ជាប់ទោស ត្បិតបានចងក្រង និងផ្សព្វផ្សាយនៅលើវិបសៃតិ៍ ពីចំនួនបាតុកម្ម នៅចិន
អ្នកសរសេរប្លុក ត្រូវបានតុលាការ ចិននៅខេត្តដាលី ផ្តន្ទាទោស ឲ្យជាប់ពន្ធនាគាររយៈពេល៤ឆ្នាំ។ ចាប់ខ្លួន នៅខែមិថុនា ឆ្នាំ ២០១៦ ដោយសារតែបានប្រមូលចងក្រងឯកសារស្តីពីចំនួន បាតុកម្ម របស់កម្មករ និងអ្នកបាត់បង់ដីធ្លីនៅប្រទេសចិន អ្នកសរសេរប្លុក លូ អ៊ុយអ៊ុយត្រូវបានតុលាការចោទប្រកាន់ ពីបទ ញុះញង់ឲ្យកើតមានជម្លោះ ហើយនិងអសណ្តាប់ធ្នាប់សង្គម។
ចុះផ្សាយនៅថ្ងៃ៖ កែប្រែថ្ងៃទី៖
ញុះញង់ បង្កឲ្យមានអសណ្តាប់ធ្នាប់ និងជម្លោះ គឺជាបទចោទប្រកាន់ ដែលអាជ្ញាធរចិនបានប្រើជាញឹកញយ ដើម្បីបិទមាត់ អ្នកដែលប្រឆាំងនឹងរដ្ឋាភិបាលកុម្មុយនិស្តចិន។ នៅថ្ងៃសុក្រ ម្សិលមិញ ទៅតាមបទចោទប្រកាន់ខាងលើ តុលាការចិនបានផ្តន្ទាទោស អ្នកសរសេរប្លុក លោកលូ អ៊ុយអ៊ុយ ឲ្យជាប់ពន្ធនាគារ ៤ឆ្នាំ។
តាមមេធាវី របស់លោកលូ កូនក្តីរបស់លោក នឹងប្តឹងឧទ្ធរណ៍ទៅលើការសម្រេចរបស់តុលាការខេត្តដាលី ដែលលោកចាត់ទុកថា ធ្ងន់ហួសប្រមាណ ព្រោះថា កូនក្តីរបស់លោកបានចុះផ្សាយ និងចងក្រងតែព័ត៌មានអ្វីដែលត្រូវបានផ្សព្វផ្សាយ រួចហើយ នៅលើវិបសៃតិ៍ដទៃតែប៉ុណ្ណោះ។ អង្គការការពារសិទ្ធិមនុស្សAmnesty International បានទាមទារឲ្យគេដោះលែងជាបន្ទាន់ លោកលូ ដែលបើតាម Amnesty International គឺត្រូវបានអាជ្ញាធរចាប់ខ្លួន ដោយសារតែបានធ្វើការងាររបស់អ្នកកាសែត។
ធ្លាប់ធ្វើការជាកម្មករចំណាកស្រុក លោកលូ អ៊ុយអ៊ុយ និងភរិយាបានស្វែងរុករក លើអ៊ីនធ័រនែត ហើយនិងបណ្តាញសង្គម ពីព័ត៌មានដែលនិយាយពីបាតុកម្ម ហើយនិងចលនាតវ៉ារបស់កម្មករ នៅក្នុងប្រទេសចិន។ ដោយប្រមូល ចងក្រង ព័ត៌មាន ជារៀងរាល់ថ្ងៃ និងល្អិតល្អន់បំផុត គូស្រករមួយនេះ សម្រេចធ្វើបានតារាងបញ្ជីរមួយ ដែលបានបង្ហាញពីការផ្ទុះ កើនឡើង ខ្លាំង នូវចំនួនបាតុកម្មតវ៉ា និងជម្លោះរវាងថៅកែ ហើយនិងកម្មករ នៅប៉ុន្មានឆ្នាំចុងក្រោយនេះ។ ទៅតាមការរកឃើញរបស់អ្នកសរសេរប្លុក កម្មករបាននាំគ្នាតវ៉ា កាន់តែច្រើន ដោយសារតែការបិទទ្វាររោងចក្រ ការប្រើគ្រឿងយន្តជំនួស មនុស្ស ឬ ដោយសារតែថៅកែមិនព្រមបើកប្រាក់ខែ តាមកាលកំណត់។ អង្គការChina Labour Bulletin ដែលមានទីតាំងនៅទីក្រុងហុងកុងបានរាប់រកឃើញ មានបាតុកម្មច្រើនជាង ៥ពាន់ ដង នៅឆ្នាំ ២០១៥ និងឆ្នាំ ២០១៦ ពោលគឺច្រើនជាង ២ដង នៃចំនួនបាតុកម្ម ដែលកើតមាន នៅក្នុងរយៈពេល ៤ឆ្នាំមុន។
ស្នាដៃចងក្រងរបស់អ្នកសរសេរប្លុក លូ បានរំលេចរូបភាពប្រទេសចិនមួយ ដែលសំបូរមានកាន់តែច្រើន បាតុកម្ម និងភាពតានតឹងនៅក្នុងសង្គម។ សកម្មជនការពារសិទ្ធិមនុស្សមួយចំនួន បានប្រើប្រាស់ឯកសារ ចងក្រងនៅក្នុងប្លុករបស់លោកលូ ដើម្បីយកទៅការពារសិទ្ធិរបស់ពលករចិនដទៃទៀត។ ប៉ុន្តែ លោកលូ ដែលបានទទួលរង្វាន់ពីអង្គការអ្នកកាសែតគ្មានព្រំដែននៅឆ្នាំ ២០១៦ ត្រូវបានអាជ្ញាធរចិនចាប់ខ្លួន នៅខែពាក់កណ្តាលឆ្នាំមុន និងត្រូវបានតុលាការផ្តន្ទាទោសឲ្យជាប់គុក ៤ឆ្នាំ នៅថ្ងៃសុក្រម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ