វិបត្តិរ៉ូហ៊ីងយ៉ា៖Amnesty International ចោទកងទ័ពភូមាពីបទអនុវត្តន៍យោបាយដុតកម្ទេច
នៅថ្ងៃសុក្រ ទី១៥ កញ្ញានេះ អង្គការការពារសិទ្ធិមនុស្ស Amnesty International បានចេញរបាយការណ៍មួយស្តីពីស្ថានភាពរបស់ពលរដ្ឋរ៉ូហ៊ីងយ៉ានៅក្នុងប្រទេសភូមា។ ពលរដ្ឋរ៉ូហ៊ីងយ៉ាដែលកំពុងរងគ្រោះដោយការធ្វើទុក្ខបុកម្នេញពីសំណាក់កងទ័ពភូមា និងកំពុងបន្តរត់ភៀសខ្លួនទៅជ្រកកោននៅក្នុងប្រទេសបង់ក្លាដែសក្បែរខាង។ នៅក្នុងរបាយការណ៍របស់ខ្លួន Amnesty International បានចោទកងទ័ពភូមាពីបទកំពុងអនុវត្តនយោបាយដុតកម្ទេច និងបោសសំអាតជនជាតិភាគតិចរ៉ូហ៊ីងយ៉ាទាំងអស់ចេញពីទឹកដីភូមា។
ចុះផ្សាយនៅថ្ងៃ៖
គិតតាំងពីថ្ងៃទី២៥ សីហាមក មានទីតាំងរបស់ជនជាតិភាគតិចរ៉ូហ៊ីងយ៉ាជាង ៨០កន្លែងក្នុងរដ្ឋរ៉ាក់ឃីនត្រូវបានកងទ័ពភូមាដុតកម្ទេចចោលនៅក្នុងក្របខ័ណ្ឌនៃយុទ្ធនាការរៀបចំទុកមុន និងដោយចេតនា នេះជាការបញ្ជាក់របស់ Amnesty International។ ការហ៊ានអះអាងយ៉ាងដូចនេះដោយ Amnesty International ផ្អែកលើភស្តុតាងចំនួនពីរ ទី១ គឺរូបភាពទទួលបានពីផ្កាយរណបដែលបង្ហាញភូមិ ស្រុករបស់ពួករ៉ូហ៊ីងយ៉ាក្នុងរដ្ឋរ៉ាក់ឃីននៅមុន និងក្រោយការវាយប្រហាររបស់កងទ័ពភូមា និងភស្តុតាងទី២ គឺការប្រមូលបានសាក្សីពីខាងភូមា និងខាងបង់ក្លាដែស។ តាម Amnesty International អ្នកកាសែតមិនត្រូវបានរដ្ឋអំណាចអនុញ្ញាតឲ្យចូលយកព័ត៌មាននៅក្នុងតំបន់ជម្លោះទេ។
លោកស្រី ទីរ៉ាណា ហាសាន នាយកកម្មវិធីដោះស្រាយវិបត្តិរបស់ Amnesty International បានអះអាងថា គេមានភស្តុតាងគ្រប់គ្រាន់ដោយមិនអាចប្រកែកបានដែលបញ្ជាក់ពីទង្វើចេតនារបស់កងទ័ពភូមាក្នុងការដុតកម្ទេចផ្ទះសម្បែង និងបង្ហូរឈាមពួករ៉ូហ៊ីងយ៉ាដោយធ្វើយ៉ាងណាបង្ខំពួកនេះឲ្យចាកចេញពីទឹកដីភូមាទាំងអស់។ សម្រាប់លោកស្រីទីរ៉ាណា ហាសាន នេះពិតជាទង្វើបោសសំអាតជាតិពិន្ធុ។ លោកស្រីហាសានបានបន្ថែមថា ការដែលកម្លាំងសន្តិសុខបានធ្វើការឡោមព័ទ្ធភូមិមួយ រួចធ្វើការបាញ់រះលើប្រជាជន រួចហើយយកភ្លើងដុតកម្ទេចផ្ទះសម្បែងទៀត គឺជាឧក្រិដ្ឋកម្មប្រឆាំងមនុស្សជាតិ។
ដោយឡែកក្នុងថ្ងៃសុក្រ ទី១៥ កញ្ញានេះដែរ រដ្ឋាភិបាលភូមាតាមរយៈអ្នកនាំពាក្យលោក Zaw Htay បានចេញមុខការពារខ្លួនថា មិនបានរារាំងអង្គការមនុស្សធម៌ និងភ្នាក់ងារមនុស្សធម៌ក្នុងការនាំជំនួយទៅឲ្យពួករ៉ូហ៊ីងយ៉ានៅរដ្ឋរ៉ាក់ឃីនទេ។ ទន្ទឹមគ្នានេះ លោក Htay បានឆ្លៀតបញ្ជាក់ថា យុទ្ធនាការរបស់កងទ័ពនៅរដ្ឋរ៉ាក់ឃីនមិនមែនជាយុទ្ធនាការប្រឆាំងលើពលរដ្ឋរ៉ូហ៊ីងយ៉ាទេ តែមានគោលដៅប្រឆាំងអំពើភេរវកម្ម និងការវាយប្រហារថ្មីៗទៀតលើកម្លាំងប៉ូលិស និងទាហានរដ្ឋាភិបាល។
យ៉ាងណាក៏ដោយ សហភាពអឺរ៉ុប និងសហគមន៍អន្តរជាតិតាមរយៈក្រុមប្រឹក្សាសន្តិសុខបានបន្តអំពាវនាវដល់រដ្ឋាភិបាលភូមាឲ្យបញ្ឈប់ការប្រើអំពើហិង្សាលើសហគមន៍រ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ