សកម្មជនបក្សប្រជាធិបតេយ្យហុងកុងម្នាក់ត្រូវបានភ្នាក់ងារចិនដីគោគចាប់ជម្រិតនិងធ្វើបាបជាដំណំ
នៅហុងកុង សកម្មជនមួយរូបនៃគណបក្សប្រជាធិបតេយ្យ បានអះអាងនៅថ្ងៃសុក្រម្សិលមិញ ថា”រូបគាត់ត្រូវបានភ្នាក់ងារចិនមួយក្រុមចាប់ជម្រិតនិងវាយដំ បន្ទាប់ពីគាត់បាននិយាយប្រាប់ពីបំណងរបស់គាត់ក្នុងផ្ញើររូបថតមួយសន្លឹកដែលចុះហត្ថលេខាដោយតារាបាល់ទាត់ Barcelonne ឈ្មោះ Lionel Messi ទៅឲ្យដល់ភរិយាសពលោក Liu Xiaoboសកម្មជនការពារសិទ្ធិមនុស្សដ៏មុះមត់នៅក្នុងប្រទេសចិនដែលទើបចូលមរណភាពកាលពីខែកក្កដាមុននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោក Howard Lam ដែលជាសមាជិកគណបក្សប្រជាធិបតេយ្យនៅហុងកុង បានចាប់ផ្តើមធ្វើការចោទប្រកាន់នៅក្នុងអំឡុងសន្និសីទកាសែតមួយដែលនៅពេលនោះ លោកបានបង្ហាញអោយគេឃើញកន្លាស់ដែកដែលជាប់នៅលើជើងរបស់គាត់ក៏ព្រមទាំងស្លាកស្នាមព័ណ៌ក្រហមជាំនៅលើពោះរបស់គាត់ដែរ។ បន្ទាប់មក គាត់បានធ្វើដំណើរទៅកាន់មន្ទីរពេទ្យ។
តាមផ្លូវច្បាប់ ភ្នាក់ងារចិន គ្មានសិទ្ធិមកធ្វើអន្តរាគមន៍អ្វីទេនៅហុងកុង។ ហុងកុងដែលជាអតីតអាណានិគមរបស់អង់គ្លេស បានចូលជាទឹកដីរបស់ចិនដីគោគវិញនៅឆ្នាំ១៩៩៧។
ក៏ប៉ុន្តែ កន្លងមក ដោយមានការចាប់ជម្រិតច្រើននៅហុងកុង ដូចជាការចាប់ជម្រិតមហាសេដ្ឋីចិនមួយរូបនៅដើមឆ្នាំ២០១៧និងអ្នកលក់សៀវភៅហុងកុងម្នាក់នៅឆ្នាំ២០១៥ បានធ្វើឲ្យមតិសាធារណៈនៅហុងកុង មានការព្រួយបារម្ភជាពន់ពេក ខ្លាចចិន ប្រើអំណាចបំពានស្រេចតែអំពើចិត្តខ្លួននៅហុងកុង។
សកម្មជនហុងកុងរូបនេះ បានគូសបញ្ចាក់ទៀតថា “គាត់ត្រូវបានជនមួយក្រុមនិយាយភាសាចិនកុកងឺ ធ្វើការព័ទ្ធចាប់រូបគាត់នៅថ្ងៃព្រហស្សតិ៍មុន នៅខណៈពេលដែលគាត់កំពុងដើរទិញអីវ៉ាន់។ គួរបញ្ជាក់ថាប្រជាជនហុងកុងនិយាយភាសាកាតាំងមិនដូចចិនដីគោគដែលនិយាយភាសាកុកងឺនោះទេ។ បន្ទាប់មករូបគាត់ ត្រូវពួកខ្មាំង បង្ខំឲ្យចូលក្នុងរថយន្តកាមីញ៉ុងតូចមួយគ្រឿងនិងវាយដំគាត់រហូតដល់សន្លប់បាត់ស្មារតី។ បន្ទាប់មកទៀត រូបគាត់ត្រូវបានគេយកកន្លាស់មកកិបនៅលើកាំភ្លៅគាត់។ ក្រោយពីសន្លប់ជាសារជាថ្មីម្តងទៀត គាត់បានភ្ញាក់ដឹងខ្លួនវិញនៅថ្ងៃសុក្រម្សិលមិញនៅលើឆ្នេរសមុទ្រមួយដែលស្ថិតនៅឆ្ងាយដាច់ស្រយាលក្នុងស្រុក Sai Kungភាគអគ្នេយ៍ហុងកុង។ សកម្មជនហុងកុងនេះ បានថ្លែងសង្កត់ទៀតថា កាលពីថ្ងៃអង្គារមុន គាត់បានទទួលទូរស័ព្ទពីបុរសមួយរូបដែលអះអាងថា គេនិយាយក្នុងនាមអាជ្ញាធរចិន និងដើម្បីសុំកុំឲ្យលោកLam ធ្វើការផ្ញើរូបថតរបស់តារាបាល់ទាត់ Barcelonne ឈ្មោះ Lionel Messiទៅអោយភរិយារបស់សពលោក Liu Xiaobo ឲ្យសោះ។
ស្របគ្នានេះ លោក Lam បានធ្វើការប្តឹងទៅដល់នគរបាលហុងកុង និងបានរៀបរាប់នៅលើទំព័រ Facebookរបស់គាត់ថា គាត់បានទទួលរូបថតមួយសន្លឹកដែលចុះហត្ថលេខាដោយតារាបាល់ទាត់Barcelone រូបថតដែលត្រូវផ្ញើទៅអោយជ័យលាភីរង្វាន់ណូបែលសន្តិភាព ឈ្មោះ Liu Xiabo ដែលទើបនឹងទទួលមរណភាពកាលពីថ្ងៃទី១៣កក្កដានៅក្នុងប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ