ឧទ្ទាមដើម្បីរ៉ូហ៊ីងយ៉ា ប្រកាសបទឈប់បាញ់ ដោយឯកតោភាគី
ក្រុមប្រដាប់អាវុធ ទ័ពព្រៃ រ៉ូហ៊ីងយ៉ា នៅថ្ងៃអាទិត្យនេះបានប្រកាសជាឯកតោភាគី បទឈប់បាញ់ នៅរដ្ឋរ៉ាឃីន ដើម្បីបើកផ្លូវឲ្យជំនួយមនុស្សធម៌ដល់ប្រជាជនរ៉ូហ៊ីងយ៉ា រាប់ម៉ឺននាក់ ដែលកំពុងរត់គេច ចេញពីអំពើហិង្សា តាំងពីចុងខែសីហា។ តាមអង្គការសហប្រជាជាតិ គេត្រូវការជាបន្ទាន់ ថវិកាជំនួយប្រមាណ ៧៧លានដុល្លារ សម្រាប់ផ្តល់ជំរក និងអាហារ ដល់ជនជាតិរ៉ូហ៊ីងយ៉ា ដែលមានចំនួន ជិត៣សែននាក់ កំពុងរត់ភៀសខ្លួន ទៅទឹកដីបង់ក្លាដែស។
ចុះផ្សាយនៅថ្ងៃ៖
ក្រុមឧទ្ទាមរ៉ូហ៊ីងយ៉ា បានប្រកាស បទឈប់បាញ់ រយៈពេលមួយខែ នៅរដ្ឋរ៉ាឃីន។ ជាការប្រកាសធ្វើដោយឯកតោភាគី ប៉ុន្តែ ក្រុមទ័ពព្រៃ រ៉ូហ៊ីងយ៉ា ដែលជាអ្នកចាប់ផ្តើមវាយប្រហារទៅលើទីស្នាក់ការប៉ូលិសភូមា នៅខែសីហា បានអំពាវនាវ ឲ្យកងទ័ពភូមា អនុវត្តបទឈប់បាញ់ដូចគ្នាផងដែរ។ នៅក្នុងសេចក្តីថ្លែងការណ៍ ផ្សាយនៅក្នុងសារ បណ្តាញសង្គម Twitter ក្រុមឧទ្ទាមរ៉ូហ៊ីងយ៉ា បានអះអាងថា ពួកគេនឹងផ្អាកការប្រយុទ្ធ មួយរយៈ ដើម្បី សម្រួលបើកផ្លូវឲ្យមានការផ្តល់ជំនួយមនុស្សធម៌ដល់ជនភៀសខ្លួនរ៉ូហ៊ីងយ៉ា។
កងទ័ពភូមាវិញ នៅមិនទាន់បានប្រតិកម្ម ឆ្លើយតប យ៉ាងណាទៅនឹងការអំពាវនាវ ឲ្យមានបទឈប់បាញ់នោះទេ។ ប៉ុន្តែ នៅថ្ងៃសៅរ៍ម្សិលមិញ កាសែតភូមាបានចុះផ្សាយថា រដ្ឋាភិបាលភូមានឹងបង្កើតជំរំបីកន្លែង សម្រាប់ទទួលជនភៀសខ្លួន ដែលគេចចេញ ពីការប្រយុទ្ធគ្នាដ៏ហិង្សា នៅរដ្ឋរ៉ាឃីន។
ដំណឹងស្តីពីការផ្អាក ឈប់ប្រយុទ្ធរបស់ពួកឧទ្ទាម រ៉ូហ៊ីងយ៉ា ត្រូវបានទទួលស្វាគមដោយក្រុមកាកបាទក្រហម បង់ក្លាដែស ដែលបានទាញសញ្ញា អាសន្នពីការខ្វះជំនួយបឋម សម្រាប់ជនភៀសខ្លួនរ៉ូហ៊ីងយ៉ា ដែលបានធ្វើដំណើររាប់ម៉ឺននាក់ ចូលទឹកដីបង់ក្លាដែស។ ប៉ុន្តែ សម្រាប់ជនភៀសខ្លួនរ៉ូហ៊ីងយ៉ាងផ្ទាល់ ពួកគេមិនជឿជាក់ និងសង្ឃឹមទេ ថា បទឈប់បាញ់ របស់ពួកឧទ្ទាមលើកនេះ នឹងអាចធ្វើឲ្យពួកគេត្រលប់ទៅភូមិកំណើត វិញ នៅក្នុងរដ្ឋរ៉ាឃីន ប្រទេសភូមា ព្រោះថា ផ្ទះ ដីភូមិរបស់ពួកគេត្រូវបានដុតបំផ្លាញ គ្មានសល់អ្វីទេ។ នៅក្រោយរត់ផុតពីទឹកដីភូមា ប្រជាជនរ៉ូហ៊ីងយ៉ាជាច្រើនបាននិយាយថា អ្នកភូមិភូមា កាន់ពុទ្ធសាសនា ដែលមានការសហការពីពួកទាហានភូមា បានដុតផ្ទះ និងគំរាមដុតសម្លាប់ ប្រសិនបើពួកគេមិនចាកចេញពីទឹកដីភូមានោះទេ។
មានឈ្មោះថា កងទ័ពរំដោះរ៉ូហ៊ីងយ៉ារដ្ឋអារ៉ាខាន់ (ASRA) ពួកឧទ្ទាមរ៉ូហ៊ីងយ៉ា អះអាងថា ពួកគេតស៊ូប្រយុទ្ធដើម្បីប្រឆាំងនឹងការធ្វើទុក្ខបុកម្នេញរបស់ទាហានភូមា លើជនជាតិរ៉ូហ៊ីងយ៉ា។ ក្រុមនេះ ធ្លាប់បានវាយប្រហារម្តងទៅលើប៉ុស្តប៉ូលិស នៅខែតុលាឆ្នាំមុន។ ប៉ុន្តែ ការវាយប្រហារជាលើកទី២ ទៅលើប៉ូលិសភូមា នៅចុងខែសីហាមុននេះ បានក្លាយជាដើមហេតុ ផ្ទុះអំពើហិង្សា ឈានទៅដល់ទៅការរត់ចំណាកស្រុកដ៏ធំមួយ របស់ប្រជាជន រ៉ូហ៊ីងយ៉ា ចេញពីទឹកដីភូមា។ តាមអង្គការសហប្រជាជាតិ អំពើហិង្សា នៅពីរសប្តាហ៍ចុងក្រោយនេះ បានធ្វើឲ្យជនភៀសខ្លួនរ៉ូហ៊ីងយ៉ា ប្រមាណ ២សែន ៧ម៉ឺននាក់ រត់ចេញពីទឹកដីភូមា សំដៅប្រទេសជិតខាង បង់ក្លាដែស។ បង់ក្លាដែស ដែលធ្លាប់ទទួលជនភៀសខ្លួន រ៉ូហ៊ីងយ៉ា ប្រមាណ ៤សែននាក់ រួចហើយ ដោយសារតែជម្លោះសាសនា នៅភូមា (ចាប់ផ្តើមឡើងដំបូង នៅឆ្នាំ ២០១២) ហាក់លែងអាចទប់ជាប់នឹងវិបត្តិ ហូរចូលជនភៀសខ្លួនរ៉ូហ៊ីងយ៉ាតទៅទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ