ប្រទេសហូឡង់សម្ពោធស្តូបរំលឺកខួប៣ឆ្នាំនៃការធ្លាក់យន្តហោះម៉ាឡេស៊ី MH17
ថ្ងៃចន្ទ១៧កក្កដានេះ ជាថ្ងៃខួប៣ឆ្នាំនៃការធ្លាក់យន្តហោះបូអ៊ីងម៉ាឡេស៊ី នៅភាគ ខាងកើតអ៊ុយក្រែន ដែលបានសម្លាប់មនុស្ស២៩៨នាក់។ ថ្ងៃនេះ ប្រទេសហូឡង់សម្ពោធស្តូបរំលឺកខួបនេះ ដោយមានវត្តមានចូលរួមរបស់សមាជិកគ្រួសារជនរងគ្រោះជិត២០០០នាក់។ គេសង្ស័យថា ៣ឆ្នាំមុននេះ យន្តហោះម៉ាឡេស៊ី ប្រហែលជាបានរងមីស៊ីលបាញ់ចេញពីរុស្ស៊ី។ នៅមិនទាន់មានជនសង្ស័យពាក់ព័ន្ធនឹងការធ្លាក់យន្តហោះណាម្នាក់ត្រូវចាប់ខ្លួនបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ដើមឈើ២៩៨ដើម ត្រូវបានបណ្តុះលេចឡើង ក្នងប្រទេសហូឡង់ បង្កើតជាស្តូបអនុស្សាវរីយ៍ ឧទ្ទិសដល់ជនរងគ្រោះ២៩៨នាក់ ដែលបានស្លាប់ក្នុងការធ្លាក់យន្តហោះម៉ាឡេស៊ី នៅភាគខាងកើតអ៊ុយក្រែន កាលពី៣ឆ្នាំមុន។ គ្រោះថ្នាក់នេះបានសម្លាប់មនុស្ស២៩៨នាក់ ជាពលរដ្ឋមកពី១៧ប្រទេស មានដូចជាអូស្ត្រាលី ម៉ាឡេស៊ី អង់គ្លេស អាល្លឺម៉ង់ រឺក៏ឥណ្ឌូណេស៊ី។ ពលរដ្ឋហូឡង់ស្លាប់ច្រើនជាងគេ គឺដល់ទៅ១៩៦នាក់។
ថ្ងៃចន្ទ១៧កក្កដានេះ ព្រះមហាក្សត្រប្រទេសហូឡង់ អាឡិចសាន់ដឺ និងព្រះមហេសី ម៉ាក់ស៊ីម៉ា ជាអ្នកសម្ពោធស្តូបរំលឹកខួប៣ឆ្នាំ នៃការធ្លាក់យន្តហោះបូអ៊ីងម៉ាឡេស៊ី ដោយមានវត្តមានសមាជិកគ្រួសារជនរងគ្រោះជិត២០០នាក់។ ស្តូបអនុស្សាវរីយ៍នេះ អាចកើតចេញបានដោយសារមានមូលនិធិជំនួយ ហើយគម្រោងស្តូបនេះ ជាស្នាដៃរបស់វិចិត្រករ Ronald A. Westerhuis រ៉ូណាល់ អេ វេស្ទើរហោយ និងវិស្វករផ្នែកទេសភាព Robbert de Koning ក្នុងចំណោមគំរោងសរុបចំនួន៣។
ដោយឡែក នៅទីកន្លែងធ្លាក់យន្តហោះ ភាគខាងកើតអ៊ុយក្រែន ថ្ងៃនេះ ក៏មានរំលឹកខួប៣ឆ្នាំនេះដែរ ដោយមានមនុស្សជិត៥០០នាក់បានចូលរួមឧទ្ទិសដល់ជនរងគ្រោះ។
សូមរំលឹកថា កាលពីថ្ងៃ១៧កក្កដា ឆ្នាំ២០១៤ យន្តហោះម៉ាឡេស៊ីជើងហោះហើរ MH-17 ភ្ជាប់ទីក្រុងអាស្ទែរដាំ ប្រទេសហូឡង់ ទៅកូឡាឡុំពួរ បានធ្លាក់នៅតំបន់ជម្លោះភាគខាងកើតអ៊ុយក្រែន ជាតំបន់កាន់កាប់ដោយក្រុមឧទ្ទាម។ អ្នកដំណើរ២៨៣នាក់ និងបុគ្គលិកយន្តហោះ១៥នាក់ បានស្លាប់ក្នុងហេតុការណ៍នេះ។ គេសង្ស័យថា យន្តហោះម៉ាឡេស៊ីប្រហែលជាបានរងមីស៊ីលរបស់រុស្ស៊ី។ យោងតាមការស៊ើបអង្កេតសមូហភាពអន្តរជាតិឯករាជ្យ យន្តហោះម៉ាឡេស៊ីរងមីស៊ីលប្រភេទBuk ដែលដឺកចេញពីប៉ែកខាងត្បូងរុស្ស៊ី ទៅព្រំប្រទល់អ៊ុយក្រែន។ ពេលនេះ ប៉ូលិសកំពុងរកមុខមនុស្សជាង១០០នាក់ដែលជាប់សង្ស័យថាពាក់ព័ន្ធនឹងការធ្លាក់យន្តហោះម៉ាឡេស៊ី។
ថ្មីៗនេះ មេធាវីគ្រួសារជនរងគ្រោះម៉ាឡេស៊ី បានទាមទារអោយប្រធានាធិបតីរុស្ស៊ី ទទួលខុសត្រូវ។ ប្រធានាធិបតីអ៊ុយក្រែនប៉ូរ៉ូឆិនកូវិញ ថ្ងៃចន្ទនេះ ក៏បានទាមទារអោយរុស្ស៊ីផ្តល់ចម្លើយផងដែរ។ កន្លងមក រុស្ស៊ីតែងបដិសេធថា មិនបានជាប់ពាក់ព័ន្ធហេតុការណ៍ធ្លាក់យន្តហោះម៉ាឡេស៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ