កូរ៉េខាងជើងបានប្រកាសពីការសាកល្បងគ្រាប់បែកអ៊ីដ្រូសែនប្រកបដោយជោគជ័យ !
ចុះផ្សាយនៅថ្ងៃ៖
ស្តាប់ - ០៧:៣១
កូរ៉េខាងជើងបានប្រកាសឲ្យដឹងនៅថ្ងៃអាទិត្យ ទី៣ កញ្ញាថា ខ្លួនពិតជាបានធ្វើការសាកល្បងប្រកបដោយជោគជ័យនូវគ្រាប់បែកអ៊ីដ្រូសែន។ ការសាកល្បងគ្រាប់បែកប្រភេទនេះត្រូវបានធ្វើឡើងនៅក្រោមដី និងដែលឥទ្ធិពលរបស់វាប្រៀបដូចនឹងគ្រោះរញ្ជួយដីក្នុងកម្រិតដល់ទៅ ៦,៣រ៉ិចទ័រ។ នេះជាការសាកល្បងនុយក្លេអ៊ែរលើកទី៦ ពីសំណាក់កូរ៉េខាងជើង គិតតាំងពីឆ្នាំ ២០០៦។ សហគមន៍អន្តរជាតិ មានទាំងចិន និងរស្ស៊ីដែលជាសម្ព័ន្ធមិត្តរបស់របបក្រុងព្យុងយ៉ាងបានថ្កោលទោសលើការសាកល្បងនុយក្លេអ៊ែររបស់កូរ៉េខាងជើងពេលនេះ។ លោកប្រធានាធិបតីកូរ៉េខាងត្បូងបានស្នើឲ្យដាក់ទ័ណ្ឌកម្មថ្មីចាស់ដៃលើកូរ៉េខាងជើង។
ក្រៅពីការប្រកាសទទួលស្គាល់ដោយកូរ៉េខាងជើងផ្ទាល់ គេពិតជាពិបាកស្វែងរកព័ត៌មានផ្សេងដើម្បីអាចផ្ទៀងផ្ទាត់។ តែទោះជាយ៉ាងនេះក្តី ព្រឹត្តិការណ៍ផ្ទុះយ៉ាងកក្រើកដីដូចគ្រោះរញ្ជួយដីដែលមានកម្រិតដល់ទៅ ៦,៣រ៉ិចទ័រ ជាភស្តុតាងមួយគ្រប់គ្រាន់ដែលស បញ្ជាក់ពីការសាកល្បងគ្រាប់បែកដ៏មានឥទ្ធិពលខ្លាំងរបស់កូរ៉េខាងជើង។ អគ្គបញ្ជាការដ្ឋានកូរ៉េខាងត្បូងបានចេញសេចក្តីប្រកាសព័ត៌មានមួយដោយបញ្ជាក់ពីការចាប់បានរលករញ្ជួយដីមួយនៅក្បែរមជ្ឈមណ្ឌលសាកល្បងនុយក្លេអ៊ែរកូរ៉េខាងជើងឈ្មោះ Punggye-ri។ បន្ទាប់មក ព័ត៌មានមួយនេះក៏ត្រូវបានបញ្ជាក់ដោយវិទ្យាស្ថានភូគព្ភសាស្ត្រអាមេរិកាំងដែលថា កម្រិត ៦,៣រ៉ិចទ័រពិតជាកម្រិតមួយខ្លាំងជាងការសាកល្បងលើកមុនៗ និងថា កម្រិតមួយនេះកើតចេញពីការបំផ្ទុះគ្រាប់ជាងរញ្ជួយដី។
ចំណែកទីភ្នាក់ងារសារព័ត៌មានកូរ៉េខាងត្បូងឈ្មោះ Yonhap បានចុះផ្សាយព័ត៌មានរបស់ការិយាល័យឧតុនិយមនៅកូរ៉េខាងត្បូងដែលថា កម្រិតរញ្ជួយដីដោយការបំផ្ទុះគ្រាប់បែកលើកនេះមានឥទ្ធិពលខ្លាំងជាងការបំផ្ទុះលើកមុនដល់ទៅជិត ១០ដង។ នៅទីបំផុត ទូរទស្សន៍ជាតិនៅកូរ៉េខាងជើងបានប្រកាសជាផ្លូវការពីការសាកល្បងគ្រាប់បែកអ៊ីដ្រូសែនប្រកបដោយជោគជ័យ។ តាមពិតទៅនៅមុនការសាកល្បងនេះ កូរ៉េខាងជើងក៏បានបញ្ជាក់ពីការផលិតបានគ្រាប់បែកអ៊ីដ្រូសែនដែលអាចយកទៅបំពាក់លើគ្រាប់មីស៊ីលបាលី។ យោងតាមទីភ្នាក់ងារសារព័ត៌មានកូរ៉េខាងជើងឈ្មោះ CKNA មនុស្សខ្លាំងកូរ៉េខាងជើងគីម ជុងអ៊ុនបានថ្លែងអួតអាងថា គ្រាប់បែកអ៊ីដ្រូសែននេះជាប្រភេទគ្រាប់បែកមានឥទ្ធិពលខ្លាំងក្លាផលិតដោយក្រុមអ្នកជំនាញកូរ៉េខាងជើង និងប្រើបច្ចេកវិទ្យាកូរ៉េខាងជើង ១០០%។
ភាពខុសគ្នារវាងគ្រាប់បែកនុយក្លេអ៊ែរប្រភេទ A និង H
មានគ្រាប់បែក ២ប្រភេទដែលគេចាត់ទុកជាគ្រាប់បែកដ៏មានឥទ្ធិពល និងគ្រោះថ្នាក់ គឺគ្រាប់បែក A និងគ្រាប់បែកអ៊ីដ្រូសែនហៅកាត់ថា គ្រាប់បែក H។
គ្រាប់បែក A និងគ្រាប់បែក H ត្រូវបានគេចាត់ទុកជាគ្រាប់បែកនុយក្លេអ៊ែរដូចគ្នា តែមានឥទ្ធិពលខុសគ្នាឆ្ងាយណាស់។ គ្រាប់បែក A ជាគ្រាប់បែកផលិតដោយអាមេរិកាំងនៅក្នុងសម័យសង្រ្គាមលោកលើកទី២។ គ្រឿងបញ្ឆេះនៅក្នុងគ្រាប់បែក A ត្រូវបានធ្វើឡើងដោយជាតិអាតូមធ្ងន់ ដូចយ៉ាងជាតិអ៊ុយរ៉ាញ៉ូមប្រភេទ ២៣៥ ឬជាតិភ្លុយតូញ៉ូមប្រភេទ ២៣៩ដាក់នៅក្នុងស្នូលមួយ។
នៅពេលដែលមានបរិមាណអាតូមគ្រប់គ្រាន់ ការបំផ្ទុះគ្រាប់បែកប្រភេទនេះនឹងធ្វើឲ្យមានការផ្ទុះឆេះបំបែកអាតូមបន្តៗគ្នារហូតបង្កឲ្យមានកំដៅក្តៅរាប់ម៉ឺនអង្សារយ៉ាងឆាប់រហ័ស និងក្នុងរយៈពេលខ្លី។ គ្រាប់បែកនុយក្លេអ៊ែរប្រភេទ A នេះត្រូវបានទ័ពអាមេរិកប្រើទម្លាក់លើទីក្រុងហ៊ីរ៉ូស្ហ៊ីម៉ា និងទីក្រុងណាហ្កាស្ហាគីរបស់ជប៉ុនកាលពីខែសីហា ឆ្នាំ ១៩៤៥ ដែលបណ្តាលឲ្យមានមនុស្សស្លាប់ ២០ម៉ឺននាក់។ ចំណែកគ្រាប់បែកនុយក្លេអ៊ែរប្រភេទ H គឺមានឥទ្ធិពលខ្លាំងឆ្ងាយណាស់ ឬគេអាចនិយាយបានម្យ៉ាងទៀតថា ជាការយកគ្រាប់បែក A ទៅធ្វើឲ្យចម្រើន និងមានប្រសិទ្ធិភាពខ្ពស់ក្រោមបច្ចេកវិទ្យាថ្មី។
គ្រាប់បែក H មានពីរជាន់ ទី១ មានដាក់គ្រាប់បែកនុយក្លេអ៊ែរផ្ទុកដោយជាតិអ៊ុយរ៉ាញ៉ូមប្រភេទ ២៣៥ ឬជាតិភ្លុយតូញ៉ូមប្រភេទ ២៣៩ និងនៅជាន់ទី២ ជាក្បាលចំហេះដើរដោយចំហាយទឹកក្តៅ។ គ្រាប់បែក H អាចបង្កឲ្យមានភាពមហន្តរាយក្រោមទ្រង់ទ្រាយធំជាងគ្រាប់បែក A និងអាចបញ្ចេញកំដៅលើសគ្រាប់បែក A ច្រើនណាស់។ ក្រុមអ្នកវិភាគយល់ថា បើកូរ៉េខាងជើងពិតជាសាកល្បងគ្រាប់បែកអ៊ីដ្រូសែនដោយជោគជ័យមែន នោះកម្មវិធីនុយក្លេអ៊ែរកូរ៉េខាងជើងពិតកំពុងបោះជំហានទៅមុខគួរឲ្យបារម្ភខ្លាំងណាស់។
សហគមន៍អន្តរជាតិថ្កោលទោសទង្វើរបស់កូរ៉េខាងជើង
ក៏ដូចជាសព្វមួយដង ប្រតិកម្មបានធ្លាក់មកជាបន្តបន្ទាប់ដោយបានថ្កោលទោសខ្លាំងៗលើទង្វើសាកល្បងនុយក្លេអ៊ែរលើកទី៦ របស់កូរ៉េខាជើងពេលនេះ។ ចិនដែលជាសម្ព័ន្ធមិត្តចាក់ទឹកមិនលេចរបស់កូរ៉េខាងជើងបានជំរុញរបបក្រុងព្យុងយ៉ាងឲ្យបញ្ឈប់ទង្វើសាកល្បងនុយក្លេអ៊ែរ និងគ្រាប់មីស៊ីលដែលចិនយល់ថា កាន់តែធ្វើឲ្យស្ថានការណ៍ធ្លាក់ដុនដាប និងមិនបានហុចប្រយោជន៍អ្វីសម្រាប់កូរ៉េខាងជើងខ្លួនឯងឡើយ។ រីឯរុស្ស៊ីដែលជាមិត្តស្និទ្ធនឹងកូរ៉េខាងជើងក៏បានថ្កោលទោសដែរ តែក៏បានអំពាវនាវឲ្យគ្រប់ភាគីមានការអត់ធ្មត់ និងចៀសវាងប្រើកម្លាំងបាយដើម្បីដោះស្រាយបញ្ហា។
នៅជប៉ុន លោកប្រមុខរដ្ឋាភិបាលជប៉ុនស្ហ៊ីនហ្សូ អាបេបានចាត់ទុកទង្វើរបស់កូរ៉េខាងជើងថា ជារឿងដែលមិនអាចទទួលយកបានទេ។ ចំណែកបងប្អូនបង្កើតគូសត្រូវកូរ៉េខាងជើង គឺកូរ៉េខាងត្បូងតាមរយៈលោកប្រធានាធិបតីមូន ចៃអ៊ីនបានស្នើឲ្យមានការដាក់ទ័ណ្ឌកម្មថ្មីចាស់ដៃដោយប្រើយន្តការណ៍ក្រុមប្រឹក្សាសន្តិសុខដើម្បីធ្វើឲ្យកូរ៉េខាងជើងរឹតតែឯកោនៅលើឆាកអន្តរជាតិ។ នៅបារាំង លោកប្រធានាធិបតីម៉ាក្រុងបានអំពាវនាវឲ្យសហគមន៍អន្តរជាតិចាត់វិធានការម៉ឹងម៉ាត់ដាក់កូរ៉េខាងជើងដោយលោកយល់ថា ទង្វើរបស់ក្រុងព្យុងយ៉ាងបានធ្វើឲ្យប៉ះពាល់ដល់សន្តិភាព និងសន្តិសុខក្នុងលោក។
នៅសហភាពអឺរ៉ុប លោកស្រីប្រមុខការទូតអឺរ៉ុប Federica Mogherini បានបរិហារលើទង្វើរបស់កូរ៉េខាងជើង និងអំពាវនាវរបបព្យុងយ៉ាងឲ្យបោះបង់ចោលកម្មវិធីនុយក្លេអ៊ែរ និងគ្រាប់មីស៊ីលទាំងអស់ រួចវិលត្រឡប់ទៅកាន់តុចរចាជាថ្មីដោយស្មោះត្រង់។ ប្រតិកម្មក៏មានដែរពីទីភ្នាក់ងារថាមពលបរមាណូអន្តរជាតិ AIEA ដែលបរិហារលើទង្វើគួរឲ្យសោកស្តាយ និងការមើលងាយសហគមន៍អន្តរជាតិរបស់កូរ៉េខាងជើង។ រីឯអង្គការអូតង់តាមរយៈលោកអគ្គនាយក Jens Stoltenberg ក៏បានសម្តែងការសោកស្តាយលើកាយវិការបង្កអស្ថិរភាពរបស់ក្រុងព្យុងយ៉ាងដែលកំពុងគំរាមសន្តិសុខតំបន់ និងអន្តរជាតិ។
ពីសហរដ្ឋអាមេរិក លោកដូណាល់ ត្រាំមិនញញើតនឹងចាត់ទុកកូរ៉េខាងជើងជារដ្ឋយូកូម និងថា គេមិនអាចប្រើនយោបាយបន្ធូរបន្ថយដាក់កូរ៉េខាងជើងបានទៀតឡើយ។ ទន្ទឹមគ្នានេះ សេតវិមានប្រកាសឲ្យដឹងថា លោកត្រាំកោះប្រជុំក្រុមសន្តិសុខជាតិដើម្បីសិក្សាពីបញ្ហាកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ