អង្គការសហប្រជាជាតិបារម្ភពីសេណារីយ៉ូដ៏អាក្រក់លើពលរដ្ឋរ៉ូហ៊ីងយ៉ានៅភូមា
វិបត្តិរ៉ូហ៊ីងយ៉ាបាន និងកំពុងក្លាយជាបច្ចុប្បន្នភាពយ៉ាងក្តៅគគុក ហើយអ្វីដែលសហគមន៍អន្តរជាតិបារម្ភខ្លាំងជាងគេនោះ គឺស្ថានភាពមនុស្សធម៌ដុនដាបខ្លាំងនៅក្នុងជំរំរបស់ពលរដ្ឋរ៉ូហ៊ីងយ៉ាស្ថិតក្នុងទឹកដីបង់ក្លាដែស។ ចំណែកអង្គការសហប្រជាជាតិមិនញញើតនឹងនិយាយពីសេណារីយ៉ូដ៏អាក្រក់លើពលរដ្ឋរ៉ូហ៊ីងយ៉ា ពោលគឺការរត់ភៀសខ្លួនរបស់ពលរដ្ឋរ៉ូហ៊ីងយ៉ាទាំងអស់ចេញពីទឹកដីភូមានាពេលខាងមុខ។ ខណៈនេះ ក្រុមប្រឹក្សាសន្តិសុខ និងសហភាពអឺរ៉ុបបានអំពាវនាវដូចគ្នាឲ្យរដ្ឋាភិបាលភូមាបញ្ឈប់ការប្រើអំពើហិង្សាប្រឆាំងសហគមន៍រ៉ូហ៊ីងយ៉ា។
ចុះផ្សាយនៅថ្ងៃ៖
ស្តាប់ - ០២:០៥
ជារៀងរាល់ថ្ងៃគិតតាំងពី ២សប្តាហ៍កន្លងទៅ គេសង្កេតឃើញមានពលរដ្ឋរ៉ូហ៊ីងយ៉ាពី ១០ ទៅ ២០ ០០០នាក់បានរត់ភៀសខ្លួនឆ្លងដែនចេញពីរដ្ឋរ៉ាក់ឃីនប្រទេសភូមាទៅជ្រកកោនក្នុងទឹកដីប្រទេសបង់ក្លាដែសក្បែរខាង។ គឺជាព្រឹត្តិការណ៍មួយដែលអ្នកទទួលខុសត្រូវអង្គការសហប្រជាជាតិមិនញញើតនឹងនិយាយពីសេណារីយ៉ូដ៏អាក្រក់របស់ពលរដ្ឋរ៉ូហ៊ីងយ៉ានាពេលខាងមុខ ពោលគឺការរត់ភៀសខ្លួនទាំងអស់របស់ពួកគេពីរដ្ឋរ៉ាក់ឃីនដើម្បីគេចចេញពីយុទ្ធនាការវាយបង្រ្កាបរបស់កម្លាំងយោធាភូមា។ តាមស្ថិតិឲ្យដឹងថាសព្វថ្ងៃនេះ មានពលរដ្ឋរ៉ូហ៊ីងយ៉ាជិត ១លាននាក់រស់នៅប្រមូលផ្តុំគ្នាក្នុងរដ្ឋរ៉ាក់ឃីន ហើយគ្រាន់តែក្នុងរយៈពេល ២សប្តាហ៍ចុងក្រោយនេះ មានជិត ៤០០ ០០០នាក់បានភៀសខ្លួនទៅជ្រកកោនក្នុងប្រទេសបង់ក្លាដែស។
បង់ក្លាដែសដែលជាប្រទេសក្រីក្រមួយក្នុងលោកកំពុងប្រឈមមុខនឹងលំហូរពលរដ្ឋរ៉ូហ៊ីងយ៉ា ហើយក្រុមអង្គការអន្តរជាតិ និងអង្គការក្រៅរដ្ឋាភិបាលក៏កំពុងក្រពុលមុខក្នុងការគ្រប់គ្រងដោយមានការខ្វះខាតសព្វគ្រប់ តាំងពីស្បៀងអាហាររហូតដល់ទីជម្រក ពិសេសខ្វះទឹកស្អាតប្រើប្រាស់សម្រាប់កុមារព្រោះនៅក្នុងចំណោមជនភៀសខ្លួនទាំងអស់ មានកុមារដល់ទៅ ៦០%។ ប្រឈមនឹងវិបត្តិមួយនេះ សហគមន៍អន្តរជាតិតាមរយៈក្រុមប្រឹក្សាសន្តិសុខបានត្រឹមអំពាវនាវដល់រដ្ឋាភិបាលភូមាឲ្យបញ្ឈប់ប្រើអំពើហិង្សាលើសហគមន៍រ៉ូហ៊ីងយ៉ា។
ចំណែកសហភាពអឺរ៉ុបបានអនុម័តនាថ្ងៃព្រហស្បតិ៍ ទី១៤ កញ្ញានូវសេចក្តីសម្រេចចិត្តមួយដោយបានអំពាវនាវឲ្យកងទ័ពភូមាបញ្ឈប់ការវាយប្រហារលើពួករ៉ូហ៊ីងជាបន្ទាន់។ ទន្ទឹមគ្នានេះ គ្រប់គ្នាកំពុងផ្តោតចក្ខុលើលោកស្រីអ៊ុង សានស៊ូជី រដ្ឋមន្រ្តីការបរទេសភូមា និងជាជ័យលាភីរង្វាន់ណូបែលសន្តិភាពដែលធ្លាប់បានប្តេជ្ញាចិត្តការពារសិទ្ធិរបស់ក្រុមជនជាតិពិន្ធុគ្រប់ប្រភេទដែលកំពុងរស់លើទឹកដីភូមា រាប់ទាំងពួករ៉ូហ៊ីងយ៉ាផង។ បន្ទាប់ពីបានបិទមាត់ មិននិយាយស្តីអ្វីមក លោកស្រីសន្យានឹងចេញមុខពន្យល់បកស្រាយលើរឿងរ៉ូហ៊ីងយ៉ានេះនៅថ្ងៃទី១៩ កញ្ញាសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ