ស៊ុយអែតនិងអង់គ្លេសសុំអោយក្រុមប្រឹក្សាសន្តិសុខអ.ស.បបើកកិច្ចប្រជុំបន្ទាន់ពីបញ្ហាជនជាតិរ៉ូហ៊ីងយ៉ា
ក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំបន្ទាន់ ថ្ងៃពុធស្អែកនេះ ពិភាក្សាពីបញ្ហាជនជាតិរ៉ូហ៊ីងយ៉ា ពីស្ថានការណ៍ដុនដាបនៅរដ្ឋរ៉ាក់ឃីនប្រទេសភូមា។ កិច្ចប្រជុំនេះបិទទ្វារ ធ្វើឡើងតាមសំណូមពរស៊ុយអែតនិងអង់គ្លេស។ ម្សិលមិញ ឧត្តមស្នងការ សិទ្ធិមនុស្សអង្គការសហប្រជាជាតិបានប្រដូចស្ថានការណ៍ហិង្សាភូមា ទៅនឹងការបោសសម្អាតជនជាតិភាគតិច។ ចិនគូសបញ្ជាក់ឡើងវិញ ថាចិនគាំទ្រភូមា ក្នុងកិច្ចប្រឹងប្រែងការពារស្ថិរភាព ដើម្បីការអភិវឌ្ឍជាតិភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ប្រឈមនឹងស្ថានការណ៍ដុនដាបនៅរដ្ឋរ៉ាក់ឃីនក្នុងទឹកដីភូមា ស៊ុយអែតនិងអង់គ្លេសបានសុំអោយក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំបន្ទាន់ បិទទ្វារជិត មិនអោយអ្នកកាសែតបានចូលទៅ។ អង់គ្លេសប្រាប់ថា ត្បិតថា វាជាកិច្ចប្រជុំបែបឯកជន ប៉ុន្តែ នឹងផ្តល់លទ្ធផលបែបសាធារណៈ ហើយកិច្ចប្រជុំនេះនឹងធ្វើនៅថ្ងៃពុធស្អែកនេះ។ ក្រុមប្រឹក្សាសន្តិសុខធ្លាប់បើកកិច្ចប្រជុំពីបញ្ហាភូមាម្តងហើយ កាលពីថ្ងៃ៣០សីហា ថែមទាំងបានបារម្ភពីផលវិបាកនៃគ្រោះមហន្តរាយមនុស្សធម៌។
ស្ថានការណ៍ហិង្សាភូមា ផ្ទុះឡើងកាលពីចុងខែសីហា ក្រោយក្រុមឧទ្ទាមរ៉ូហ៊ីងយ៉ាវាយប្រហារទៅលើប៉ូលិសភូមា។ កងទ័ពបានបង្ក្រាបហិង្សា ធ្វើអោយមានមនុស្សស្លាប់យ៉ាងហោច៥០០នាក់ ភាគច្រើនជាជនជាតិរ៉ូហ៊ីងយ៉ា។ ជនភៀសខ្លួនរ៉ូហ៊ីងយ៉ានៅបង់ក្លាដែស ពេលនេះ បានកើនដល់ខ្ទង់៣សែននាក់ហើយ។ អង្គការអន្តរជាតិទទួលបន្ទុកអន្តោប្រវេសន៍ OIM វាយតម្លៃថា មានរហូតដល់៣សែន៧ម៉ឺននាក់ឯណោះ។ ម្សិលមិញនេះ ឧត្តមស្នងការសិទ្ធិមនុស្សអង្គការសហប្រជាជាតិបានបរិហារការបង្ក្រាបបែបព្រៃផ្សៃរបស់កងទ័ពភូមា និងបានប្រដូចស្ថានការណ៍ទៅនឹងការបោសសម្អាត ជនជាតិភាគតិចទៀតផង។
ថ្ងៃសុក្រសប្តាហ៍មុននេះ មន្ត្រីការទូតក្រុមប្រឹក្សាសន្តិសុខអង្គការសហប្រជាជាតិបានសាកសួរអង្គការក្រៅរដ្ឋាភិបាលផ្សេងៗ ពីស្ថានការណ៍ភូមា។ ប៉ុន្តែ ចិននិងរុស្ស៊ីមិនបានបញ្ជូនតំណាងខ្លួនចូលរួមកិច្ចប្រជុំនេះទេ។ ថ្ងៃអង្គារនេះ រដ្ឋាភិបាលចិនបានចេញមុខ គូសបញ្ជាក់ម្តងទៀត ថាចិនគាំទ្ររដ្ឋាភិបាលភូមាក្នុងការប្រឹងប្រែងថែរក្សាស្ថិរភាព តំបន់ភាគខាងលិចភូមា។ ចិនសង្ឃឹមថា សហគមន៍អន្តរជាតិក៏គាំទ្រភូមាដូចចិនដែរ។ ពេលនេះ ភូមាសង្ឃឹមថា បើអង្គការសហប្រជាជាតិចង់ចេញទណ្ឌកម្មប្រឆាំងភូមា ទាក់ទងនឹងបញ្ហាជនជាតិរ៉ូហ៊ីងយ៉ា នោះចិននិងរុស្ស៊ីអាចការពារភូមាពីទណ្ឌកម្មទាំងនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ