ចិន ៖ សកម្មជនប្រឆាំង ជាជ័យលាភីណូបែលសន្តិភាពបានសេរីភាពព្រោះមានជំងឺជាទម្ងន់
លោក លីវ ស៊ាវប៉ូ Liu Xiaobo សកម្មជនប្រឆាំងនឹងរដ្ឋអំណាចចិន និងជាជ័យលាភីរង្វាន់ណូបែលសន្តិភាពឆ្នាំ២០១០ ត្រូវបានអាជ្ញាធរប៉េកាំងដោះលែងឱ្យមានសេរីភាព កាលពីចុងខែឧសភា ដោយមូលហេតុសុខភាព។ តែព័ត៌មាននេះ ទើបទម្លាយបញ្ជាក់ នៅថ្ងៃទី ២៦មិថុនា ដោយអង្គការការពារសិទ្ធិមនុស្ស ។ ជ័យលាភីរង្វាន់ណូបែលសន្តិភាព មានផ្ទុកជំងឺមហារីកថ្លើម ដំណាក់កាលចុងក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
លទ្ធផលនៃការវិភាគសុខភាព បានធ្លាក់មក នៅថ្ងៃទី ២៣ ឧសភា និងបង្ហាញថា លោក លីវ ស៊ាវប៉ូ មានជំងឺមហារីកថ្លើមជាទម្ងន់ ដំណាក់កាលចុងក្រោយមក។ ខាងមណ្ឌលឃុំឃាំងក៏បានសម្រេចដោះលែងសកម្មជនបះបោរម្នាក់នេះឱ្យទៅសម្រាកព្យាបាលនៅមន្ទីរពេទ្យ ក្នុងភាគឦសានប្រទេស។ នេះបើតាមការលម្អិតបន្ថែមរបស់មេធាវី។
គ្រាន់តែបានឮដំណឹងនេះភ្លាម តំណាងអង្គការក្រៅរដ្ឋាភិបាល អង្គការការពារសិទ្ធិមនុស្ស បានទាមទារឱ្យប៉េកាំង ដោះលែង លោក លី ស៊ាវប៉ូ ដោយឥតលក្ខខណ្ឌ ដើម្បីឱ្យគាត់អាចចាកចេញទៅបរទេស និងទទួលបានការព្យាបាលត្រឹមត្រូវ។ ប៉ុន្តែវាទំនងជាយឺតពេលបន្តិចហើយ ! បើតាមអ្នកស្រីជាភរិយា ស្ថានភាពសុខភាពលោក លីវ ស៊ាវប៉ូ ធ្លាក់ដុនដាបខ្លាំង មិនអាចទទួលការវះកាត់ និងការព្យាបាលដោយគីមី-វិទ្យុសកម្ម បានទេ។
មានអាយុ៦១ឆ្នាំ លោក លីវ ស៊ាវប៉ូ ត្រូវបានតុលាការចិនកាត់ទោសឱ្យជាប់ពន្ធនាគារ ១១ឆ្នាំ ពីបទវិទ្ធង្សនា តាំងពីឆ្នាំ២០០៩មក បន្ទាប់ពីបានចូលរួមតាក់តែងធម្មនុញ្ញលេខ ០៨ ដែលជំរុញឱ្យមានការគោរពសិទ្ធិមនុស្ស និងធ្វើកំណែទម្រង់នយោបាយតាមលទ្ធិប្រជាធិបតេយ្យដោយរៀបចំឱ្យមានការបោះឆ្នោតនៅចិន រំលាយប្រព័ន្ធនយោបាយបក្សតែមួយចោល។
នៅឆ្នាំ១៩៨៩ ក្នុងពេលមានផ្ទុះចលនានិស្សិតនៅទីលាន ធានអាន់មែន លោក លីវ ស៊ាវប៉ូ ក៏បានចូលធ្វើអន្តរាគមន៍ ដោយហ៊ានចេញមុខទៅចរចាជម្លៀសយុវនិស្សិតរាប់ពាន់នាក់ ក្នុងពេលដែលទាហានហៀបនឹងចូលបង្ក្រាប។ ការបង្ក្រាបបង្ហូរឈាមដែលបណ្តាលឱ្យនិស្សិតជាច្រើនរយនាក់បាត់បង់ជីវិត។ ឯរូបលោកផ្ទាល់ ក៏ត្រូវទទួលទោសជាប់ពន្ធនាគារ និងទណ្ឌកម្មធ្វើការជាទម្ងន់រយៈពេលបីឆ្នាំពីឆ្នាំ ១៩៩៦-១៩៩៩។
ក្រោយការដោះលែងឲ្យមានសេរីភាព បាត់បង់មុខងារជាសាស្ត្រាចារ្យ ប៉ុន្តែលោក លីវ ស៊ាវប៉ូ នៅតែបន្តដឹកនាំចលនាតវ៉ានានាដើម្បី ប្រយោជន៍របស់ប្រជាកសិករចិន និងនិស្សិតដែលត្រូវគេបិទសិទ្ធិសេរីភាពមិនឲ្យបញ្ចេញមតិ ព្រមទាំងបន្តរក្សាទំនាក់ទំនងជាមួយនឹងបញ្ញាវន្តចិនដទៃទៀត និងបន្តសរសេរសៀវភៅ។ សៀវភៅភាគច្រើនរបស់លោកត្រូវអាជ្ញាធរហាមឃាត់មិនឲ្យបោះពុម្ពផ្សាយ ក្នុងប្រទេសចិនទេ។
សកម្មភាពប្រឆាំងជាបន្តបន្ទាប់នេះ បានធ្វើលោក លីវ ស៊ាវប៉ូត្រូវគេបញ្ចូនឲ្យទៅរៀនសូត្រ និងរស់នៅក្នុងការតាមឃ្លាំមើលពីសំណាក់អាជ្ញាធរចិនជានិច្ច។
នៅឆ្នាំ២០១០ គណៈកម្មការណូបែលរបស់ន័រវែស បានសម្រេចប្រគល់ លោក លីវ ស៊ាវប៉ូ បានទទួលជ័យលាភីណូបែលសន្តិភាព។ អាជ្ញាធរចិនក្រេវក្រោធ ក៏បានឃុំឃាំងភរិយាលោក នៅក្នុងគេហដ្ឋាន តាំងពីនោះមកទល់នឹងថ្ងៃនេះ បើទោះបីអ្នកស្រីគ្មានជាប់ចោទអ្វីជាផ្លូវការសោះក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ