គីម ជុងអ៊ុន ពីមេដឹកនាំក្មេងខ្ចីខ្វះបទពិសោធន៍ ទៅជាអ្នកមានប្រៀប ?
ចុះផ្សាយនៅថ្ងៃ៖
ស្តាប់ - ០៤:៣៣
របបកុម្មុយនិស្តព្យុងយ៉ាង ដឹកនាំដោយ គីម ជុងអ៊ុន គ្មានខ្វល់ គ្មានព្រឺរអារនឹងទណ្ឌកម្ម ឬពាក្យសំឡុតរបស់សហគមន៍អន្តរជាតិ -អាមេរិក និងចិនឡើយ។ កូរ៉េខាងជើងបន្តធ្វើការសាកល្បងមីស៊ីល និងនុយក្លេអ៊ែរអត់ដាច់។ ការសាកល្បងនុយក្លេអ៊ែរប្រកបដោយជោគជ័យ កូរ៉េខាងជើងបានធ្វើជាលើកទី៦ នៅថ្ងៃអាទិត្យទី ៣ កញ្ញា បាននិងកំពុងបង្កការព្រួយបារម្ភយ៉ាងខ្លាំងសម្រាប់ពិភពលោកទាំងមូល។ តើទង្វើបែបនេះជាសេចក្តីសម្រេចរបស់មេដឹកនាំក្មេងខ្ចីខ្វះបទពិសោធន៍ ឬក៏ជាជម្រើសច្បាស់លាស់ ជាយុទ្ធសាស្ត្រ ?
ឡប់សតិ កន្ធាត់ ឆ្កួត ...ពាក្យបន្តុះបង្អាប់ហៅ គីម ជុនអ៊ុន ប្រមុខដឹកនាំកូរ៉េខាងជើងវ័យ៣៣ឆ្នាំ មានច្រើនណាស់។ កន្លងមកនេះ គេទំនងមើលស្រាល គីម ជុងអ៊ុន ជ្រុលបន្តិច ទើបផលវិបាកហាក់ដូចជាធ្ងន់ធ្ងរខ្លាំងនៅពេលនេះ។
ដើរតាមគន្លងឪពុក និងជីតា គីមជុងអ៊ុន កំពុងនាំសាធារណរដ្ឋប្រជាមានិតប្រជាធិបតេយ្យកូរ៉េ (ឈ្មោះផ្លូវការរបស់កូរ៉េខាងជើង) ឱ្យក្លាយជាមហាអំណាចនុយក្លេអ៊ែរថ្មី ! ដោយផ្គើនសហរដ្ឋអាមេរិកផង និង ចិន ជាមហាមិត្តតែមួយគត់របស់ខ្លួនទៀត។ ការបាញ់សាកល្បងនុយក្លេអ៊ែរជាលើកទី៦ ប្រព្រឹត្តទៅចំថ្ងៃដែលចិនបើកជំនួបកំពូលក្រុម៥ប្រទេសកំពុងលូតលាស់ខ្លាំង Brics។ បើតាមអ្នកវិភាគ នេះមិនមែនជាការចៃដន្យទេ តែជាសាររបស់ព្យុង យ៉ាងចំពោះប៉េកាំង កុំឱ្យយកកូរ៉េខាងជើងទៅធ្វើជាកូនអុកក្នុងជម្លោះជាមួយអាមេរិក ?
នៅពេលឡើងកាន់អំណាចភ្លាម នៅឆ្នាំ២០១១ គ្រប់គ្នាគិតថា គីមជុងអ៊ុន កូនប្រុសទីបីរបស់អគ្គមគ្គុទេសក៍គីម ជុងអ៊ីល គ្រាន់តែជាតំណាងមេដឹកនាំដែលញាក់ខ្សែដោយមេកុម្មុយនិស្តគ្រាក់ៗសល់ពីសម័យឪពុកទេ។ គ្មានបទពិសោធន៍ បានក្លាយជាមេដឹកនាំប្រទេសដោយសារការតែងតាំងពីឪពុក ដោយសារការលើកបន្តុបរបស់បក្ស ដូច្នេះគ្មានអំណាចពិតទេ ! ប៉ុន្តែភាពដាច់ខាតរបស់គីមជុងអ៊ុន មានខ្លាំងជាងការគិតរបស់ពិភពលោកទៅទៀត។ គ្មានត្រាប្រណី ដក បំបាត់ រាល់គ្រប់បុគ្គលដែលមិនចង់ឱនគោរពខ្លួន សូម្បីតែឪពុកមាដែលជាទន្ទល់អំណាចក៏មិនអនុគ្រោះផង។
ភាពឆ្លាត ដាច់ខាត កាចហើយសាហាវ មិនស្ទាក់ស្ទើរនឹងកម្ចាត់ជនសង្ស័យ បានធ្វើអ្នកជុំវិញពិចារណាឡើងវិញ និងបានផ្តល់ឱកាសឱ្យគីមជុងអ៊ុនប្រមូលអំណាចក្តាប់បានយ៉ាងពេញដៃ។ បើតាមសាស្ត្រាចារ្យជំនាញនៅសាកលវិទ្យាល័យ Koomkim ក្រុងសេអ៊ូល គីមជុងអ៊ុន ធ្វើការតែជាមួយក្រុមជំនិត មួយក្រុមតូច សុទ្ធតែក្មេងខ្ទង់ ៤០ឆ្នាំ មិនសូវមានអ្នកស្គាល់ និងជាឥស្សរជនចាស់ៗពីរបីនាក់ប៉ុណ្ណោះ។ បែងចែកទំនួលខុសត្រូវឱ្យទីប្រឹក្សាច្រើនជាងឪពុក ប៉ុន្តែគីមជុងអ៊ុនជាអ្នកសម្រេចចុងក្រោយគ្រប់ការណ៍។
គ្រាន់តែឡើងកាន់អំណាចបានបន្តិច គីម ជុងអ៊ុន បានសើរើរៀបចំផែនការបន្សល់ទុកដោយជីតា កាលពីឆ្នាំ១៩៦២ ដោយបានយកការអភិវឌ្ឍន៍សេដ្ឋកិច្ចមកដាក់ទន្ទឹមនឹងការពង្រឹងវិស័យការពារជាតិ ហើយបន្តការពង្រីកកម្មវិធីនុយក្លេអ៊ែរ ដែលជាតំណាងអាយុជីវិតរបស់ប្រទេស។ បើកម្មវត្ថុនេះសម្រេចបាន នោះកូរ៉េខាងជើងពិតជាមានប្រៀបខ្លាំង ក្នុងការចូលទៅចរចាជាមួយអាមេរិក ឬចរចាសន្តិភាពឱ្យឧបទ្វីបកូរ៉េ ដែលបើតាមភាសាបច្ចេកទេស នៅមានសង្គ្រាមនឹងគ្នានៅឡើយ។
បដិសេធមិនបោះបង់កម្មវិធីនុយក្លេអ៊ែរមែន តែ គីមជុងអ៊ុន បានបត់បែនមនោគមវិជ្ជាដឹកនាំខ្លះ ដោយបានធ្វើកំណែទម្រង់សេដ្ឋកិច្ចពន្លឿនការបើកទូលាយសេដ្ឋកិច្ច ប្រកបដោយផ្លែផ្កា ៖ មានផ្លូវថ្នល់ស្អាត អាគារខ្ពស់ៗកប់ពពក ឧទ្យានកំសាន្ត ហាងទំនិញថ្មី ... សេដ្ឋកិច្ចនិងសង្គម មានការប្តូរផ្លាស់ច្រើននៅរដ្ឋធានី (ឯខេត្តនិងជនបទនៅយ៉ាប់យឺនខ្លាំងដដែល) និងនាំកំណើនសេដ្ឋកិច្ចដល់ទៅ៣%ដែរ នៅឆ្នាំ២០១៦។
កំណែទម្រង់បានជំរុញឱ្យមានការអភិវឌ្ឍន៍សេដ្ឋកិច្ចកូនកាត់ វិស័យឯកជនផ្តើមចាប់កំណើត ដែលធ្វើឱ្យមានស្រទាប់សង្គមថ្មីជាសហគ្រិន ជាអ្នករកស៊ី អ្នកកណ្តាល សម្រាប់តភ្ជាប់ទៅក្រុមឧត្តមសេនីយ៍ជាន់ខ្ពស់។ ប៉ុន្តែផែនការអភិវឌ្ឍន៍សេដ្ឋកិច្ចស្របនឹងយោធានៅតែផុយស្រួយខ្លាំង កូរ៉េខាងជើង នៅតែជាប្រទេសផ្តាច់ការ គ្រោះទុរ្ភិក្សនៅបន្តញាំញី និងត្រូវការរំពឹងតែលើជំនួយមនុស្សធម៌អន្តរជាតិ។ ភាពរាំងស្ងួតនារដូវក្តៅកន្លងមកនេះបានជំរុញឱ្យកូរ៉េខាងជើងជួបគ្រោះខ្វះចំណីអាហារជាថ្មី បូកផ្សំនឹងការពង្រឹងទណ្ឌកម្មអន្តរជាតិឥតឈប់ទៀត សេដ្ឋកិច្ចកូរ៉េខាងជើងពិតជាពិបាកស្ទុះឡើងណាស់ ហើយស្ថានភាពដែលយាប់យឺនស្រាប់អាចនឹងធ្លាក់កាន់តែដុនដាបជាមិនខាន។
ប៉ុន្តែក្រោយជោគជ័យនៃការសាកល្បងនុយក្លេអ៊ែរ ដែលជាអាវុធដ៏មានមហិទ្ធិរិទ្ធ ទំនងដល់ពេលដែលគីមជុនអ៊ុនត្រូវចាប់ផ្តើមគិតគូរបើកប្រតិបត្តិការចែចង់ម្តង ដើម្បីសាកល្បងរកវិធីបើកកិច្ចចរចាជាមួយអាមេរិក។ នេះគឺជាល្បែងយុទ្ធសាស្ត្ររបស់កូរ៉េខាងជើង។ ហើយព្យុងយ៉ាង ជាអ្នកមានប្រៀបជាងគេ ព្រោះគ្មាននរណាម្នាក់ចង់ឃើញសង្គ្រាមទេ សូម្បីតែអាមេរិកក៏មិនចង់ដែរ។ ចំណែកចិនរឹតតែមិនចង់ទៀត គ្រាន់តែថាចិនស្ថិតក្រោមសម្ពាធខ្លាំងជាងគេ ៖ សម្ពាធពីខាងអាមេរិកឱ្យដាក់ទណ្ឌកម្មព្យុងយ៉ាងជាថ្នូរនឹងការបោះបង់កម្មវិធីនុយក្លេអ៊ែរ សម្ពាធពីខាងកូរ៉េខាងជើងដែលបានការចរចាជាមួយអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ