វិមានក្រេមឡាំង បរិហារអាក្រាត គម្រោងច្បាប់អាមេរិកដាក់ទណ្ឌកម្មថ្មី ប្រឆាំងរុស្ស៊ី
គម្រោងច្បាប់ដាក់ទណ្ឌកម្មថ្មីប្រឆាំងរុស្ស៊ី ដែលអនុម័តដោយសភាអ្នកតំណាងអាមេរិកាំង គឺជាព្រនង់ទួងចំលើច្បាប់អន្តរជាតិ និង ពាណិជ្ជកម្មអន្តរជាតិ ជាកាយវិការអមិត្តក្រៃលែង និងជាដំណឹងគួរឲ្យក្រៀមក្រំ សម្រាប់ទំនាក់ទំនងរវាងសហព័ន្ធ និង សរអា - នេះជាសេចក្តីថ្លែងការណ៍ធ្វើ ថ្ងៃពុធ ២៦ កក្កដា ដោយវិមានក្រេមឡាំង។
ចុះផ្សាយនៅថ្ងៃ៖
ប្រាកដណាស់ ដែលលោកប្រមុខរដ្ឋរុស្ស៊ី វ៉្លាឌីមៀរ ពូទីន នឹងបញ្ចេញប្រតិកម្មទល់នឹង គម្រោងច្បាប់ ទើបអនុម័តដោយសភាជាន់ក្រោមអាមេរិកាំង ប៉ុន្តែប្រតិកម្មនោះនឹងផ្អែកលើការពិនិត្យមើលយ៉ាងល្អិតល្អន់ និងលើការសម្រេចចិត្ត តើឆ្លើយតបតាមរបៀបណា - សេចក្តីនេះ ថ្លែងដោយអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ក្នុងសន្និសីទតាមទូរសព្ទ ទៅពួកអ្នកកាសែត។ តាមសំដីគាត់ ក្នុងគ្រាឥឡូវ យើងអាចនិយាយថា ហេតុការណ៍ដែលកើតមាននេះ ជាដំណឹងមួយដ៏ក្រៀមក្រំ សម្រាប់ទំនាក់ទំនងរុស្ស៊ី-អាមេរិក និង សម្រាប់អនាគតវា។ លោក ពេស្កូវ បន្ថែមថា ម៉ូស្គូស្រងាកចិត្តមិនតិចឡើយ នឹងចំហាយគម្រោងច្បាប់ នោះ សម្រាប់ច្បាប់អន្តរជាតិ និង សម្រាប់ទំនាក់ទំនងពាណិជ្ជកម្មអន្តរជាតិ។
ប៉ុន្តែ ត្រូវរង់ចាំឲ្យគម្រោងច្បាប់នោះ ក្លាយជាច្បាប់សិន។ ដ្បិត អត្ថបទវា ដែលត្រូវបានអនុម័ត ដោយតំណាងរាស្ត្រអាមេរិកាំង ដល់ទៅ ៤១៩ នាក់ ទល់នឹងសម្លេងជំទាស់តែ ៣ ប៉ុណ្ណោះ ក៏ នឹងត្រូវអនុម័ត ដោយព្រឹទ្ធសភាផងដែរ មុននឹងឆ្លងទៅទទួលការចុះ ឬ មិនចុះ ហត្ថលេខា ដោយប្រធានាធិបតី ឲ្យ ក្លាយជាច្បាប់ដាក់ឲ្យប្រើទៅកើត។
គួរនិយាយថា ពង្រាងច្បាប់អាមេរិកាំងនេះ ដែលដាក់ទណ្ឌកម្មថ្មីប្រឆាំងរុស្ស៊ី ញ៉ាំងឲ្យមានប្រតិកម្មអវិជ្ជមានទៅហើយ ពីខាងប្រទេសខ្លះ នៃសហភាពអឺរ៉ុប ដ្បិតវាប៉ះពាល់ដល់ផលប្រយោជន៍ក្រុមហ៊ុនជាច្រើនរបស់គេ ដែលសហការជាមួយរុស្ស៊ី ជាពិសេស ខាងចូលរួមសាងសង់ខ្សែបំពង់បង្ហូរឧស្ម័នធម្មជាតិ ពីរុស្ស៊ី ដើម្បីធានាដល់សន្តិសុខថាមពលនៅអឺរ៉ុប។ ម៉្លោះហើយបានជា តាំងពីក្រុងប៉ារីស រហូតដល់ក្រុងប៊ែរឡាំង ដោយឆ្លងកាត់តាមក្រុងព្រុចសែល គំនិតផ្តួចផ្តើមរបស់សភាអាមេរិកដាក់ទណ្ឌកម្មបន្ថែម ទល់នឹងរុស្ស៊ី ប្រព្រឹត្តទៅមិនរលូនឡើយ ពីព្រោះ វាមានលក្ខណៈឯកតោភាគីសុទ្ធសាធ។ មកទល់ឥឡូវ របបដាក់ទណ្ឌកម្ម ថ្កោលទោសរុស្ស៊ី ចំពោះការភ្ជាប់យកទឹកដីគ្រីមេ តែងបានទទួលការចុះសម្រុងគ្នា ជាមុនសិន រវាង សរអា និង សហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ