តុលាការសម្រេចឲ្យក្រុមហ៊ុនមីតស៊ូប៊ីស្ហ៊ី បង់សងជម្ងឺចិត្តដល់ទាសករ កម្មករកូរ៉េខាងត្បូង
តុលាការកូរ៉េខាងត្បូង នៅថ្ងៃអង្គារទី ៨សីហា បានសម្រេច បញ្ជាឲ្យក្រុមហ៊ុនឧស្សាហកម្មធុនធ្ងន់របស់ជប៉ុន មីតស៊ូប៊ីស្ហ៊ី Mitsubishi បង់ប្រាក់ សងជម្ងឺចិត្ត ដល់ជនជាតិកូរ៉េខាងត្បូង ដែល ជប៉ុនបានចាប់បង្ខំឲ្យធ្វើជាទាសករ កម្មករ នៅក្នុងអំឡុងសម័យសង្រ្គាមលោកលើកទី២។ ក្រុមហ៊ុន ជប៉ុន នៅថ្ងៃនេះ បានប្រតិកម្មតបវិញ ថា នឹងធ្វើបណ្តឹងឧទ្ធរណ៍នឹងការសម្រេចរបស់តុលាការកូរ៉េខាងត្បូង។
ចុះផ្សាយនៅថ្ងៃ៖
ទៅតាមការសម្រេចរបស់តុលាការកូរ៉េខាងត្បូង ក្រុមហ៊ុនជប៉ុន មីតស៊ូប៊ីស្ហ៊ី Mitsubishiត្រូវបង់សងជម្ងឺចិត្ត សរុប ១២៣លានវ៉ុន ស្មើ ១សែន ២ម៉ឺនដុល្លារ ទៅឲ្យជនជាតិ កូរ៉េខាងត្បូង ដែលត្រូវបានជប៉ុនចាប់បង្ខំឲ្យធ្វើការ នៅក្នុងអំឡុងសង្រ្គាមលោក លើកទី២។
នៅក្រោមសម័យត្រួតត្រារបស់ជប៉ុន ពីឆ្នាំ ១៩១០ ដល់ឆ្នាំ ១៩៤៥ ជនជាតិកូរ៉េរាប់សែននាក់ ត្រូវបានទាហានជប៉ុនចាប់បង្ខំ ឲ្យទៅប្រយុទ្ធនៅជួរមុខក្នុងសមរភូមិ ឬធ្វើជាទាសករផ្លូវភេទ។ សូមបញ្ជាក់ថា ជនរងគ្រោះ ដែលបានឈ្នះក្តី នៅថ្ងៃអង្គារ ធ្លាប់ស្ថិតនៅក្នុងចំណោម យុវជនកូរ៉េ ដែលត្រូវបានគេបោកប្រាស់ថា នឹងបានទៅរៀន ឬធ្វើការបានប្រាក់ខែ នៅប្រទេសជប៉ុន។ ប៉ុន្តែ នៅពេលទៅដល់ទឹកដីជប៉ុន នៅឆ្នាំ ១៩៤៤ ពួកគេត្រូវបានចាប់បង្ខំ ឲ្យធ្វើការដូចជា ទាសករ នៅរោងចក្រ ឧស្សាហកម្មធុនធ្ងន់របស់ មីតស៊ូប៊ីស្ហ៊ី Mitsubishi នៅទីក្រុង ណាហ្គោយ៉ា ដែលមាននាទីផលិតយន្តហោះ។
សម្រាប់សកម្មជនការពារសិទ្ធិជនរងគ្រោះកូរ៉េ នៅក្នុងសម័យសង្រ្គាម ការសម្រេចរបស់តុលាការ នៅថ្ងៃអង្គារ ជាជ័យជំនះលើកទី២ របស់ក្រុមគ្រួសារ ជនរងគ្រោះ កូរ៉េ ក្នុងការទាមទារស្វែងរកការសងជម្ងឺចិត្តពីក្រុមហ៊ុនជប៉ុន។ នៅឆ្នាំ ២០១៣ តុលាការកូរ៉េខាងត្បូង ខាងលើ ធ្លាប់បានសម្រេចផ្តន្ទាទោសម្តងហើយ ឲ្យក្រុមហ៊ុនមីតស៊ូប៊ីស្ហ៊ី Mitsubishiដដែល បង់សងជម្ងឺចិត្ត ដល់ជនជាតិកូរ៉េ ៥នាក់ ដែលរងគ្រោះ ធ្លាប់ធ្វើការឲ្យក្រុមហ៊ុន នៅក្នុងសម័យសង្រ្គាមលោកលើកទី២។
រហូតមក ក្រុមហ៊ុនមីតស៊ូប៊ីស្ហ៊ី Mitsubishi បានបដិសេធ មិនព្រមបង់ប្រាក់ សងជម្ងឺចិត្ត តាមការសម្រេចរបស់តុលាការមូលដ្ឋានរបស់កូរ៉េខាងត្បូង។ មីតស៊ូប៊ីស្ហ៊ី Mitsubishi បានអះអាងថា គេនឹងប្តឹងម្តងទៀត ទៅតុលាការឧទ្ធរណ៍ ប្រឆាំងនឹងការសម្រេចរបស់តុលាការកូរ៉េខាងត្បូង នៅថ្ងៃអង្គារនេះ។
ជប៉ុន និងកូរ៉េខាងត្បូង ជាសម្ព័ន្ធមិត្តតែមួយរបស់អាមេរិក និងកំពុងប្រឈមរួមគ្នា នឹងការគំរាមកំហែងអាវុធនុយក្លេអ៊ែររបស់កូរ៉េខាងជើង។ ប៉ុន្តែ ស្នាមដិតដាម ឈឺចាប់ នៅក្នុងប្រវត្តិអតីតកាល នៅតែធ្វើឲ្យប្រទេសទាំងពីរ មិនអាចយកគ្នាជាមិត្ត។ កូរ៉េខាងត្បូងនៅតែបន្ត ប្តឹងផ្តល់ទាមទារសងជម្ងឺចិត្ត ដល់ជនជាតិរបស់ខ្លួន ដែលត្រូវទាហានជប៉ុនចាប់បង្ខំ ឲ្យធ្វើជាទាសករ ប៉ុន្តែ រដ្ឋាភិបាលជប៉ុនបានបញ្ជាក់ថា ជម្លោះនៅសម័យអាណានិគមត្រួតត្រារបស់ជប៉ុនបានបិទបញ្ជប់ តាំងពីឆ្នាំ ១៩៦៥ នៅពេលជប៉ុនបានផ្តល់ប្រាក់ ប្រមាណ៨០០លានដុល្លារ (ជាជំនួយ និងប្រាក់កម្ចី) ដែលកូរ៉េខាងត្បូង បានប្រើ ដើម្បី ជំរុញសេដ្ឋកិច្ចកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ