អូស្ត្រាលីចោទប្រកាន់ ជនសង្ស័យ ដែលគ្រោងបំផ្ទុះយន្តហោះ ដឹកអ្នកដំណើរ EtihadAirways
តុលាការអូស្ត្រាលី នៅថ្ងៃសុក្រទី ៤សីហា បានចោទប្រកាន់ឱពុកកូន ពីរនាក់ ពីបទរៀបចំ ឬមានគម្រោងធ្វើសកម្មភាពភេរវកម្ម។ ពួកគេស្ថិតក្នុងចំណោមមនុស្ស៤នាក់ ដែលប៉ូលិសអូស្ត្រាលី ចាប់ខ្លួន នៅទីក្រុងស៊ីដនី កាលពីថ្ងៃសៅរ៍ សប្តាហ៍មុន។ ប៉ូលិសអូស្ត្រាលី ជឿថា ជនជាតិអូស្ត្រាលី ដើមកំណើតលីបង់ ទាំងពីររូប មានគម្រោង ចង់បំផ្ទុះយន្តហោះដឹកអ្នកដំណើររបស់ EtihadAirways ដែលជាក្រុមហ៊ុនអាកាសចរណ៍ជាតិ របស់ប្រទេសអេមីរ៉ា អារ៉ាប់រួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
តាមប៉ូលិសអូស្ត្រាលី ជនសង្ស័យដែលប៉ូលិសបានចាប់ខ្លួន នៅថ្ងៃសៅរ៍ បានទទួលការណែនាំពីក្រុមជីហាត រដ្ឋអ៊ីស្លាម ដែលបានបង្ហាត់បង្ហាញ តាមអ៊ីនធ័រនែត ឲ្យពួកគេចេះផលិតគ្រឿងផ្ទុះ។ ជនសង្ស័យ ធ្លាប់បានលួចដាក់បញ្ចូល គ្រឿងផ្ទុះ កម្លាំងខ្លាំង ទៅក្នុងវ៉ាលីស របស់សមាជិកគ្រួសារម្នាក់។ កាសែតក្នុងស្រុកអូស្រ្តាលីសរសេរថា ម្ចាស់វ៉ាលីសជាប្អូនប្រុសបង្កើតរបស់ជនសង្ស័យ ដែលបើតាមប៉ូលិស គឺមិនបានដឹងខ្លួនសោះឡើយ ថា មានគ្រឿងផ្ទុះ នៅក្នុងវ៉ាលីសរបស់ខ្លួន។
តាមប៉ូលិសដដែល វ៉ាលីសមានផ្ទុកគ្រឿងផ្ទុះ ត្រូវបានដឹកទៅដល់ព្រលានយន្តហោះ ស៊ីដនី និងត្រៀមដាក់បញ្ចូល ទៅក្នុងយន្តហោះ របស់ក្រុមហ៊ុន EtihadAirways ដែលត្រូហោះពីស៊ីដនី នៅថ្ងៃ ទី ១៥កក្កដាកន្លងទៅ។ ប៉ុន្តែ ការប៉ុនប៉ងបំផ្ទុះយន្តហោះ របស់ប្រទេសអេមីរ៉ា អារ៉ាប់រួម ត្រូវបានផ្អាកមកវិញ ដោយសារតែវ៉ាលីសមានលាក់គ្រឿងផ្ទុះ មិនអាចឆ្លងផុត ពីកន្លែងចុះឈ្មោះ នៅព្រលានយន្តហោះ។ គេមិនដឹងថា ហេតុអ្វីបានជាវ៉ាលីស មិនអាចត្រូវចុះបញ្ជីរនោះទេ។ ប៉ុន្តែ ប៉ូលិសវាយតម្លៃថា ទម្ងន់ធ្ងន់ជ្រុលរបស់វ៉ាលីស អាចជាមូលហេតុ ដែលធ្វើឲ្យជនសង្ស័យ សម្រេចលុបចោលផែនការ ធ្វើភេរវកម្មទៅវិញ។
ជារួម នៅក្នុងប្រតិបត្តិការចាប់ខ្លួន ទ្រង់ទ្រាយធំ នៅថ្ងៃ សៅរ៍ ប៉ូលិស អូស្ត្រាលីបានរកឃើញផងដែរថា ឧបករណ៍ និងសារធាតុគីមី ដែលជនសង្ស័យ ត្រៀមនឹងប្រើ សម្រាប់ផលិតគ្រឿងផ្ទុះ បញ្ចេញ ឧស្ម័នពុលសម្លាប់មនុស្ស។
តាមប៉ូលិស ជនសង្ស័យ បានចាប់ទាក់ទងជាមួយក្រុមជីហាត រដ្ឋអ៊ីស្លាម តាំងពីខែមេសាឆ្នាំមុន។ តាំងពីប្រទេសតួកគី ក្រុមរដ្ឋអ៊ីស្លាមបានបញ្ជូនកញ្ចប់ឧបករណ៍ផលិតគ្រឿងផ្ទុះ និងជាអ្នកបញ្ជារឲ្យរៀបចំធ្វើភេរវកម្ម នៅទឹកដីអូស្ត្រាលី។ នៅថ្ងៃសុក្រ ជនសង្ស័យ ពីររូប ក្នុងចំណោម៤រូប ដែលត្រូវប៉ូលិស ចាប់ខ្លួនបាន នៅថ្ងៃសៅរ៍ ត្រូវបានតុលាការសម្រេចឲ្យដាក់ នៅក្នុងឃុំ ក្នុងពេលរង់ចាំសវនាការ ដែលនឹងបើកធ្វើនៅពាក់កណ្តាលខែវិច្ឆិកាខាងមុខ។ បើសិនតុលាការរកឃើញមានភស្តុតាង បញ្ជាក់ពីសកម្មភាពឧក្រិដ្ឋ នោះជនសង្ស័យភេរវនិយមទាំងពីរត្រូវប្រឈមនឹងទោសជាប់ពន្ធនាគារអស់មួយជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ