IMF៖សេដ្ឋកិច្ចពិភពលោកជួបកំនើនល្អដូចគ្រោងទុក លើកលែងសហរដ្ឋអាមេរិក
តួលេខកំនើនសេដ្ឋកិច្ចក្នុងពិភពលោក ដែលអង្គការមូលនិធិរូបិយវត្ថុអន្តរជាតិIMF បានប្រកាសកាលពីខែមេសា មិនបានផ្លាស់ប្តូរទេ គឺមាន៣,៥ភាគរយ សម្រាប់ឆ្នាំ២០១៧នេះ ដូចការគ្រោងទុក។ ដោយឡែក សហរដ្ឋអាមេរិកនិងអង់គ្លេសអាចជួបកំនើនយឺតយ៉ាវ។
ចុះផ្សាយនៅថ្ងៃ៖
អង្គការIMFបានផ្ទៀងផ្ទាត់មើលឡើងវិញ នូវតួលេខកំនើនដែលបានគ្រោងទុក កាលពីខែមេសា។ អង្គការIMF រំពឹងជារួមថា សេដ្ឋកិច្ចពិភពលោក ជួបកំនើនល្អ គឺក្នុងតួលេខ៣,៥ភាគរយ សម្រាប់ឆ្នាំ២០១៧នេះ ហើយនឹងអាចកើនដល់៣,៦ភាគរយ សម្រាប់ឆ្នាំ២០១៨។ មូលហេតុនៃកំនើន គឺដោយសារដំណើរការឧស្សាហកម្មនិងពាណិជ្ជកម្មពិភពលោកចេះតែបន្តរីកទៅមុខ។
ប្រទេសតំបន់ចាយប្រាក់អឺរ៉ូ ជួបកំនើន១,៩ភាគរយ ឆ្នាំ២០១៧ និង១,៧ភាគរយ ឆ្នាំ២០១៨ ជាតួលេខខ្ពស់ជាងការគ្រោងទុក ត្រូវនឹង០,២ពិន្ទុ និង០,១ពិន្ទុបន្ថែម។ ឆ្នាំ២០១៧នេះ ប្រទេសជាច្រើនដូចជាប្រទេសក្នុងតំបន់អឺរ៉ូជួបកំនើនខ្ពស់ជាងការគ្រោងទុកទៅទៀត បែបយ៉ាងអេស្ប៉ាញ រឺក៏អ៊ីតាលីជាដើម។ បារាំងនិងអាល្លឺម៉ង់ក៏មានកំនើនដែរ។
ប៉ុន្តែ សហរដ្ឋអាមេរិកអាចជួបកំនើនយឺតយ៉ាវ ព្រោះរដ្ឋបាលលោកដូណាល់ ត្រាំ ទំនងជាមិនសូវចាយវាយថវិកាច្រើនទេ។ កំនើននៅសហរដ្ឋអាមេរិក មាន២,១ភាគរយ សម្រាប់ឆ្នាំ២០១៧ នឹង២០១៨ គីតទៅ គឺយឺតយ៉ាវ មិនដូចតួលេខកំនើនដែលIMF បានគ្រោងទុក កាលពីខែមេសាទេ។ ខែមេសា IMFបានរំពឹងថា សហរដ្ឋអាមេរិកអាចជួបកំនើន ២,៣ភាគរយ ឆ្នាំនេះ និង២,៥ភាគរយឆ្នាំ២០១៨។ ការចុះខ្សោយនៃសកម្មភាពផ្នែកសេដ្ឋកិច្ច ធ្វើអោយអង់គ្លេសជួបកំនើនយឺតយ៉ាវដែរ គឺក្នុងតួលេខ១,៧ភាគរយ ឆ្នាំ២០១៧ និង១,៥ភាគរយ ឆ្នាំ២០១៨។
ដោយឡែក មហាអំណាចរុស្ស៊ីនិងចិននៅតែអាចជួបកំនើនដូចគ្រោងទុកដដែល។ តួលេខសម្រាប់កំនើនរុស្ស៊ី ឆ្នាំ២០១៧ និង២០១៨ មាន១,៤ភាគរយ។ ចិនវិញ មានកំណើនគួរសម គឺមាន៦,៧ភាគរយ សម្រាប់ឆ្នាំ២០១៧ និង៦,៤ភាគរយ សម្រាប់ឆ្នាំ២០១៨ គឺហួសពីការរំពឹងរបស់អង្គការIMF ប្រហែល០,១ពិន្ទុ និង០,២ពិន្ទុ។ កំនើនចិន មានបានដោយសារនយោបាយបន្ធូរបន្ថយ និងកំណែទម្រង់របស់រដ្ឋចិន។ ជប៉ុនវិញ មានកំណើន១,៣ភាគរយ ឆ្នាំ២០១៧ គឺលើសការគ្រោងទុក០,១ពិន្ទុ ហើយឆ្នាំ២០១៨ ជួបកំនើន០,៦ភាគរយ ដូចការគ្រោងទុកដដែល។
ទោះអង្គការIMF មានសុទិដ្ឋិនិយមចំពោះកំនើនទាំងនេះ ក៏ក្រុមជំនាញសេដ្ឋកិច្ច ប្រាប់ថា តួលេខកំនើន អាចប្រែប្រួលបានទៀត ព្រោះវាអាស្រ័យតាមការវិវត្តនយោបាយនៅសហរដ្ឋអាមេរិក រឺក៏នយោបាយនៅអង់គ្លេស ដែលបានដើរចេញពីអឺរ៉ុប។ ក្រុមជំនាញក៏មិនភ្លេចលើកឡើងពីបញ្ហាកំចីហួសហេតុក្នុងស្រុកចិនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ