លោកដូណាល់ ត្រាំ ត្រលប់មកសរសើរ មេដឹកនាំកូរ៉េខាងជើង គីម ជុងអ៊ុន
បន្ទាប់ពីរិះគន់ ផង និងប្រើសំដី ខ្លាំងៗ គំរាមប្រើកម្លាំងយោធា ដាក់កូរ៉េខាងជើង ប្រធានាធិបតីអាមេរិក លោកដូណាល់ ត្រាំ នៅថ្ងៃពុធម្សិលមិញ បានងាកមកសរសើរ បញ្ជោរ មេដឹកនាំកូរ៉េខាងជើង លោកគីម ជុងអ៊ុន ថា បានសម្រេចចិត្ត ដោយប្រាជ្ញាឆ្លាតវៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ប្រធានាធិបតីអាមេរិក លោកដូណាល់ ត្រាំ បានស្វាគម សរសើរមេដឹកនាំកូរ៉េខាងជើង លោកគីម ជុងអ៊ុន ព្រោះលោកគីម ជុងបានបានធ្វើការសម្រេចចិត្ត មួយ ដ៏ឆ្លាតវៃ និងសមហេតុបំផុត។ នៅក្នុង សារ Twitters នៅថ្ងៃពុធ ម្ចាស់សេតវិមានអាមេរិក បានបញ្ជាក់ថា ការសម្រេចចិត្ត ផ្ទុយពីនេះ នឹងបង្កឲ្យមានគ្រោះមហន្តរាយ ហើយនិងមិនអាចទទួលយកបានទេ។
នៅថ្ងៃអង្គារ កូរ៉េខាងជើងបានប្រកាសផ្អាកវិញ គម្រោងបាញ់មីស៊ីល ៤គ្រាប់សំដៅទៅកោះ ហ្គាំ របស់អាមេរិក នៅមហាសមុទ្រប៉ាស៊ីហ្វិក។ តាម ទីភ្នាក់ងារព័ត៌មានរដ្ឋ កូរ៉េខាងជើង KNCA មេដឹកនាំកូរ៉េខាងជើង លោកគីម ជុងអ៊ុន បាននិយាយថា មុននឹងបាញ់មីស៊ីល លោកនៅរង់ចាំមើលឥរិយាបទរបស់អាមេរិកជាមុនសិន។ បើសិនអាមេរិកធ្វើសកម្មភាពមិនប្រុងប្រយ័ត្នណាមួយ ដែលគ្រោះថ្នាក់ដល់ឧបទ្វីបកូរ៉េ នោះក្រុងព្យុងយ៉ាងនឹងចាត់វិធានការដូចដែលបានប្រកាសពីខាងដើម។ ព្យុងយ៉ាងបានទាមទារឲ្យអាមេរិកសម្រេចចិត្តឲ្យត្រឹមត្រូវ ដើម្បីបន្ថយភាពតានតឹង និងជៀសវាងការប្រឈមមុខដាក់គ្នាដ៏គ្រោះថ្នាក់។
កូរ៉េខាងជើង ចង់សំដៅទៅលើសមយុទ្ធប្រចាំឆ្នាំ រវាងអាមេរិកនិង កូរ៉េខាងត្បូង ដែលនឹងត្រូវបើកធ្វើក្នុងពេលឆាប់ៗខាងមុខនេះ។ សម្រាប់កូរ៉េខាងជើង សមយុទ្ធនេះ ប្រៀបបាននឹងការត្រៀមវាយលុក ឈ្លានពានកូរ៉េខាងជើង។
តាមអ្នកជំនាញ មេដឹកនាំកូរ៉េខាងជើងបានបន្ទន់ជំហរ លែងបាញ់មីស៊ីលទៅក្បែរកោះហ្គាំ ដោយសារតែមានការដាក់គំនាបពីទីក្រុងប៉េកាំង ដែលបាននិយាយឲ្យ ក្រុងព្យុងយ៉ាងយល់ថា ចិននឹងមិនអន្តរាគមន៍ជួយកូរ៉េខាងជើងទេ បើសិនកូរ៉េខាងជើង ធ្វើសកម្មភាពណាមួយ ដែលអាមេរិកចាត់ទុកថា ជាការគំរាមកំហែងដល់សន្តិសុខរបស់អាមេរិកនោះ។
នៅថ្ងៃពុធ នៅក្នុងជំនួបជាមួយ មេបញ្ជាការកងទ័ពចិន នៅទីក្រុងប៉េកាំង មេបញ្ជាការកងទ័ពអាមេរិក លោក Joseph Dunford បានទាមទារឲ្យចិន ដាក់សម្ពាធបន្ថែម ដើម្បីឲ្យកូរ៉េខាងជើងលះបង់ចោលកម្មវិធីផលិតមីស៊ីលបាលីស្ទីក និងអាវុធនុយក្លេអ៊ែរ។ តាមបញ្ជាការអាមេរិក កម្មវិធីមីស៊ីលរបស់កូរ៉េខាងជើង គ្រោះថ្នាក់សម្រាប់សហគមន៍អន្តរជាតិ ដែលនៅក្នុងនោះ មានផងដែរ ប្រទេសចិន សម្ព័ន្ធមិត្តសំខាន់របស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ