មកលើហុងកុង តាមរយៈការធ្វើកំណែទម្រង់នយោបាយ រារាំងអ្នកជាតិនិយមជ្រុលមិនឱ្យចូលអង្គុយលើអសនៈសភានៅហុងកុង គោលការណ៍នេះ ហាក់កំពុងផ្អៀង ទៅខាង “រដ្ឋតែមួយ” ជាងខាង “ប្រព័ន្ធពីរ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ