ទាហានឥណ្ឌានិងចិន បានប៉ះទង្គិចគ្នាជាថ្មីនៅក្នុងជម្លោះព្រំដែនប៉ែកខាងលិច Himalaya
ទាហានឥណ្ឌា និងចិន បានប៉ះទង្គិចគ្នាមួយប្រាវកាលពីថ្ងៃអង្គារម្សិលមិញ ដោយចិនបានប្រើដុំថ្មគប់ប្រឆាំងទៅលើទាហានឥណ្ឌានៅក្នុងជម្លោះព្រំដែនរវាងឥណ្ឌានិងចិននៅប៉ែកខាងលិចតំបន់ Himalaya-នេះបើយោងតាមប្រភពឥណ្ឌា នៅខណៈពេលដែលភាពតានតឹងរវាងចិននិងឥណ្ឌានៅតែរស់រវើកនៅក្នុងផ្នែកមួយទៀតនៃតំបន់ជួរភ្នំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ក្រុមយោធាឥណ្ឌា បានធ្វើការបង្ក្រាបទាន់ពេលនៅខណៈពេលដែលពួកទាហានចិន បានប៉ុនប៉ងឈ្លានពានលបចូលមកក្នុងតំបន់ Ladkh ដែនដីឥណ្ឌានៅជិតបឹងPangong-នេះបើយោងតាមប្រភពឥណ្ឌាមួយនៅទីក្រុងNew Delhi។
យោងតាមប្រភពនេះ “ទាហានចិនខ្លះៗ ដែលមានកាន់ដំបងដែកនិងដុំថ្ម បានប៉ះទង្គិចគ្នាមួយប្រាវជាមួយទាហានឥណ្ឌា ជាហេតុបណ្តាលអោយមានអ្នករងរបួសស្រាលទាំងសងខាង។ អ្នកទទួលខុសត្រូវនៃក្រសួងការពារជាតិឥណ្ឌា បានគូសបញ្ជាក់ថា ទាហានចិន បានប៉ុនប៉ងលបលួចចូលមកក្នុងទឹកដីឥណ្ឌាចំនួនពីរលើកនៅតំបន់បឹងPangong ដែលស្ថិតនៅក្នុងកំពស់ប្រមាណជា ៤ ២០០ម៉ែត្រក្នុងតំបន់ភ្នំ ក៏ប៉ុន្តែត្រូវបានទាហានឥណ្ឌាវាយរុញច្រានចេញវិញ។ ក្រោយបន្ទាប់ពីឧប្បត្តិហេតុនេះមក ទាហានចិននិងឥណ្ឌា បានវិលត្រឡប់ទៅកាន់ទីតាំងរបស់ពួកគេរៀងៗខ្លួន។
“ឧប្បត្តិហេតុនេះ តែងតែកើតឡើងជារៀងរាល់ពេលនៅរដូវក្តៅ ក៏ប៉ុន្តែ ការប៉ះទង្គិចគ្នានៅម្សិលមិញនេះ មានរយៈពេលយូរបន្តិច ក៏ប៉ុន្តែ ទាហាន ចិន ពុំបានប្រើប្រាស់អាវុធទេ -នេះបើយោងតាមប្រភពប៉ូលីសនៅស្រុក Srinagar ក្នុងរដ្ឋJammu-និងCachemire ឥណ្ឌា។
ទាហានចិននិងឥណ្ឌា ធ្លាប់បានប្រឈមមុខដាក់គ្នារួចមកហើយនាពេលកន្លងមកនៅតំបន់ខ្ពង់រាប Doklam ភាគខាងកើតដែលស្ថិតនៅតាមបណ្តាយព្រំដែនប្រវែង ៣ ៥០០គម តែ ពុំមានខ្សែបន្ទាត់គំនូសព្រំដែនរវាងឥណ្ឌានិងចិនទេនៅក្នុងតំបន់ភ្នំ Himalaya ។
ប្រទេសចិន តែងតែស្រែកទាមទារឥតស្រាកស្រាន្ត បង្ខំឲ្យឥណ្ឌាដកទ័ពចេញជាឯកតោភាគីពីតំបន់Doklam --តំបន់ដែលជាទីកន្លែងដាច់ស្រយាលមួយនិងក៏គ្មានមនុស្សនៅដែរ តែចិននិង Bhoutan តែងតែទាមទារថាជាដែនអធិបតេយ្យរបស់ប្រទេសខ្លួនរៀងៗខ្លួន-ប្រទេស Bhoutan ដែលជាសម្ព័ន្ធមិត្តមួយរបស់ឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ