ចិន៖ភរិយាលោកលីវ ស៊ាវប៉ូ លេចមុខជាថ្មី ក្នុងវីដេអូYouTube
លោកស្រីលីវ ស្យា ជាភរិយារបស់ជ័យលាភីណូបែលសន្តិភាពជនជាតិចិន លីវ ស៊ាវប៉ូ បានលេចមុខជាថ្មី តាមវីដេអូដែលគេចែកចាយក្នុងយូធូប ថ្ងៃសុក្រម្សិលមិញ។ គេបាត់ដំណឹងលោកស្រីតាំងពីថ្ងៃបុណ្យសពលោកលីវ ស៊ាវប៉ូ នៅពាក់កណ្តាលខែកក្កដាកន្លងទៅ។ ក្នុងវីដេអូចែកចាយលើយូធូប លោកស្រីលីវបានសុំអោយទុកពេលអោយលោកស្រីបានព្យាបាលចិត្ត កាត់ចិត្តក្រោយមរណភាពស្វាមីរបស់លោកស្រី។
ចុះផ្សាយនៅថ្ងៃ៖ កែប្រែថ្ងៃទី៖
រូបភាពវីដេអូចុះផ្សាយក្នុងយូធូប បង្ហាញរូបភាពលោកស្រីលីវ ស្យា ធ្វើអោយគេអាចធូរស្រាលចិត្តបន្តិចវិញ ព្រោះមិត្តភក្តិរបស់លោកស្រី បាត់ដំណឹងលោកស្រី មិនអាចទាក់ទងលោកស្រី តាំងពីពាក់កណ្តាលខែកក្កដា ក្រោយបុណ្យសពរបស់លោកលីវ ស៊ាវប៉ូ ជាស្វាមីលោកស្រី។ លោកលីវ ជាស្វាមីត្រូវគេស្គាល់ថា ជាសកម្មជនប្រឆាំង និងជាជ័យលាភីណូបែលសន្តិភាពជនជាតិចិនដ៏ល្បីឈ្មោះ។
វីដេអូចុះផ្សាយក្នុងយូធូប ម្សិលមិញ មានរយៈពេលមួយនាទី។ ក្នុងវីដេអូ គេឃើញលោកស្រីលីវ ស្យា និយាយចំទៅកញ្ចក់កាមេរ៉ាតែម្តង។ លោកស្រីប្រាប់ថា លោកស្រីនៅខាងក្រៅ កំពុងសម្រាកយកកម្លាំង។ លោកស្រីសុំអោយទុកពេលអោយលោកស្រីបានព្យាបាលចិត្ត កាត់ចិត្ត ហើយថ្ងៃណាមួយលោកស្រីអាចនឹងលេចមុខ ហើយមានសុខភាពល្អ នៅពីមុខអ្នកទាំងអស់គ្នា។ លោកស្រីលីវពោលពាក្យថា “នៅខាងក្រៅ” មិនដឺងថាតើលោកស្រីកំពុងនៅទីណាពិតប្រាកដទេ។
ភរិយាលោកលីវ ស៊ាវប៉ូ ក៏បានរំលឹកឡើងវិញដែរ ពីកាលដែលស្វាមីលោកស្រីនៅរស់រានមានជីវិត ហើយកំពុងទទួលការព្យាបាលពីក្រុមគ្រូពេទ្យ។ លោកស្រីរំលឹកថា ក្រុមគ្រូពេទ្យបានខិតខំតាមដែលពួកគេអាចធ្វើបាន។ គួររំលឹកថា លោកលីវ ស៊ាវប៉ូ ជាសកម្មជនប្រឆាំងនៅចិន ដែលត្រូវជាស្វាមីលោកស្រី លីវ ស្យា បានទទួលមរណភាព កាលពីថ្ងៃ១៣កក្កដា ដោយជំងឺមហារីកថ្លើ់ម ក្រោយអាជ្ញាធរចិនដោះលែងលោកអោយមានសេរីភាព។ តុលាការចិនដាក់ទោសអោយលោកជាប់ពន្ធនាគារ១១ឆ្នាំ ពីបទប្រឆាំងនយោបាយ។ លោកស្រីលីវ ស្យា ជាភរិយាត្រូវបានឃុំខ្លួនស្ថិតក្រោមការឃ្លាំមើលរបស់អាជ្ញាធរ តាំងពីឆ្នាំ២០១០ ពេលលោកលីវ ជាប់ឈ្មោះជាជ័យលាភីណូបែលសន្តិភាព។
មុនឃើញរូបលោកស្រីម្តងទៀត ក្នុងយូធូបម្សិលមិញនេះ អាជ្ញាធរចិនធ្លាប់បង្ហាញរូបភាពលោកស្រីម្តងដែរ កាលពីពេលបុណ្យសពលោកលីវ ថ្ងៃ១៥កក្កដា។ ក្រោយមកក៏បាត់ដំណឹងលោកស្រីលីវឈឹងតែម្តង រហូតមេធាវីជនជាតិអាមេរិកាំងរបស់លោកស្រី បានប្រកាសថា ដាក់ពាក្យប្តឹងទៅអង្គការសហប្រជាជាតិ ពីការបាត់ខ្លួនលោកស្រី។ វីដេអូបង្ហាញរូបលោកស្រីម្សិលមិញនេះ ត្រូវបានបង្ហោះក្នុងយូធូប ដោយជនឈ្មោះថា “goudan li”។ កន្លងមក អាជ្ញាធរចិនប្រាប់ថា លោកស្រីលីវ មានសេរីភាព ហើយការដែលមិនអាចទាក់ទងលោកស្រីបានក៏ដោយសារលោកស្រីចង់កាន់ទុក្ខកាត់ចិត្តក្រោយមរណភាពស្វាមី នៅកន្លែងមួយដែលស្ងប់ស្ងាត់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ