អាស៊ាននឹងចុះកិច្ចព្រមព្រៀងផ្តោះប្តូរពាណិជ្ជកម្មសេរីជាមួយហុងកុង
សមាគមប្រជាជាតិអាស៊ីអាគ្នេហ៍ ហៅកាត់ថាអាស៊ាន នឹងចុះហត្ថលេខាលើកិច្ចព្រមព្រៀងផ្តោះប្តូរពាណិជ្ជកម្មសេរីជាមួយហុងកុង នៅខែវិច្ឆិកាខាងមុខ។ កិច្ចព្រមព្រៀងនេះជាលទ្ធផលនៃការចរចារយៈពេលបីឆ្នាំ។ នេះបើតាមសេចក្តីជូនដំណឹងរបស់រដ្ឋមន្ត្រីហ្វីលីពីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ហុងកុងបានចាប់ផ្តើមចរចាជាមួយអាស៊ានតាំងពីឆ្នាំ២០១៤មក ពោលគឺបួនឆ្នាំក្រោយពេលដែលសមាជិកសមាគមអាស៊ានបានចុះកិច្ចព្រមព្រៀងពាណិជ្ជកម្មជាមួយចិន។
ក្រៅអំពីរកឃើញកិច្ចព្រមព្រៀងផ្តោះប្តូរពាណិជ្ជកម្មសេរីជាមួយគ្នាដែលនឹងត្រូវចុះហត្ថលេខានៅខែវិច្ឆិកា នាឱកាសជំនួបកំពូលអាស៊ាននៅហ្វីលីពីន ហុងកុង ក៏សម្រេចកិច្ចព្រមព្រៀង ស្តីពីការវិនិយោគជាមួយអាស៊ានទៀត។ បើតាមប្រសាសន៍របស់រដ្ឋមន្ត្រីក្រសួងពាណិជ្ជកម្មហ្វីលីពីន នេះជាសញ្ញាដ៏វិជ្ជមានសម្រាប់អាស៊ាននៅចំពោះមុខសហគមន៍អន្តរជាតិ ប៉ុន្តែលោករដ្ឋមន្ត្រីហ្វីលីពីន មិនបានផ្តល់ព័ត៌មានលម្អិតទាក់ទងនឹងកិច្ចព្រមព្រៀងទាំងពីរ ដែលមានពាក់ព័ន្ធនឹងការកាត់បន្ថយសិទ្ធិនាំចូលនិងលុបពន្ធឬឧបសគ្គវិនិយោគទេ។
កិច្ចព្រមព្រៀងនេះ បានសម្រេចជាលទ្ធផល ក្រោយពីមានជំនួបពិភាក្សានៅក្រុងម៉ានីល រវាងរដ្ឋមន្ត្រីអាស៊ានទទួលបន្ទុកពាណិជ្ជកម្មនិងតំណាងរដ្ឋាភិបាលហុងកុង។
អាស៊ានដែលមានប្រជាជនសរុបចំនួន ជាង៦០០លាននាក់ គឺជាដៃគូពាណិជ្ជកម្មទីពីររបស់ហុងកុងបន្ទាប់ពីចិន។ ហុងកុងក៏ត្រូវបានចាត់ទុកជាទីស្នាក់ ឬទីស្តុកពាណិជ្ជកម្មរវាងចិននិងអាស៊ាន ដែលមានសមាជិក១០ប្រទេស ៖ ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី ភូមា ហ្វីលីពីន សិង្ហបុរី ថៃនិងវៀតណាម។
ជាផ្លូវការ តាំងពី១៩៩៧មក ហុងកុងបានត្រលប់មកជាដែនដីមួយចិន តែមានរដ្ឋបាលពិសេស និងបានរក្សាទុកនូវចំណាត់ការពន្ធគយដាច់ដោយឡែកពីប៉េកាំង។ ចំណែកសមាជិកអាស៊ានក៏មានបង្កើតតំបន់ផ្តោះប្តូរសេដ្ឋកិច្ចសេរីរវាងគ្នាផង ដើម្បីកាត់បន្ថយឱ្យដល់សូន្យនូវតម្លៃទ្រព្យខ្លះឬបន្ថយរនាំងពន្ធ និងបានចុះកិច្ចព្រមព្រៀងជាមួយដៃគូសំខាន់ៗផ្សេងទៀតដូចជាចិន និងជប៉ុន។ អាស៊ានក៏មានកិច្ចព្រមព្រៀងផ្តោះប្តូរពាណិជ្ជកម្មជាមួយ ឥណ្ឌា អូស្ត្រាលី នូវែលហ្សេឡង់ និងកូរ៉េខាងត្បូងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ