លោក Trump ថា ចរចាជាមួយកូរ៉េខាងជើង គឺគ្មានប្រយោជន៍ តែលោក Mattis មិនយល់ស្រប
សំណុំរឿងកូរ៉េខាងជើង ពិសេសតាំងពីកូរ៉េខាងជើងបានបាញ់គ្រាប់មីស៊ីលបាលីស្ទិករំលងទឹកជប៉ុនក្នុងថ្ងៃទី២៩ សីហាបានធ្វើឲ្យលោកប្រធានាធិបតីអាមេរិកដូណាល់ ត្រាំក្តៅស្លឹកត្រចៀកជាថ្មី។ លោកត្រាំបានថ្លែងដោយប្រើពាក្យខ្លាំងៗថា ការចរចាជាមួយកូរ៉េខាងជើងជារឿងឥតប្រយោជន៍ និងមិនមែនជាដំណោះស្រាយទេ។ អ្វីដែលលោកត្រាំបានថ្លែងនេះហាក់បានផ្ទុយនឹងការថ្លែងរបស់លោករដ្ឋមន្រ្តីការពារជាតិ James Mattis ដែលថា ទ្វារចរចាជាមួយកូរ៉េខាងជើងមិនទាន់បិទនៅឡើយទេ។
ចុះផ្សាយនៅថ្ងៃ៖
តើជារឿងមិនចុះសម្រុងគ្នា ឬមួយក៏ជាយុទ្ធសាស្រ្តផ្សេងគ្នារវាងលោកប្រធានាធិបតីដូណាល់ ត្រាំ និងរដ្ឋមន្រ្តីការពារជាតិរបស់លោក គឺលោក James Mattis?។ គេនៅមិនទាន់អាចនិយាយអ្វីបាននៅឡើយទេ អ្វីដែលគេដឹង លោកត្រាំ និងលោក Mattis កំពុងយល់ឃើញខុសគ្នានៅក្នុងសំណុំរឿងតែមួយ។ ពិតណាស់ថា ភ្លាមៗក្រោយពីកូរ៉េខាងជើងបានបាញ់គ្រាប់មីស៊ីលបាលីស្ទិករំលងប្រទេសជប៉ុន លោកដូណាល់ ត្រាំហាក់មិនបានបញ្ចេញកំហឹង និងគំរាមកម្ទេចកូរ៉េខាងជើងឲ្យក្លាយជាពំនូកភ្លើងដូចមុនទៀតឡើយ ពោលបានត្រឹមបញ្ជាក់យ៉ាងសាមញ្ញថា មានវិធីសាស្រ្តច្រើនយ៉ាងដែលលោកអាចប្រើចំពោះរបបក្រុងព្យុងយ៉ាង។
តែនៅថ្ងៃពុធ ទី៣០ សីហា លោកត្រាំហាក់បានវិលមកដំឡើងសរសៃ ក ដោយដំឡើងសម្លេងខ្លាំងៗដាក់កូរ៉េខាងជើងថា តាំងពី ២៥ឆ្នាំមកហើយដែលអាមេរិកជជែកជាមួយកូរ៉េខាងជើង និងដែលលទ្ធផលទទួលបាន អាមេរិកបែរជារងគ្រោះដោយការគំរាមកំហែងទៅវិញ។ នៅក្នុងន័យនេះ លោកត្រាំបាននិយាយត្រង់ៗដោយមិនបញ្ឈិតបញ្ឈៀងថា ចរចាជាមួយកូរ៉េខាងជើង គឺគ្មានន័យ ហើយក៏មិនមែនជាដំណោះស្រាយដែរ។ តែបញ្ហានៅត្រង់ថា ការថ្លែងរបស់លោកត្រាំដូចនេះបានផ្ទុយនឹងការថ្លែងរបស់លោករដ្ឋមន្រ្តីការពារជាតិអាមេរិក James Mattis។
នៅក្នុងសន្និសីទកាសែតរួមគ្នាជាមួយសមភាគីកូរ៉េខាងត្បូងនាពេលថ្មីៗនេះ លោក Mattis បានថ្លែងថា ទ្វារនៃកិច្ចចរចាជាមួយកូរ៉េខាងជើងនៅបើកចំហ ហើយដំណោះស្រាយតាមផ្លូវទូតនៅតែមានជានិច្ច។ ចំណែកលោកប្រមុខការទូតអាមេរិក Rex Tilleson ក៏យល់ឃើញដូចលោក Mattis តែលោក Tilleson បានបន្ថែមថា ទន្ទឹមនឹងការព្យាយាមដោះស្រាយតាមផ្លូវទូត អាមេរិកក៏មិនភ្លេចត្រៀមខ្លួនប្រើកម្លាំងបាយទេនៅក្នុងករណីណាដែលមនុស្សខ្លាំងកូរ៉េខាងជើងគីម ជុងអ៊ុនឡើងចាងហួសហេតុខ្លាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ