អាហ្វហ្កានីស្ថាន ត្រូវរងដោយការវាយប្រហារភេរវកម្មដ៏ធ្ងន់ធ្ងរមួយនៅព្រឹកព្រលឹមថ្ងៃចន្ទនេះ
នៅអាហ្វហ្កានីស្ថាន ទីក្រុងកាប៊ូល ត្រូវរងការវាយប្រហារដោយការបំផ្ទុះរថយន្តបង្កប់គ្រាប់បែកនៅព្រឹកព្រលឹមថ្ងៃចន្ទនេះ។ ផ្ទាំងស៊ីបនៃការវាយប្រហារគឺ សំដៅទៅលើសហគមន៍ជនជាតិភាគតិច Hazara ដែលជាអ្នកកាន់សាសនាអ៊ីស្លាមនិកាយ Chiite។ ភ្លាមៗនោះ ពួកតាលីបង់បានប្រកាសថាការវាយប្រហារនោះ ជាស្នាដៃរបស់ពួកគេ និងដែលបានសម្លាប់មនុស្សយ៉ាងតិច ២៤នាក់និងរងរបួសជាង៤០នាក់ផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
យោងតាមក្រសួងមហាផ្ទៃអាហ្វហ្កានីស្ថាន មនុស្សចំនួន២៤នាក់ ត្រូវស្លាប់នៅនិង៤២នាក់ផ្សេងទៀត ត្រូវរងរបួសនៅក្នុងអំពើភេរវកម្មកាលពីព្រឹកថ្ងៃចន្ទនេះនៅខាងលិចទីក្រុងកាប៊ូល។ ភេរវករដែលបើកបររថយន្តបង្កប់គ្រាប់បែក បានបោះពួយយ៉ាងគម្រោលប្រឆាំងទៅលើរថយន្តក្រុងមួយគ្រឿងដែលដឹកបុគ្គលិកក្រសូងរ៉ែអាហ្វហ្កានីស្ថាន-នេះជាការថ្លែងរបស់អ្នកនាំពាក្យម្នាក់នៃក្រសួងរ៉ែ ប្រាប់ដល់ទីភា្នក់ងារសាព័ត៌មានបារាំង AFP។
ភ្លាមៗនោះ ពួកអ៊ីស្លាមជ្រុលនិយមតាលីបង់ បានស្រែកប្រកាសតាមគណនី Twitter របស់ខ្លួន ថាជាការវាយប្រហាររបស់ពួកគេ ប្រឆាំងទៅលើរថយន្តក្រុងមួយដែលដឹកសមាជិកក្រសួងស៊ើបការសម្ងាត់អាហ្វហ្កានីស្ថាននិងបានបណ្តាលឲ្យស្លាប់ជនចំនួន៣៧នាក់ដែលស្ថិតនៅក្នុងចំណោមសមាជិករបស់ក្រសួងស៊ើបការសម្ងាត់នេះ។
គួរបញ្ជាក់ថា អំពើភេរវកម្មនៅព្រឹកមិញនេះ ត្រូវបានប្រព្រឹត្តទៅនៅក្នុងសង្កាត់ដ៏កុះករមួយក្នុងទីក្រុងកាប៊ូលដែលជាសង្កាត់នៃសហគមន៍ជនជាតិភាគតិច Hazara អ្នកកាន់សាសនាអ៊ីស្លាមនិកាយ Chiite។ ម្យ៉ាងទៀតនៅ ទីនោះ ក៏ជាទី ប្រជុំទៅដោយទីកន្លែងក្លឹបហាត់ប្រាណ ស្ថាប័ននានា ហាងលក់ទំនិញ ក៏ព្រមទាំងសាលនានា សម្រាប់ការរៀបចំពិធីមង្គលការផង។
គួររំលឹកថា ជនរងគ្រោះនៅក្នុងការវាយប្រហារនាព្រឹកមិញ សុទ្ធស៊ឹងជាប្រជាជនស៊ីវីលអាហ្វហ្កានីស្ថានដែលក្នុងចំណោមនោះ ក៏មានពួកនិស្សិតដែលងើបតាំងពីព្រឹលឹមដើម្បីធ្វើដំណើរទៅកាន់សាកលវិទ្យាល័យក្នុងអំឡុងពេលនៃការប្រឡង ក៏ព្រមទាំងឆ្មាំសន្តិសុខការពារលំនៅឋានរបស់មេដឹកនាំដ៏សំខាន់មួយរូបនៃហគមន៍ Hazara នេះ និង របស់លោក Mohaqeq ដែលជាសមាជិកមួយរូបរបស់សភាអាហ្វហ្កានិស្ថាន។ អ្នកនាំពាក្យរបស់លោក Mohaqeq បានថ្លែងបញ្ជាក់ប្រាប់ដល់ទីភ្នាក់ងារព័ត៌មាន បារាំង AFP ថា -រថយន្តបង្កប់គ្រាប់បែក បានផ្ទុះឡើងនៅចំពីមុខប៉ុស្តិ៍យាមល្បាតត្រួតពិនិត្យទីមួយនៃតំបន់លំនៅដ្ឋានរបស់លោក Mohaqeq ជាហេតុបណ្តាលឲ្យស្លាប់និងរងរបួសមនុស្សជាច្រើននាក់ក្នុងចំណោមនោះ ក៏មានឆាំ្មសន្តិសុខនិងប្រជាជនស៊ីវីលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ