បង់ក្លាដែសបិទភ្នែក មិនបើកដៃស្វាគមជនជាតិរ៉ូហ៊ីងយ៉ា ដែលរត់គេចពីអំពើហិង្សានៅភូមា
អាជ្ញាធរបង់ក្លាដែស នៅថ្ងៃអាទិត្យនេះ បានចាប់បញ្ជូន ដោយបង្ខំ ជនជាតិរ៉ូហ៊ីងយ៉ា ៧០នាក់ ដែលបានឆ្លងចូលទៅក្នុងទឹកដីបង់ក្លាដែស នៅក្រោយរត់គេចពីអំពើហិង្សា នៅប្រទេសភូមា។ តាំងពីថ្ងៃសុក្រ ការវាយប្រហារ និងប្រយុទ្ធគ្នា រវាងក្រុមអ៊ីស្លាមជ្រុលនិយម រ៉ូហ៊ីងយ៉ា និងកងទ័ពភូមា បានសម្លាប់មនុស្ស៨៩នាក់ និងបានបង្ខំឲ្យប្រជាជនរាប់ម៉ឺននាក់រត់ចោលផ្ទះសម្បែង។ ក្នុងចំណោមនោះ ជនជាតិភាគតិច រ៉ូហ៊ីងយ៉ា កាន់សាសនាអ៊ីស្លាមបានសម្រុកភៀសខ្លួន សំដៅប្រទេសបង់ក្លាដែស។
ចុះផ្សាយនៅថ្ងៃ៖ កែប្រែថ្ងៃទី៖
បង់ក្លាដែសមិនសណ្តោស ស្វាគមជនជាតិរ៉ូហ៊ីងយ៉ា។ ឆ្មាំព្រំដែនបង់ក្លាដែស នៅព្រឹកថ្ងៃអាទិត្យនេះ បានចាប់បញ្ជូនជនជាតិរ៉ូហ៊ីងយ៉ា ៧០ នាក់ ឲ្យត្រលប់ចូលទៅភូមាវិញ។ តាមប្រធានប៉ូលិសស្រុកបង់ក្លាដែស គេបានស្ទាក់ចាប់ជនជាតិរ៉ូហ៊ីងយ៉ា ទាំងនោះ នៅក្នុងទឹកដីបង់ក្លាដែស នៅពេលពួកគេធ្វើដំណើរសំដៅជំរំជនភៀសខ្លួន ជាទីដែលជនជាតិរ៉ូហ៊ីងយ៉ារាប់ពាន់នាក់កំពុងរស់នៅក្នុងស្ថានភាព ដ៏លំបាករួចហើយនោះ។
តាមប៉ូលិសបង់ក្លាដែស ដែលសុំមិនបញ្ចេញឈ្មោះ ជនជាតិរ៉ូហ៊ីងយ៉ា បានសុំអង្វរ កុំឲ្យគេចាប់បញ្ជូនពួកគេ ទៅភូមាវិញ។ នៅរដ្ឋរ៉ាគីន នៅប៉ែកខាងលិចភូមា ជនជាតិរ៉ូហ៊ីងយ៉ា កាន់សាសនាអ៊ីស្លាមបានរត់គេចពីអំពើហិង្សា និងការប្រយុទ្ធគ្នា រវាងកងទ័ពភូមា និងក្រុមឧទ្ទាមអ៊ីស្លាមជ្រុលនិយម ដែលបានផ្ទុះឡើងនៅថ្ងៃសុក្រ និងដែលបានសម្លាប់មនុស្ស៨៩នាក់។
ប៉ូលិសបង់ក្លាដែសបានចាប់បញ្ជូនជនជាតិរ៉ូហ៊ីងយ៉ាទៅទឹកដីភូមា ដោយមិនខ្វល់ថា នៅទីនោះ ទាហានភូមា បានបាញ់ទាំង កាំភ្លើងធំ និងកាំភ្លើងស្វ័យប្រវត្តិ ទៅលើប្រជាជនស៊ីវិល ដែលរត់គេចពីប្រទេស។ តាំងពីការប្រយុទ្ធគ្នាផ្ទុះឡើងនៅថ្ងៃសុក្រ ប្រជាជនរ៉ូហ៊ីងយ៉ា បានសម្រុករត់ភៀសខ្លួនទៅបង់ក្លាដែស ប៉ុន្តែ ឆ្មាំព្រំដែនបង់ក្លាដែស បានបដិសេធ មិនទទួលជួយពួកគេនោះទេ។ ជាលទ្ធផល ជនជាតិរ៉ូហ៊ីងយ៉ា រាប់ពាន់នាក់ ដែលភាគច្រើន ជាស្រ្តី និងកុមារ នៅជាប់កកនៅព្រំដែន ទៅមុខ មិនរួច ទៅក្រោយក៏មិនរួច។
រដ្ឋាភិបាលភូមាវិញ បានបង្ហាញនៅថ្ងៃអាទិត្យនេះថា អ្នកភូមិដែលមិនកាន់សាសនាអ៊ីស្លាមរាប់ម៉ឺននាក់ ត្រូវបានគេជម្លៀសចេញផងដែរពីរដ្ឋរ៉ាគីន។ តាមយោបល់របស់អ្នកដែលស្គាល់ស្ថានភាពនៅរដ្ឋរ៉ាគីន ការប្រយុទ្ធគ្នានៅរ៉ាគីនមានទ្រង់ទ្រាយ រូបរាងជាការងើបបះបោរ ជាងការវាយប្រហាររបស់ពួកឧទ្ទាមរ៉ូហ៊ីងយ៉ា។ ប្រភពពីខាងទាហានភូមាវិញ វាយតម្លៃថា គេកំពុងប្រឈមនឹងក្រុមធ្វើបដិវត្តន៍។ អ្នកភូមិបានកាន់អាវុធ ប្រយុទ្ធគ្មានខ្លាចស្លាប់ នៅខាងពួកឧទ្ទាមអ៊ីស្លាមជ្រុលនិយម។
ការវាយប្រហាររបស់ក្រុមឧទ្ទាមរ៉ូហ៊ីងយ៉ា នៅថ្ងៃសុក្រ កើតមានតែនៅមួយថ្ងៃមុន ដែលអតីតអគ្គលេខាធិការអង្គការសហប្រជាជាតិ លោកកូហ្វី អាណាន់ បានព្រមានពីនិន្នាការជ្រុលនិយមរបស់ជនជាតិរ៉ូហ៊ីងយ៉ា កាន់សាសនាអ៊ីស្លាម។ នៅក្នុងឱកាសបង្ហាញរបាយការណ៍ នៅថ្ងៃព្រហស្បតិ៍ នៅភូមា លោកកូហ្វី អាណាន់បាននិយាយក្រើនរំលឹកឲ្យរដ្ឋាភិបាលភូមាប្រញាប់ដោះស្រាយវិបត្តិនៅរ៉ាគីន ព្រោះបើមិនដូច្នោះទេ អំពើហិង្សា ការធ្វើទុក្ខបុកម្នេញ និងអំពើអយុត្តិធម៌ នឹងរុញច្រាន ជនជាតិរ៉ូហ៊ីងយ៉ាឲ្យធ្លាក់ទៅក្នុងដៃ របស់ពួកអ៊ីស្លាម ជ្រុលនិយម ដែលអាចបង្កអសន្តិសុខ និងភេរវកម្មនៅក្នុងទឹកដីភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ