នុយក្លេអ៊ែរ កូរ៉េខាងជើង៖ លោកស៊ី ជីនពីងរំលឹកជាថ្មីឲ្យលោកដូណាល់ ត្រាំតមសំដី
ប្រធានាធិបតីចិន លោកស៊ី ជីនពីង នៅថ្ងៃសៅរ៍ទី ១២ សីហា បានទូរស័ព្ទ សន្ទនាជាមួយ ប្រធានាធិបតីអាមេរិក លោកដូណាល់ ត្រាំ ដោយបានសុំឲ្យលោកជៀសវាង កុំប្រើ “ពាក្យ និងសកម្មភាព”ដែលរឹងរឹតតែធ្វើភាពតានតឹងនៅឧបទ្វីប កាន់ធ្លាក់ដុនដាបចុះខ្លាំង។ តាមការចុះផ្សាយរបស់ទូរទស្សន៍រដ្ឋចិន ប្រមុខរដ្ឋចិនបានអំពាវនាវផងដែរឲ្យភាគីជម្លោះទាំងពីរ អាមេរិក និងកូរ៉េខាងជើង អត់ធ្មត់ និងត្រលប់មកចូលតុ ចរចា ឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
សង្រ្គាមពាក្យសំដីរវាងប្រធានាធិបតីអាមេរិក លោកដូណាល់ ត្រាំជាមួយ ទីក្រុងព្យុងយ៉ាង បាន កើតមាន៤ថ្ងៃមក ហើយ បន្ទាប់ពីក្រុងព្យុងយ៉ាង គំរាមបាញ់មីស៊ីល នៅពាក់កណ្តាលខែនេះ ទៅតំបន់ទឹកក្បែរកោះGuam របស់អាមេរិកក្បែរប្រទេសជប៉ុន។
ប្រធានាធិបតីចិន នៅថ្ងៃសៅរ៍ បានទូរស័ព្ទទៅលោកដូណាល់ ត្រាំ និងសុំឲ្យលោកដូណាល់ ត្រាំ ជៀសវាងកុំ ប្រើពាក្យសំដី ឬសកម្មភាពណា ដែលធ្វើឲ្យភាពតានតឹងនៅឧបទ្វីប កូរ៉េដែលកំពុងតែអាក្រក់រួចហើយនោះ រឹតតែចុះអាក្រក់ធ្ងន់ធ្ងរថែមទៀត។
នៅខែមេសាកន្លងទៅ លោកស៊ី ជីនពីងបានទូរស័ព្ទ អំពាវនាវឲ្យលោកដូណាល់ ត្រាំ អត់ធ្មត់ពាក្យសំដី។ សម្រាប់ចិន អាមេរិកត្រូវឈប់ធ្វើសមយុទ្ធយោធាជាមួយ កូរ៉េខាងត្បូង ជាថ្នូរនឹងការលះបង់ចោលកម្មវិធីនុយក្លេអ៊ែររបស់កូរ៉េខាងជើង។ ប៉ុន្តែ លោកដូណាល់ ត្រាំហាក់មិនលឺការអំពាវនាវរបស់ប្រធានាធិបតីចិន បាននិយាយព្រមានដោយផ្ទាល់មេដឹកនាំកូរ៉េខាងជើង ដោយថា អាមេរិកបានត្រៀមខ្លួននឹងធ្វើសកម្មភាព បើសិនជាចាំបាច់។
នៅថ្ងៃសុក្រ នៅមុនពេលទទួលទូរស័ព្ទរបស់លោកប្រធានាធិបតីចិន លោកដូណាល់ ត្រាំ បានបន្តដាក់សំពាធលើកូរ៉េខាងជើង ដោយបានប្រកាសថា អាមេរិកត្រៀមនឹងប្រើអាវុធ ដែលដាក់បញ្ចូលគ្រាប់រួចរាល់ហើយ។
នៅក្រោយមានព័ត៌មានចុះផ្សាយថា កូរ៉េខាងជើងមានសមត្ថភាពផលិតក្បាលគ្រាប់នុយក្លេអ៊ែរ ដ៏តូច សម្រាប់បំពាក់លើគ្រាប់មីស៊ីល លោកដូណាល់ ត្រាំ ក៏បាននិយាយគំរាមថា នឹងប្រែក្លាយកូរ៉េខាងជើង ឲ្យទៅជាភ្លើង និងកំហឹង ដែលពិភពលោកមិនដែលជួបប្រទះ។
នៅមួយថ្ងៃក្រោយ សារគំរាមរបស់លោកដូណាល់ ត្រាំ គឺនៅថ្ងៃព្រហស្បតិ៍កន្លងទៅ កូរ៉េខាងជើង ក៏បានប្រកាសពីគម្រោងផែនការលម្អិត ថា ខ្លួន នឹងបាញ់គ្រាប់មីស៊ីលចូលទៅក្បែរតំបន់ទឹករបស់កោះ Guam របស់អាមេរិក៕
លោកដូណាល់ ត្រាំ លែងសង្ឃឹមឲ្យចិន ដាក់សម្ពាធលើកូរ៉េខាងជើង
លោកដូណាល់ ត្រាំ ចាប់ផ្តើមដុតភ្លើងសង្រ្គាមពាក្យសំដីនេះឡើង ព្រោះតែលោកបានសាល្បងប្រើគ្រប់មធ្យោបាយរួចហើយ ទាំងការទូត ប៉ុន្តែ មិនបានសម្រេច។ នៅក្នុងជំនួបជាមួយលោកប្រធានាធិបតីចិន ស៊ី ជីនពីង លោកដូណាល់ ត្រាំ បានធ្វើនយោបាយសម្បទានច្រើន ទៅឲ្យចិន ដោយសង្ឃឹមថា ចិន សម្ព័ន្ធមិត្តសំខាន់របស់កូរ៉េខាងជើង ដាក់សម្ពាធលើប្រទេសនេះ ឲ្យលះបង់ចោលមហិច្ឆតានុយក្លេអ៊ែរ។
ប៉ុន្តែ មួយ លើកជាពីរលើក កូរ៉េខាងជើង បានបង្អួតបង្ហាញ សមត្ថភាពមីស៊ីល រហូតធ្វើឲ្យលោកដូណាល់ ត្រាំ ជឿថា លោកប្រធានាធិបតីចិន មិនបានធ្វើអ្វី សោះ ដើម្បី បន្ធូរកង្វល់របស់អាមេរិកនោះទេ។ កូរ៉េខាងជើង កាន់តែរីកចំរើន និងទីបំផុត ផលិតបានមីស៊ីល បាលីស្ទីកអន្តរទ្វីប មួយ ដែលអាចបាញ់ទៅដល់ដែនដីគោករបស់ អាមេរិក។
ដោយមិនអាចសង្ឃឹមឲ្យចិន ដាក់សម្ពាធលើកូរ៉េខាងជើង លោកដូណាល់ ត្រាំ សុខចិត្ត បោះដៃ ចង់ទៅរកចរចាដោយផ្ទាល់ ជាមួយមេដឹកនាំកូរ៉េខាងជើង។ លោកធ្លាប់ទាំងបាននិយាយសរសើរលោកគីម ជុងអ៊ុនថា ជាមេដឹកនាំវ័យក្មេង ដែលឆ្លាតទៀតផង។ ប៉ុន្តែ មេដឹកនាំរបស់កូរ៉េខាងជើងឯណោះវិញ មិនបានផ្តល់ចម្លើយ តបតាមការអញ្ជើញរបស់លោកដូណាល់ ត្រាំនោះទេ។ នៅថ្ងៃព្រហស្បតិ៍ នៅក្រោយ ប្រកាសពីគម្រោងការបាញ់មីស៊ីលសំដៅកោះអាមេរិក ក្រុងព្យុងយ៉ាងបានវាយតម្លៃ ថា លោកត្រាំជាមនុស្សដែលលែងដឹងខុសត្រូវ ហើយការចរចាជាមួយមនុស្សបែបនេះ គឺមិនអាចធ្វើទៅរួចទេ។
លោកដូណាល់ ត្រាំជាខ្លាពិត ឬខ្លាក្រដាស?
នៅថ្ងៃសុក្រទី១១ សីហា លោកដូណាល់ ត្រាំ បាននិយាយគំរាមថា អាមេរិកបានត្រៀមរួចហើយ អាវុធសម្រាប់វាយបកកូរ៉េខាងជើង ក្នុងករណីកូរ៉េខាងជើង ភ្លាត់ស្នៀត វាយប្រហារទឹកដីអាមេរិក។ ពាក្យគំរាមរបស់លោកដូណាល់ ត្រាំ គឺអាចគ្រាន់តែកំញើញកូរ៉េខាងជើង និងធ្វើឲ្យប្រធានាធិបតីចិន ទូរស័ព្ទមករំលឹកតែប៉ុណ្ណោះ។ ពោលគឺអាមេរិករបស់លោកដូណាល់ ត្រាំ នឹងមិនអាចធ្វើសង្រ្គាមប្រឆាំងតបត នឹងកូរ៉េខាងជើង ដូចសំដីគំរាមរបស់លោកដូណាល់ ត្រាំនោះទេ។
រដ្ឋមន្រ្តីការបរទេសអាមេរិក បាននិយាយថា គ្មានអ្នកណាចង់បានដំណោះស្រាយសន្តិភាព ច្រើនជាងលោកដូណាល់ ត្រាំនោះទេ។ លោកស្រី អង់ហ្គេឡា មែរកិលវិញ នៅថ្ងៃសៅរ៍ បានព្រមានពីការកើតផ្ទុះ ជម្លោះ ដោយសារតែសង្រ្គាមពាក្យសំដី។
លោកដូណាល់ ត្រាំ ប្រើពាក្យថា អាមេរិកបានត្រៀមអាវុធនុយក្លេអ៊ែរសម្រាប់ទប់ទល់ការវាយប្រហារនុយក្លេអ៊ែររបស់កូរ៉េខាង ឬក៏ថា អាមេរិកបានត្រៀមអាវុធរួចហើយ ដើម្បីវាយបកកូរ៉េខាងជើង។ ប៉ុន្តែ ជាក់ស្តែង អាមេរិកនៅមិនទាន់ចាត់វិធានការច្បាស់លាស់ណាមួយ ដើម្បី ឆ្លើយតបនឹងភាពតានតឹងនៅឧបទ្វីបកូរ៉េនោះទេ។ ក្រសួងការពារជាតិអាមេរិក នៅមិនទាន់បានទទួលបញ្ជារ ឲ្យពង្រាយកម្លាំង និងសព្វាវុធ ដែលកំពុងប្រចាំការនៅមហាសមុទ្រប៉ាស៊ីហ្វិក ឬនៅកូរ៉េខាងត្បូង។ អាមេរិកក៏នៅមិនទាន់បានបញ្ជាឲ្យជនជាតិខ្លួនចាកចេញ ពីកូរ៉េខាងត្បូង ជប៉ុន ឬកោះGuam ដែលតាមពិត ទៅ អាចជាផ្ទាំងស៊ីបរបស់មីស៊ីលកូរ៉េខាងជើងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ