ចិនបង្កើនមុខទំនិញ ដែលត្រូវផ្អាកទិញ នាំចូលពីកូរ៉េខាងជើង
ចិន ដែលជាសម្ព័ន្ធមិត្តសំខាន់របស់កូរ៉េខាងជើង បានប្រកាសនៅថ្ងៃចន្ទ ម្សិលមិញថា នឹងផ្អាក លែងនាំចូល ដែក សំណរ និងផលិតផលគ្រឿងសមុទ្រ ពីកូរ៉េខាងជើង។ ចិនបានសម្រេចរឹតបន្តឹងការនាំចូលទំនិញ ពីកូរ៉េខាងជើង បន្ទាប់ពីមានការដាក់សម្ពាធពីអាមេរិក និងក្រោយពេលក្រុមប្រឹក្សាសន្តិសុខ អង្គការសហប្រជាជាតិ បានបោះឆ្នោតដាក់ទណ្ឌកម្មសេដ្ឋកិច្ចជាលើក ទី ៧ លើកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ចាប់ពីថ្ងៃអង្គារនេះទៅ ចិននឹងផ្អាក ព្យួរ លែងទិញ នាំចូល ធ្យូង ដែក រ៉ែដែក សំណរ ហើយនិងផលិតផលគ្រឿងសមុទ្រ ពីកូរ៉េខាងជើង។ នេះបើតាមសេចក្តីប្រកាសព័ត៌មានរបស់ក្រសួង ពាណិជ្ជកម្មចិន នៅថ្ងៃចន្ទ។
នៅក្រោយក្រុមប្រឹក្សាសន្តិសុខបោះឆ្នោត ដាក់ទណ្ឌកម្មសេដ្ឋកិច្ចលើកទី ៧ ទៅលើកូរ៉េខាងជើង ចិន តាមរយៈរដ្ឋមន្រ្តីការបរទេស លោកវ៉ាង យី បានប្រកាសថា ចិន នឹងអនុវត្ត ១០០ភាគរយ សេចក្តីសម្រេចរបស់ក្រុមប្រឹក្សាសន្តិសុខ។ ទណ្ឌកម្មសេដ្ឋកិច្ចរបស់ក្រុមប្រឹក្សាសន្តិសុខ មានគោលដៅ ធ្វើឲ្យកូរ៉េខាងជើង (ដែលផ្គើនបាញ់សាកល្បងមីស៊ីល) ខាតបង់ប្រាក់ចំណូល ១ពាន់លានដុល្លារ ក្នុងមួយឆ្នាំៗ។ ចិនដែល ជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ ដើរតួសំខាន់ជាងគេក្នុងការដាក់សម្ពាធរសេដ្ឋកិច្ចទៅលើកូរ៉េខាងជើង ព្រោះថា ចិន ជាអតិថិជនដែលទិញ នាំចូលទំនិញ កូរ៉េខាងជើងច្រើនជាងគេ។ នៅឆ្នាំមុន ៩២ភាគរយ នៃផលិតផល នាំចេញពីកូរ៉េខាងជើង ត្រូវបានដឹកនាំចូលប្រទេសចិន។
រងការរិះគន់ និងដាក់សម្ពាធពីអាមេរិក ទីក្រុងប៉េកាំងធ្លាប់បានប្រកាសផ្អាក លែងនាំចូលធ្យូងថ្មពីកូរ៉េខាងជើង កាលពីខែកុម្ភៈកន្លងទៅ។ ការណ៍នេះធ្វើឲ្យកូរ៉េខាងជើងបាត់បង់ប្រាក់ចំណូលសំខាន់មួយ ព្រោះថា នៅឆ្នាំ ២០១៦ចិន ធ្លាប់បានចំណាយ ជាង ១ពាន់លានដុល្លារ ដើម្បីទិញ ធ្យូងថ្ម ២២លានតោនពីកូរ៉េខាងជើង។ តាមនាយកដ្ឋានពន្ធគយចិន ដោយសារតែផ្អាកលែងនាំចូលធ្យូងថ្ម ពីកូរ៉េខាងជើង ការនាំចូលទំនិញ ពីកូរ៉េខាងជើងបានថយចុះប្រមាណ១៣ភាគរយ នៅឆមាសទី១ ក្នុងឆ្នាំ ២០១៧ ប៉ុន្តែ នៅក្នុងរយៈពេលដូចគ្នា ទំនិញចិន នាំចូលទៅកូរ៉េខាងជើងបានកើនឡើង ខ្លាំង ដល់ទៅ ២៩ភាគរយ។
ចិន សម្រេចបន្ថែមមុខទំនិញ ដែលត្រូវផ្អាកព្យួរ លែងនាំចូលពីកូរ៉េខាងជើង។ វិធានការនេះ ធ្វើឡើង នៅក្នុងពេលដែលកូរ៉េខាងជើង និងអាមេរិក កំពុងបោះសង្រ្គាមពាក្យសំដី គំរាមកំហែងដាក់គ្នាទៅវិញទៅមក គឺចាប់តាំងពីកូរ៉េខាងជើងបានសាកល្បងមីស៊ីល បាលីស្ទីក ដែលអាចទៅដល់ទឹកដីអាមេរិក។ សម្រាប់អ្នកនាំពាក្យរបស់ក្រសួងការបរទេសចិន ចិននៅតែបានគោលការណ៍ចាស់គឺ អាមេរិកត្រូវឈប់ធ្វើសមយុទ្ធជាមួយ កូរ៉េខាងត្បូង ដើម្បី ជាថ្នូរ ទាមទារឲ្យកូរ៉េខាងជើង ឈប់បាញ់សាកល្បងមីស៊ីលបាលីស្ទីក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ