សិង្ហបុរីមានប្រធានាធិបតីជាស្រ្តីភេទជាលើកទីមួយ
នៅថ្ងៃពុធទី១៣កញ្ញានេះ គឺជាលើកទីមួយហើយនៅក្នុងប្រវត្តិសាស្ត្រនៃសាធារណៈរដ្ឋសិង្ហបុរីដែលមានស្រ្តីភេទមួយរូបកាន់សាសនាអ៊ីស្លាម មកពីសហគមន៍ជនជាតិភាគតិចម៉ាឡេស៊ី ឡើងកាន់មុខតំណែងជាប្រធានាធិបតីនិមិត្តរូបរបស់សិង្ហបុរី ដោយពុំមានឆ្លងកាត់ការបោះឆ្នោត។ ព្រឹត្តិការណ៍នេះ ត្រូវបានអាប់រស្មីដោយសារ តែមតិសាធារណៈ បានធ្វើការរិះគន់ និងបរិហារយ៉ាងក្លាំងក្លា ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
លោកស្រី Halimah Yacob ដែលមានអាយុ ៦៣ឆ្នាំ មុននឹងក្លាយជាប្រមុខរដ្ឋសិង្ហបុរី ធ្លាប់ជាប្រធានសភានៅឆ្នាំ ២០១៣ រហូតដល់ឆ្នាំ ២០១៧។
ហើយជាថ្មីម្តងទៀត លោកស្រី Yacob ក៏ជាស្ត្រីលើកទីមួយដែរដែលបានចូលឡើងកាន់មុខតំណែងជាប្រធានាធិបតីនិមិត្តរូបនៃសាធារណៈរដ្ឋសិង្ហបុរី។
មានវិជ្ជាជីវៈជាមេធាវី លោកស្រី Halimah Yacob បានចូលធ្វើការបំរើនៅក្នុងសភានៅឆ្នាំ២០០១និងបានស្គាល់ជីវភាពនយោបាយនៅឱកាសនោះដែរ។
នាអំឡុង១០ឆ្នាំក្រោយមក លោកស្រី Yacob បានក្លាយជារដ្ឋមន្ត្រីទទួលបន្ទុកខាងខាងយុវជននិងកីឡានិងក្រោយមក ជារដ្ឋមន្រ្តីទទួលបន្ទុកខាងគ្រួសារ។
ជាអ្នកកាន់សាសនាអ៊ីស្លាមនិងមានដើមកំណើតជាជនជាតិម៉ាឡេស៊ី លោកស្រី Yacob ពាក់កន្សែងរុំសក់ក្បាលជានិច្ចដូចជាប្រជាជនម៊ូស្លីមទូទៅដែរ។ នៅក្នុងអំឡុងមុខអាជីពនយោបាយរបស់គាត់ លោកស្រី Yacob ធ្វើការប្រយុទ្ធប្រឆាំងយ៉ាងសកម្មទល់នឹងអ៊ីស្លាមជ្រុលនិយម។
ក៏ប៉ុន្តែប្រភពដើមរបស់គាត់ បានជំរុញឲ្យមានការជជែកគ្នាយ៉ាងផុសផុលនៅក្នុងមតិសាធារណៈ ដោយសារតែលោកស្រី Yacob មានឪពុកជាអ្នកយាមសន្តិសុខនាពេលយប់និងសញ្ជាតិឥណ្ឌា។ បញ្ហានេះហើយដែលជំរុញឲ្យអតីតប្រធានសភានេះ ត្រូវតែខិតខំរកវិធីដោះស្រាយយ៉ាងណាដើម្បីឲ្យគេជឿជាក់ថា លោកស្រីពិតជាប្រជាជននៅក្នុងសហគមន៍ម៉ាឡេស៊ីរស់នៅក្នុងប្រទេសសិង្ហបុរីពិត។
ម្យ៉ាងទៀត ការជូនដំណឹងលើការតែងតាំងលោកស្រី Yacob ដោយគ្មានឆ្លងកាត់នូវការបោះឆ្នោតនេះ បានបង្កឲ្យមានការរិះគន់ទិតៀននិងការចោទប្រកាន់យ៉ាងខ្លាំងក្លាពីសំណាក់មហាជននៅក្នុងប្រទេសជាអាទិ៍នៅតាមបណ្តាញសង្គមដោយពួកគេបានចោទថាជារឿងកំប្លុកកំប្លែង។ ក៏ប៉ុន្តែលោកស្រី Halimah Yacob បានថ្លែងធានាអះអាងប្រាប់ថា បើទោះបីជាពុំមានការបោះឆ្នោតក្តី ក៏ការប្តេជ្ញាចិត្តរបស់លោកស្រីនៅក្នុងការបំរើប្រទេសជាតិនៅតែមានឥទ្ធិពលដូចពីមុនដដែល។
ជាការពិត នៅឆ្នាំ ២០១៧ នេះ គឺជាលើកទីមួយដែរ ដែលសិង្ហបុរី បានជ្រើសយកបេក្ខជនប្រធានាធិបតីមកពីសហគមន៍ម៉ាឡេស៊ីនិងបន្ទាប់ពីប្រទេសនេះ បានធ្វើកំណែទម្រង់នៅឆ្នាំ២០១៦ ដើម្បីអនុញ្ញាតអោយដល់អ្នកតំណាងសហគមន៍ជនជាតិនានា អាចមានសិទ្ធចូលកាន់មុខតំណែងជាប្រមុខរដ្ឋសិង្ហបុរីបាន។
គួររំលឹកថា ប្រធានាធិបតីសិង្ហបុរីដែលមានសញ្ជាតិម៉ាឡេស៊ីចុងក្រោយគេ បានជាប់ឆ្នោតនៅឆ្នាំ១៩៦៥ ។ ចំណែកលោកស្រី Halimah Yacob ដែលមានកូនចំនួន៥នាក់ នៅថ្ងៃនេះ បានក្លាយជាប្រធានាធិបតីសិង្ហបុរីលើកទីមួយដែលមានដើមកំណើតម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ